2 Joshua na yire Jericho na wa mna leele wɔ mu tun mbe pe sɛ chia ŋga praa yeeri Ai, a kraa wa Beth-Aven mbɛɛ na, na shie Bethel yila finhaa kre na mbo, “E sɛ tra kre le e pan e yo ni pan.” A leele pre na sɛ Ai tra kre le.

3 Pra sɛ pan mu yo Joshua pan mbo, “Ki n shian na leele pre kro we sɛ wi na Ai leele pre ni. Ti mbe leele kagbenyi shiin, ndee kagbeŋge taarɛ sɛ. Maa leele pre kro tɔɔra finfin, ŋgi na hin? Leele fiɛn plɛ pee wa wa.” 4 A Joshua na leele kagbeŋge taarɛ wɔ, a pra sɛ Ai na. Pe nsra Ai leele pre ja, pra wi mu to. 5 Ai leele pre na gbo Israel leele pre nu leele fulo na kɛmbɔkɔɔnanu. Pra yire na Israel leele pre ni Ai jlonwee nyu na, mna pe ni mu tii nyambie yɛ nu. Pra taa pe kro mna pe gbo mu sɛ yili dnɛ ja haa ka nu. Kra tia gbun na yɔ Israel leele pre na, a fiɛrɛ na pe yii.

6 A Joshua na Israel loplombo pre na pe dodonyi tini mu wla, pe yɛ na. Mna yiɛ juule juule tra o Tafun Nyiɛkpɔɔ Nyu Nunu Daka kre yiɛ, mna sɛ su yilakɔŋgɔ, mna tra tɛɛ mu pe ndrɛ fa kro, mbe ki nyina na pe fooro lii. 7 A Joshua na kna mbo, “Jaŋgafun Nyiɛkpɔɔ, mni a mu leele mblɛ wru mu Jordan lɔɔ ŋga kun, mu pan mu o le Amora leele kɛɛ mbe pe o kla ŋga hin? Na o na chin, mbe o na kro lɔɔ kro wa. 8 O Tafun Nyiɛkpɔɔ, ŋgi mbe yo hin? Na kree ŋga Israel leele fɛ pe loŋgoolo yiɛ. 9 Canaan leele, na leele mblɛ pee wa tra ŋga na kro we kre kee ŋga loo, mbe paan o tɔ, mbe o gbo mbe flo tra ŋga na. O Tafun Nyiɛkpɔɔ, kee ŋgi mu pe, mbe mu mɛɛ wa fun hin?”

10 A O Tafun Nyiɛkpɔɔ na yo Joshua pan mbo, “Yiri mu yire, mni a mu yiɛ juule tra ma hin? 11 Israel leele pre ni pe sisaa, pe n li ni nyu kee ŋga ni yo pe pan kre na, pe yirɛ nyjɛ ni yo pe kla kre yɛ wru. Pe ju, mu kala fnɛ mu yirɛ yire wru mu ta. 12 Kre ki tia Israel leele pre n ja mu yire mu pe loŋgoolo pre shie, a pe krɔ kna mu fɛ kre. Pre titi pe peyɛ dɔɔya, mba yire e kro na, fɔna e yirɛ nyjɛ ni yo na e kla yire kla tun.

13 Yiri, le na leele pre we pe yɛ pe cheche. Yo pe pan na pe pe yɛ kna baŋga, ŋgi na hin? Israel Nyiɛkpɔɔ wree wa na kee ka ni mbe yo pe pan mbo, ‘Yirɛ nyjɛ ndaa yo e kla yire yɛɛ wa e pan tɛ, yaa jaa yire e loŋgoolo yiɛ fio, fɔna e yi kla.’

14 Yo pe pan na, ‘Baŋga bnimi, jlom kro ki pan na ki leele ni ni yiɛ, na jlom ŋga pan, mbe ŋga pan. Jlom ŋga mbaa wɔ kre, mbe pre pan katoo katoo, katoo ŋga mbaa wɔ kre, mbe ki leele pan lobiile, lobiile. Lobiile mblɛ mbaa wɔ kre, mbe ki leele pan nununu. 15 Kena ndro ŋmba mbe yii na yirɛ yire ni kre, ki fna mbe pe wre na u chɔ, na u biile, na u yirɛ kro sro. Ŋgi na hin? U n li ni nyu kee na, mu tia nyifɛɛrɛ Israel leele gbo.’”

16 Ŋga nyiŋge na se bnimi pupu to, a Joshua na tia Israel leele na pan mu yire o Tafun Nyiɛkpɔɔ wre yiɛ jlom jlom, a wra Judah jlom kre wɔ. 17 A pra pan mu yire katoo katoo, a wra Zerah katoo kre wɔ, a pra pan na Zerah lobiile ni, a pra pan mu yire lobiile lobiile, a wra Zimri lobiile wɔ. 18 A pra pan na Zimri lobiile pre ni nununu, a wra Carmi biblɔ Achan wɔ.

19 A Joshua na yo Achan pan mbo, “Ni pɔ, Israel Nyiɛkpɔɔ wre ŋga yɛnyiŋge, mu u ŋga mɛɛ, mu kee ŋga mu pe kre yo ni pan, maa ki ndra ni na.”

20 A Achan na kna mbo, “Ki pe kpra, ni sisam pe o Tafun Israel Nyiɛkpɔɔ wre na, kee ŋga ni pe yi kre. 21 Ndaa dodoŋgi titnɔŋɔ chichie ka nya, a kra pe Babylon dodonyi nyjɛ pe tini yire ka, na swafiŋge, ki snamu we da kradnɛ kunɔ, na swanyiɛ gbana, kre snamu we da kradnɛ nunu na chiɛri, ni yiɛ na nyina yi na, a ndaa yi bali. Ni yi le tra ni yoŋgo nyuŋgo kre lam, a swafiŋge kree wa yi tapan.”

22 A Joshua na leele tun, a pra fɛ mu sɛ le u nyuŋgo, na u yirɛ yire le tra, a swafiŋge kree wa yi tapan. 23 A pra yirɛ yire kro wɔ, mna pan mu Joshua ŋga yi yi Israel leele pre kro yiɛ na, a pra yi tɛɛ o Tafun Nyiɛkpɔɔ wre yiɛ.

24 A Joshua na Israel leele pre kro, na Zerah katoo ndro Achan wre wru, na u swafiŋge kre, na swanyiɛ gbana kre, na dodoŋgi titnɔŋɔ kre, na u biile ni, na u nui, na u mbaala, na u bubnɔ, na u yoŋgo nyuŋgo kre, na yirɛ nyjɛ yiraa wa u pan kro, mna sɛ na pe ni nyuɛ shiin yɛ lalaa, praa bawa yeeri kanyana lawee. 25 Bawa Joshua na Achan wie mbo, “Mni a mu tia o kala nya ma ŋga hin? Aŋga O Tafun Nyiɛkpɔɔ we ti mu kala nya.”

A Israel leele pre kro na dnɛ yoori mna u waari mu gbo, mna chin mu u chɔ, na u biile, na u yurɛ kro waari dnɛ ni mu gbo na, mna pe sro na pe yirɛ kro ni, 26 mna dnɛ koli mu mu wo pe na mu pe tɔ, hali yire dnɛ yiree wa wa mu pan mu su aŋga na. Aŋga bi, ki tia pe kre lawee kre yeeri kanyana lawee. Ŋga kra pan ma kre, a o Tafun Nyiɛkpɔɔ krɔ na nyjii.