3 La, ŋga Gibeon leele na Hivite leele pre na loo kee ŋga Joshua na u leele pe Jericho, na Ai na kre, 4 pra fana kolo ka cha, mna leele plɛ wɔ peyɛ nu, a pra sɛ sro cha mu le zaabɔtɔ lɛɛlɛ nu, na yurɔ hlɛ gbolo lɛɛlɛ ni mu ya, mu yi pɔ mu taa pe bubunlɔ na, 5 mna yokunumɛɛ fra mu le, mna kpawrɛ knumɛɛ fra mu le. A paanu ka wee nyjɛ pra wru yire kro na sheli mna pɔri. 6 A pra fɔɔri mu sɛ Joshua na u leele pre pan Gilgal na, mna sɛ yo pe pan mbo, “O yiri haalee tra ka na mu pan, mbe wre na ŋu nyu nunu pe.”

7 A Israel leele pre na kna mna yo pe pan mbo, “Wre na yire wa jaa nyu nunu pe, aada ee wa mu tni o mbɛɛ na mna.”

8 A pra kna mu yo Joshua pan mbo, “Mu sumifɛɛnlɛ lɛ wre.” A Joshua na kna mu pe wie mbo, “Leele mblɛ nyini lɛ yire hin? A sena e yiri hin?”

9 A pra kna mbo, “O yiri haalee tra ka na, ŋgi na hin? O e Tafun Nyiɛkpɔɔ wre kee loo, mu u kawako kee nyjɛ wra pe Egypt tra nu yire kro loo. 10 Hali o kee nyjɛ wra pe Amora ŋulo shiin pre na, na shie Jordan lɔɔ kre yila finhaa nu yire kro loo, pre na lɛ Heshbon ŋunu Sihon, na Bashan ŋunu Og ŋmba wra ŋunumu li Ashtaroth na wre. 11 A o loplombo na leele mblɛ pee wa o tra nu kro kre kee ŋga yo o pan na, ‘E sro nyjɛ ee sɛ li kolo wru, e sɛ pe fni, e yo pe pan na e sumifɛɛnlɛ lɛ wre, mbe yire na pre nyu nunu pe.’ 12 E o paanu le, fɔnyi na yi, a o na yi wru mu le tuuro na paan, e le imi na yi sheli mu pɔri. 13 E o yurɛ hlɛ gboelee le, fɔnyi na yi, a o na nyumu le yi nu, e yi le imi na yi knumu mu da. Imi na kolo kre le kre ndra na, o dodonyi, na o kpawrɛ kro knumu.”

14 Israel leele pre nsra O Tafun Nyiɛkpɔɔ wre wie, mna chin mu pe sro yire yɛ shɔ mu li. 15 A Joshua na leele pre na nyu nunu pe, na pia pe gbo, a loplombo hamblɛ pre na da mu pe ŋga.

16 Ŋga Israel leele pre, na leele pre na nyu nunu kre pe mu kɔ kre, ki ble taarɛ ble na pra loo na leele pre, haalee ka nu ma pe yiri, la, pee waa mu tni mu mbra pe na. 17 A Israel leele pre na yiri na shie leele pre chiɛ yire na, pe ble taarɛ ble na to, a pra le wa. Pe chiɛ yire na yi, Gibeon, na Kephirah, na Beeroth, na Kiriath-Jearim. 18 La, Israel leele pre nsra pe gbo, ŋgi na hin? Na loplombo pre o Tafun Israel Nyiɛkpɔɔ wre da mu le peyɛ lalaa.

Kra tia Israel leele pre kro naa taanri pe loplombo pre na. 19 A loplombo pre kro na kna mbo, “Fuŋgaami ŋga waa jaa kɛ taa pe na, ŋgi na hin? O o Tafun Israel Nyiɛkpɔɔ wre mɛɛ tɛɛ mu da mu pe ŋga. 20 Kee ŋga oo pe pe yi kre, oo pe ti, mbe o Tafun Nyiɛkpɔɔ wre wa o ndie tini, ŋgi na hin? O u da mu pe ŋga. 21 Yaa pe pe yaka, e pe ti mbe praa kɛɛn kuun, mbra nyumu koori mbra o kaan. A pra li loplombo pre kee kre na.”

22 A Joshua na Gibeon leele pre yeeri mna pe wie mbo, “Mni a e o fana mu yo o pan na haalee e yiri, mu da na o mbɛɛ na mna e nyi mu tni ŋga hin?

23 Kre kee ŋga e pe ŋga ndra na, ee wa Nyiɛkpɔɔ suŋgɔ nu, a ee pe o sumifɛɛnlɛ nyjila kro nu, mbra kɛɛn kuun, mbra nyumu koori mbra shie o Tafun Nyiɛkpɔɔ katoo.”

24 A Gibeon leele pre na kna mbo, “Mu sumifɛɛnlɛ lɛ wre, a o na loo na, e Tafun Nyiɛkpɔɔ wre na yo u sumifun Moses pan na u tra ŋga kro wru mu le e kɛɛ, mbe e ki leele kro kla, ki tia fiɛrɛ na o yii na ee o gbo, kre ki tia o na pe ma. 25 Fuŋgaami oo wa mu kɛɛ, o pe imi na mu chaa.”

26 Pan kra nyi, a Joshua na kɛ tɔ pe na, a u nsra tia Israel leele pre na pe gbo. 27 Mu yire ki ble kre na shie Joshua na tia Gibeon leele pre naa kɛɛn, na nyumu koori na Israel leele pre kaan, na shie na yɛ ni o Tafun Nyiɛkpɔɔ wre sra gbunu kre jaara. Mu pan mu su aŋga, lawee ŋga o Tafun Nyiɛkpɔɔ we wɔ na pra u sumi wa kpan, kre tnumu kre pe tuni wa.