Pe Kakpɔɔ Ai Kla
8
O Tafun Nyiɛkpɔɔ na yo Joshua pan mbo, “Maa fiɛ, a maa ti mbe mu sɔɔnrɔ ku. Ŋunɔ wifɛɛnlɛ pre kro wru mu ya muyɛ na, mu sɛ wi na Ai leele pre ni, ŋgi na hin? Ni Ai ŋunu, na u leele, na u chia, na u tra kre kro le mu kɛɛ. 2 Sɛ kakpɔɔ kre, na ki ŋunu pe imi na mna Jericho na ki ŋunu pe kre. Yirɛ nyjɛ ee ta wa kpan, e wee yi, hali pe yurɛ kro, e pe wru. E eyɛ kna, e sɛ ndra chia kre mbookrɔ, e pe tɔ.”3 A Joshua na u wifɛɛnlɛ pre kro wru, a pra sɛ Ai tɔ. Wra ŋunɔ wifɛɛnlɛ titie wɔ kagbeŋge fulo na kɛ, mna tia pra sɛ blee. 4 A wra yo pe pan mbo, “E sɛ ja chia kre mbookrɔ, yaa ti mbe e haale na chia kre ni. E eyɛ kna e yire. 5 Mi na hamblɛ mblɛ pe kro ni jaara pre we na paan chia kre jlonwee kre nyu na. Kena na pe bilɛ pre waa yili mbe wi na o ni, oo krɔ kna mbra feni imi na o na pe jle kre. 6 Pie na o kɔŋgɔ ni ni, mbe o sɛ na pe ni mbe laa chia kre na. Pie yo na pe feni imi na pra fɛ o yiɛ jle kre. Wre we yiɛ nyina mbra shie. 7 Kena yire yiri mbe le chia kre lam mbra wii. O Tafun Nyiɛkpɔɔ wre we chia kre le e kɛɛ. 8 Na e waa pe ja kre, e kanhun le ki na. Kee ŋga o Tafun Nyiɛkpɔɔ wre yo e pe kre, e li ki na. E jande, e le na ee li kee ŋga ni yo e pan ŋga na.”
9 A Joshua na pe wa kolo, a pra sɛ ja Bethel na Ai chia kre lalaa, na shie Ai yila tohaa, a Joshua na leele pre hamblɛ na ŋunu pe tni haa wa.
10 Ŋga nyiŋge na se bnimi pupu kre, a Joshua na tia ŋunɔwifɛɛnlɛ pre na peyɛ kna. A wre na Israel loplombo pre na yiɛklu pe pan na shie Ai na. 11 Pra yiɛ le na shie mna Ai jlonwee na nyi, mna sɛ pe tuuro tɛɛ chia kre nyjeeri haa landɛɛ ka nu, kraa wa pre na chia kre lalaa. 12 Na Joshua tia bilɛ kagbeŋge kunɔ sɛ ja Bethel, na Ai lalaa, na shie chia kre yila tohaa. 13 Pra wifɛɛnlɛ pre tɛɛ tɛɛ pe lawee. Plɛ naa wa na shie chia kre nyjeeri haa, a plɛ naa wa mu ja na shie yila tohaa, ki ble kre blee, Joshua na sɛ sni landɛɛ kre nu.
14 Ŋga Ai ŋunu wre na Joshua bilɛ pre nya kre, a wre na u chia leele na gbolo mu yiri mna peyɛ kna nyaanyaa, mbe se wi Israel leele pre ni Jordan lɔɔ kre landɛɛ kre nu. La, pe nsra chin na wifɛɛnlɛɛ wa mu ja chia kre mbookrɔ. 15 A Joshua na Israel leele pre na tuwi mu tia praa pe nini, a pra fɛ mu tablɔ tra kre kolo yii na shie. 16 A pra chia kre bilɛ yeeri kro, a pra pan mu taa pe kro, hali mna sɛ mu laa chia kre na. 17 Blɔ nsra kro Bethel, na Ai na, a u nsra yili mu Israel leele pre kɔŋgɔ ni ka. Pra yili peii mna chia kre jlonwee nyu krɔ kre ti ma, na pe kɔŋgɔ nini, a ndro nsraa wa na chia kre sri.
18 A O Tafun Nyiɛkpɔɔ na yo Joshua pan, mbo, “Mu chombo ŋga mu kɛɛ kre tini mu ki kan Ai na, ni chia kre le mu kɛɛ.” A Joshua na u chombo kre tini mu kan Ai na. 19 Ŋga wra ki pe ma to, a bilɛ mblɛ pra ja nyaa wa kre na yiri nyaanyaa mna fɛ mu le chia kre na, mna ki shɔ mu ta poŋgo, mna kanhun le ki na.
20 Ai bilɛ pre na yire lee mna nya na wree kun chia kre na, na shie nyjeeri. A pia jaa fɛ mbe shɔ na, ŋgi na, na Israel leele mblɛ pe nini na shie tablɔ tra nu kre kna mu na paan pe pan.
21 Ŋga Joshua na Israel bilɛ pre na kna mna nya na u leele mblɛ u ndra kre sɛ chia kre tɔ, mu kanhun le ki na, a ki wre na nyaa nyjeeri kre, a pra kna na wii na Ai bilɛ pre ni. 22 Ŋga Joshua bilɛ pre na kanhun le chia kre na mu kɔ kre, a pra kna mu pan na wii na pe loŋgoolo pre ni kolo wa, pra loŋgoolo pre wa lalaa, mna wi na pe ni chiin mna sɛ su na pra Ai bilɛ pre gbo peii, nunu chom kuraa nsra kro. 23 La, pra Ai ŋunu wre yii, pe nsra u gbo, mna pan mu le Joshua kɛɛ.
24 Ŋga Israel bilɛ pre na Ai bilɛ pre gbo tablɔ tra ŋga nu pra pe ni mu sɛ da kre nu mu kɔ kre, a pra ndru mu sɛ Ai na wa, mna sɛ leele hamblɛ mblɛ praa wa wa kre taa mu gbo kro. 25 Leele kagbeŋge kɛmbɔshiin pra to ki ble kre, chiɛlɛ na bilɛ kro chaara. Ndro nsra kro Ai na. 26 Joshua nsra u chombo kre tre tra, wraa wa mu ki kan Ai na mna sɛ su na pra chia kre leele gbo mu kɔ. 27 A Israel leele pre na pe yirɛ, na pe yurɛ kro koli mu sɛ imi na o Tafun Nyiɛkpɔɔ na yo Joshua pan kre.
28 Kre kolo kre na wra tro a pra kakpɔɔ Ai kre sro, a ki kaari kataa mu pan mu su aŋga na. 29 Joshua na tia pra sɛ Ai ŋunu wre le maŋa, tiŋge na. A pra u ti wa a yila na u to. Ŋga yila na kɔ kre, a wra tia pra sɛ u gboo kre saan tiŋge kre na, mna sɛ u wa chia kre jlonwee nyu na, mna dnɛ koli tataara mu wo u na, a dnɛ yiree wa wa mu pan mu su aŋga.
Joshua Na Mbra Hlɛ Kre//Tɔɔnri Ebal Nyua Kre Na
30 Joshua na sragbunu sin nyua ŋga praa yeeri Ebal kre na, mna o Tafun Israel Nyiɛkpɔɔ wre ŋga, 31 imi na Moses Nyiɛkpɔɔ sumifun wre na yo Israel leele pre pan kre. Wra ki sin imi na pe ki nyunɔ Moses Mbra hlɛ yire nu kre, sragbuɛnlɛɛ nyjɛ pe sin na dnɛ poponyi nyjɛ na tɔɔnrɔ n da mu to tun ni. Kre na praa yurɛ sroo sra, na wejinyiŋge sra woni na o Tafun Nyiɛkpɔɔ wre kaan. 32 Israel leele pre yiɛ na wa to, Joshua na Moses Mbra yire nyunɔ dnɛ yire na. 33 Israel leele pre kro na pe loplombo, na pe lefɛɛnlɛ, na pe kpra kunfɛɛnlɛ, na fumblɔ mblɛ praa wa mu chaa pe nu kro, naa wa mu yire mu yiɛ kan Levi srawɔfɛɛnlɛ mblɛ pra o Tafun Nyiɛkpɔɔ Nyu Nunu Daka kre tio pre na. Plɛ naa wa mu yire kokoo ŋga na, a plɛ naa wa kokoo ŋgaa na. A leele pre yɔɔ naa wa mu yire nyua Gerizim kre yiɛ, a pe yɔɔ naa wa mu yire nyua Ebal kre yiɛ, imi na Nyiɛkpɔɔ sumifun Moses na nyina na praa pini mbraa Israel leele dwan kre.