Pe Pe Fɛnyi Knumu Gilgal Na
5
Ŋga Amora leele ŋulo mblɛ praa wa Jordan lɔɔ kre kro yila tohaa pre, na Canaan ŋulo mblɛ praa wa mu tni Mediterranean epo kre nyu na pre na loo na o Tafun Nyiɛkpɔɔ tia Jordan lɔɔ kre peeri, a Israel leele pre tro kre, gbun na yɔ pe na, a fiɛrɛ na pe yii.2 Bawa o Tafun wre na yo Joshua pan mbo, “Chirɛbɔ dnɛ nyjɛ nyu yi tna titi cha, mu tɛɛ mu Israel leele mblɛ fɛnyi yi n knumu yire knumu.” 3 A Joshua na yi cha, mna yi gbeele kama, a pra pe fɛnyi yire knumu wa. A pra lawee kre yeeri fɛnyi knumu nyua.
4 Ŋga ki tia Joshua na pe fɛnyi yire knumu yi na, bilɛ mblɛ pra yili Egypt tra nu, mna da mbe jaa ŋunɔ wi, a pra pe fɛnyi knumu Egypt tra nu wa pre kro na ku tablɔ tra kre nu. 5 Kena mblɛ pra se, nyjila ŋga ni praa wa tablɔ tra kre nu wa kre, pe nsra pe fɛnyi knumu. 6 Israel leele pre na nyaari tablɔ tra kre nu yɛlɛ fuloe shiin, ki tia pe mblɛ pra da ŋunɔ wiire, nyjila ŋga ni pra yili Egypt tra nu kre, pra ku kolo peii. Ŋgi na hin? Pra ndikana pe o Tafun Nyiɛkpɔɔ wre na, a wra da na wa ti mbe pe le Canaan tra taan ŋga kee wra yo o tolɛɛlɛ pan na we o ŋga kre nu. 7 Kena pe bibilɛ mblɛ pra yiri mu tni pe titɛɛ pre fɛnyi Joshua na knumu kre, na pe n yi knumu fa. 8 Ŋga Joshua na tia pra pe fɛnyi yire knumu mu kɔ kre, leele pre na kro pe tnihaa wa mna sɛ su na pe fɛnyi yire klɛ na kɔ.
9 A o Tafun Nyiɛkpɔɔ wre na yo Joshua pan mbo, “Aŋga ni nyifɛɛrɛ ŋga kraa e kuu Egypt tra nu kre laa e na.” Ki tia praa lawee kre yeeri Gilgal mu pan mu su aŋga na.a
10 Ŋga Israel leele pre naa wa Gilgal na, tablɔ tra kre nu mu mbra Jericho na kre, nyiɛpɔ kre ble kɛmbɔjijirɛ na, pra Klɛntro ble kre li yilakɔŋgɔ nyu na. 11 Ŋga ki nyiŋge na se bnimi, kre pra chin mu Canaan tra kre sro le nyuu. Pra shɔlɔ kla, mna yi yɛ tɛɛ mu paanu ŋga nu pe nsra yiisi le pe, mna ka. 12 Mu yire kre ble kre na, manna nyjɛ yiraa woni, a pra ta na yoori na kaa yire nyu na to. Pe nsraa yi taa na kaa na, kena Canaan tra kre sro praa lii.
Joshua Na Nyiɛkpɔɔ//Ŋunɔwifɛɛnlɛ Lopom
13 Ŋga praa wa Jericho tra nu wa kre, ki ble ka Joshua na blɔ wa nya brɔfiɛn yiɛ shiin ni kɛɛ, mna pan mu yire u yiɛ. Joshua na flo mu da u na, mu u wie mbo, “O kro mu nyi ree, o loŋgoolo kro mu nyi hin?”
14 A blɔ wre na kna mbo, “E loŋgo ma mi, a e tamfun ma mi, la, o Tafun Nyiɛkpɔɔ wre ŋunɔwifɛɛnlɛ pre lopom wi mi, a ni pan.” A Joshua na kosie kan u yiɛ, mna yiɛ juule tra mna u sumi, mna kna mu u wie mbo, “Ni tafun, ŋgi mu ta mbe yo mu sumifun pan hin?”
15 A wra kna mu yo Joshua pan mbo, “Mu kpawrɛ yire wɔ mu jeelee na, ŋgi na hin? Tra ŋga na mu yire kre pe cheche.” A Joshua na u kpawrɛ yire wɔ.