2 A Nyiɛkpɔɔ na yo Joshua pan mbo, “Ni Jericho na ki ŋunu, na ki ŋunɔwifɛɛnlɛ kro le mu kɛɛ. 3 Ŋu na mu ŋunɔwifɛɛnlɛ pre e nyaari e chia kre fɛ e kun gbee nunu blenyini ma ble kɔɔnanu. 4 Ti mbe srawɔfɛɛnlɛ kɔɔnashin bnɔɛ nyjɛ pe mbaplɔ nyamblɛ tɛɛ mu pe yire yii, mbe yiɛ klu Nyu Nunu Daka kre pan. Ble kɔɔnashin ble kre, e nyaari e chia kre kun gbee kɔɔnashin, mbe srawɔfɛɛnlɛ pre na pe bnɔɛ yire foo. 5 Na e waa kɔ kre, mbe pe bnɔɛ yire chaa mbe fɔ. Na leele pre waa loo na pe bnɔɛ yire fɔ kpɔɔ haŋa kre, mbe pe kro gble le badaaŋga. Mboo ŋga pe sin mu chia kre fɛ mu kun kre we juari mbe wo, mbe e jaa le chia kre lam.”

6 Ŋga Joshua na kee kre loo ma kre, wra srawɔfɛɛnlɛ pre yeeri, mna yo pe pan mbo, “E sɛ Nyiɛkpɔɔ Nyu Nunu Daka kre wru, mbe srawɔfɛɛnlɛ kɔɔnashin pre bnɔɛ wru mbe yiɛklu ki pan.” 7 A wra kna mna yo leele pre pan mbo, “E tro e sɛ nyaari e chia kre fɛ e kun, e ti mbe ŋunɔwifɛɛnlɛ titie pre yiɛ klu Nyu Nunu Daka kre pan.”

8-9 Ŋga Joshua na paara leele pre pan mu kɔ kre, a ŋunɔwifɛɛnlɛ titie pre na sɛ tro mu yiɛ klu, a srawɔfɛɛnlɛ kɔɔnashin mblɛ kɛɛ bnɔɛ yire na nyi pre na taa, na pe bnɔɛ yire foo na shie, a mblɛ pra Nyu Nunu Daka kre tio pre na tro mu taa, a ŋunɔwifɛɛnlɛ hamblɛ pre na taa pe kro. Kre nyjila kre krɛrɛ na bnɔɛ yire wa na tini. 10 La, Joshua na yo pe pan mbo, “Wa waa shia paara, ndee mbe gble kpɔɔ le, fɔna ble ŋga na mbe yo na e gble le, mbe e chiin gble le kpɔɔ.” 11 A pra o Tafun Nyiɛkpɔɔ Nyu Nunu Daka kre tio, mna nyaari mu fɛ mu chia kre kun gbee nunu, mna ndru mu sɛ pe tni haa wa.

12 Ŋga nyiŋge na se bnimi pupu, a Joshua na yiri, a srawɔfɛɛnlɛ pre na yiri mna o Tafun Nyiɛkpɔɔ Nyu Nunu Daka kre wru. 13 A ŋunɔwifɛɛnlɛ titie pre na yiri mu yiɛ klu, a srawɔfɛɛnlɛ kɔɔnashin mblɛ kɛɛ bnɔɛ na nyi pre na taa pe na, na pe bnɔɛ yire foo, a mblɛ pra o Tafun Nyiɛkpɔɔ nyu-nunu-daka kre tio kre na taa, a ŋunɔwifɛɛnlɛ pre hamblɛ pre na pe kro tɔ. 14 Ble shiinwo wo kre na chɔɔ, pan pra nyaari mna chia kre fɛ mu kun gbee nunu, mna ndru mu sɛ pe tni haa wa. Pra ki pe ma ble kɔɔnanu.

15 Ble kɔɔnashin ble kre na kre, pra yiri yaari mna taa peyɛ na imi na pra ki pe jle kre, mna nyaari mu chia kre fɛ mu kun gbee kɔɔnashin, kre ble kre chiin pra nyaari mu chia kre kun gbee kɔɔnashin. 16 Gbee kɔɔnashin wo kre na, srawɔfɛɛnlɛ pre na bnɔɛ yire fɔ kpɔɔ, a Joshua na yo ŋunɔwifɛɛnlɛ pre pan mbo, “E gble le kpɔɔ. Ŋgi na hin? O Tafun Nyiɛkpɔɔ wre chia kre le e kɛɛ.” 17 Chia kre, na leele, na yirɛ na yirɛ nyjɛ yii wa ki na kro, e yi kla. E yi pe na sra e woni na yi ni na o Tafun Nyiɛkpɔɔ wre kaan, fɔna Rahab tɛtiɛrɔɔ wre, na leele mblɛ pee wa u katoo kre, e pre chiin ti. Ŋgi na hin? Wre wra leele mblɛ o na tun na pe sɛ chia kre ju mbe le pre wru mu ndra. 18 La, e eyɛ dɔɔta yirɛ nyjɛ ki fna e kla yire na, wa waa shia ka wru mbe kala cha mbe uyɛ ŋga. Na kre ma, na wa waa yaka wru wa we kala cha mbe e ŋga e tnihaa wa. 19 Swafiŋge yira, na swanyiɛ na swafre, na tɔɔnrɔ yira ŋga ee nya wa kpan, yi fna mbe pe o Tafun Nyiɛkpɔɔ wee, e pan na yi ni u swa tɛɛ haa wa.

20 A srawɔfɛɛnlɛ pre na bnɔ yire fɔ, a leele pre na gble kpɔɔ le, a Jericho mboo ŋga pra sin mu ki fɛ mu kun kre na juari mu wo, a ŋunɔ wifɛɛnlɛ pre na le chia kre na, mna ki shɔ mu ta. 21 Pra brɔfiɛn yiɛshiin tɛɛ mna chia kre chiɛlɛ, na bilɛ, na loplombo, na biile kro gbo. Leele pre wa nsra kro. Pra pe gbo peii, mna pe nui, na pe mbaala, na bubunlɔ kro gbo mu ya.

22 A Joshua na kna mna yo leele shiin pre pra tun chia kre lehaa pre pan mbo, “E sɛ tɛtiɛrɔɔ wre katoo, e sɛ wre na u leele pre wru e pan, imi na e na da mu u ŋga kre.” 23 A bilɛ shiin pre na sɛ, mna sɛ pan na Rahab, na u lɛ, na u lo, na u nyjɔɔlɔ, na u chinlɛ, na u kɛ leele kro ni, a pra sɛ pe tɛɛ pe tnihaa kre mbɛɛ na, pe nsra tni mu chaa na pe ni.

24 A pra chia kre, na yirɛ nyjɛ yiraa wa ki na kro sro, mna swafiŋge, na swanyiɛ, na swafre, na tɔɔnrɔ yirɛ yire kro wru mna sɛ yi tɛɛ o Tafun Nyiɛkpɔɔ wre swa tɛɛ haa wa. 25 La, Joshua nsra tia pra Rahab tɛtiɛrɔɔ wre, na u kɛ leele pre gbo. Ŋgi na hin? Wre wra leele mblɛ Joshua na tun mbe pe sɛ Jericho ju mbe le mbe paan yo u pan pre wru mu ndra. Ki tia u kɛ leele wa mu tni Israel leele nu mu pan mu su aŋga na.

26 Kre nyjila kre, Joshua na da mu leele pre ŋga mbo, Ndro ŋmba we na chaa mbe ndru mbe Jericho chia ŋga pɔ na kre,

27 A o Tafun Nyiɛkpɔɔ wre na taa Joshua kro, a wra mɛɛ ta tra kre nu kro.