5 Amora ŋulo kunɔ pre kro na chaa. Pre lɛ Jerusalem ŋunu, Hebron ŋunu, Jarmuth ŋunu, Lachish ŋunu, na Eglon ŋunu. Pra pe ŋunɔwifɛɛnlɛ gbun mu chaa, mna sɛ Gibeon fɛ mu kun, mbe wi na pe ni.

6 A Gibeon leele pre na tia pra sɛ yo Joshua pan Gilgal na mbo, “Maa shia kɛ laa mu sumifɛɛnlɛ na, jande, pan nyaanyaa mu o shɔ, ŋgi na hin? Amora ŋulo mblɛ chiɛ yii wa nyuɛ lawee yire nu yire kro pe yɛ gbun mu chaa, mu pe wifɛɛnlɛ kro wru mu pan mu o tɔ.”

7 A Joshua, na u ŋunɔwifɛɛnlɛ mblɛ pra wi mu chin titi pre, na u wifɛɛnlɛ hamblɛ pre kro na yili Gilgal na mbe sɛ wi. 8 A o Tafun Nyiɛkpɔɔ na yo Joshua pan mbo, “Maa shia pe fiɛ, ni pe le mu kɛɛ, pe wa wa jaa yire mu yiɛ.”

9 A Joshua na u bilɛ pre na yili Gilgal na, mna nyaari blee, mna sɛ le Gibeon na, mna sɛ Amora leele pre fo mu pe tɔ. 10 Ŋga pra Israel wifɛɛnlɛ pre nya kre, fiɛrɛ na pe yii, a pra fɛ mu nyina, a pra le pe nu, mna pe tataara gbo Gibeon na wa, mna hamblɛ pre kɔŋgɔ ni, a pra kolo ŋga ki sɛ Beth-Horon na kre yii. Pra pe kɔŋgɔ ni mna pe da mna pe gbo mu sɛ le Azekah, na Makkedah na.

11 Ŋga Amora leele pre hamblɛ na fɛ mu yili Beth-Horon na, mna kolo yii na shie Azekah na kre, bawa o Tafun Nyiɛkpɔɔ na tia nyiɛsubie badɛnyi na yiri nyjeeri mna wo pe na. Pe mblɛ nyiɛsubie yire na gbo na nɛɛ mu wɛ mblɛ Israel leele pre na gbo brɔfiɛn yiɛshiin ni na.

12 Ki ble kre, o Tafun Nyiɛkpɔɔ na Amora leele pre le Israel leele kɛɛ. A Joshua na yire pe yiɛ na, mna nyiɛtali mu yo mbo,

13 A yila, na nyiɛpɔ na yire titɛɛ, mna sɛ su na pra wi mna pe loŋgoolo pre ja, imi na pra ki nyunɔ Jashar hlɛ kre nu kre mbo, “Yila na yire ndra lalaa ble poŋgo ki nsra jɔŋgɔ.” 14 Mu ta mu kɔ kre ble kre na, ble ka n da mu pe ma na, a o Tafun Nyiɛkpɔɔ n lewo nyu kee loo ma tun. Kpra na! O Tafun Nyiɛkpɔɔ wre titi na wi mu ya Israel leele na.

15 A Joshua na Israel leele pre kro na ndru mna sɛ pe tnihaa wa Gilgal na.

16 Nyjila ŋga ni praa Amora leele pre nini kre, ŋulo kunɔ pre na fɛ mna sɛ ndra dnɛ wee ka nu Makkedah na. 17 Ŋga pra pan mu yo Joshua pan na pe ŋulo kunɔ pre nya dnɛ wee Makkedah na kre. 18 A wra yo pe pan mbo, “E sɛ dnɛ badɛnyi gbila e ki nyu tɔ, e ti mbe leele yire mbra ki sri. 19 La, e hamblɛ pre, e loŋgoolo hamblɛ pre kɔŋgɔ ni, yaa shia ti mbe pe shɔ, mbe le pe chiɛ yire na, ŋgi na hin? E Tafun Nyiɛkpɔɔ wre pe le e kɛɛ.”

20 Joshua na u leele na pe loŋgoolo pre nɛɛrɛ gbo, imi na ki fna, a pe chiɛri plɛ na fɛ mu sɛ le pe chiɛ yire na. 21 A Joshua leele pre na ndru mna sɛ u pan Makkedah na wa. Hali ndro nsraa wa mna ja mu nyu kna, Israel leele pre wa ni.

22 A Joshua na kna mbo, “E dnɛ wee kre nyu nyaa e ŋulo kunɔ pre wɔ e pan e ni ŋga.” 23 A pra sɛ pe wɔ dnɛ wee kre nu mna pan na pe ni, ŋulo mblɛ pra wɔ wa na lɛ, Jerusalem ŋunu, Hebron ŋunu, na Jarmuth ŋunu, na Lachish ŋunu, na Eglon ŋunu. 24 Ŋga pra pre ŋulo mblɛ wɔ mu pan mu Joshua ŋga kre, a wra tia pra Israel bilɛ pre kro yeeri a pra pan mu fni, a wra yo ŋunɔwifɛɛnlɛ loplombo pre pan mbo, “E pan e e jeelee klɔ e taa ŋulo mblɛ yulɔɛ na.” A pra flo mu da, mna pe jeelee klɔ mu taa pe yulɔɛ na.

25 A Joshua na kna mna yo pe pan mbo, “Yaa shia fiɛ, a yaa shia ti mbe gbun yɔ e na, e gbun ta, imi na e ŋulo mblɛ pe ŋga, pan o Tafun Nyiɛkpɔɔ we e loŋgoolo mblɛ yire na pre we wi kro pe.” 26 A Joshua na ŋulo pre gbo, mna tia pra pe gboolo tio mna sɛ hlu tinyi kunɔ na. A pra kro wa a yila na sɛ kɔ.

27 Ŋga yila na to kre, a Joshua na tia pra sɛ pe wɔ tinyi yire na, mna sɛ pe le dnɛ wee ŋga nu pra fɛ mu sɛ ndra kre nu. Mna dnɛ badɛnyi fa mu ble ki nyu na, a yii wa wa mu pan mu su aŋga.

28 Ki ble kre lam, Joshua na u leele na wi na Makkedah leele ni. Pra chia kre leele kro, na pe ŋunu gbo, pe nsra ndro nunu chom ti. Imi na wra Jericho ŋunu pe kre, pan wra Makkedah ŋunu wre pe.

29 A Joshua na Israel leele pre kro na yili Makkedah na, mna sɛ wi na Libnah leele ni. 30 O Tafun Nyiɛkpɔɔ na chia kre, na ki ŋunu le Israel leele kɛɛ, a Joshua na u leele na chia kre, na ki leele kro kla peii, ndro nunu nsra kro wa. Imi na wra Jericho ŋunu pe kre, pan wra chia kre ŋunu pe.

31 A Joshua na u leele pre na yili Libnah na wa mna sɛ Lachish tɔ. 32 O Tafun Nyiɛkpɔɔ na Lachish le Israel leele pre kɛɛ. Ble shiinwo na pra pe ja, pra chia kre, na ki leele kla kro. Imi na pra Libnah pe kre, pan pra ki pe na. 33 Nyjila ŋga ni Israel leele pre na Lachish leele pre naa wii kre, Gezer ŋunu Horam na pan mna ya Lachish leele na, la, Joshua leele pre na pe kro gbo peii, ndro nunu nsra kro pe nu.

34 Joshua na u leele pre na yili Lachish na mna sɛ Eglon na, mna sɛ chia kre tɔ. 35 Ki ble kre lam pra chia kre ja, mna leele pre kro gbo, imi na pra Lachish pe kre.

36 A Joshua na Israel leele pre kro na yili Eglon na, mna sɛ wi na Hebron leele ni. 37 Pra chia kre ŋunu, na leele pre gbo peii, hali seechiɛ nyjɛ yiraa wa ki mbɛɛlɛ na yire, pra yi leele gbo kro, pe nsra ndro nunu ti wa. Pan pra ki pe, imi na pra Eglon pe kre. Pra chiɛ yire, na yi leele kro kla.

38 Joshua na Israel leele pre kro na ndru mu kna mna sɛ Debir na. 39 Pra chia kre na ki ŋunu, na ki kabɛɛlɛ yire leele gbo peii, pe nsra ndro nunu ti wa. Imi na pra Libnah na Hebron ŋulo pe kre, pan pra Debir na ki ŋunu pe.

40 Joshua na u leele pre na wi mu tra kre kro shɔ. Chiɛ nyjɛ yiraa wa nyuɛ lawee, na nyjɛ yiraa wa nyuɛ landɛɛ nu na shie yila finhaa, na nyjɛ yiraa wa nyuɛ yire landɛɛ nu na shie yila tohaa, na chiɛ nyjɛ yiraa wa tablɔ tra kre nu, na shie tapan haa yire kro, pe nsra ndro ti wa. Pra pe gbo peii na pe ŋulo ni, imi na Israel Nyiɛkpɔɔ wre na yo pe pan kre. 41 Joshua na u leele pre na wi mu yire Kadesh-Barnea na, mna sɛ su Gaza ŋga kraa wa epo nyu na kre na, mna yire wa mna Goshen tra kro shɔ mu ya, mu sɛ su Gibeon na. 42 Ŋga Joshua na u leele pre na sɛ wi kre, pe nsra ndru pe kro fio. Pra ŋulo pre na pe waŋgrɛ yire kro kla, ŋgi na hin? O Tafun Israel Nyiɛkpɔɔ wre na wi mu yire pe kro.

43 A Joshua na Israel leele pre kro na ndru mu pan Gilgal na, pe tnihaa wa.