Joshua 11

Joshua Na Wi Mu Jabin Na U Leele Ja

Ŋga Hazor ŋunu Jabin na loo na Israel leele wi mu yili kre, wra leele tun ŋulo mblɛ pra mbra u na kre pan mbe pe paan wi na Israel leele ni. Ŋulo mblɛ pan bitumblɔ pre na sɛ kre na lɛ Madon ŋunu Jobab, na Shimron ŋunu, na Acshaph ŋunu. 2 Bitumblɔ pre plɛ na sɛ nyua chiɛ nyjɛ yiraa wa nyjeeri haa trɛ yire nu, a plɛ na sɛ chiɛ nyjɛ yiraa wa na mbra Galilee tapla kre mbɛɛ na kre na, a plɛ na sɛ chiɛ nyjɛ yiraa wa landɛɛ yire nu, a pe plɛ na sɛ epo nyu chiɛ nyjɛ yira mbra Dor chia kre na, mna sɛ pe bɔ mandiɛ kre. 3 Plɛ na sɛ Canaan leele mblɛ praa wa mu tni Jordan lɔɔ kre kokoe shiin yire kro na pre pan, a pe plɛ na sɛ Amora, na Hittite, na Perizzite, na Jebusite leele mblɛ praa wa nyua na kre, na Hivite mblɛ praa wa mu tni Hermon nyua kre jaara Mizpah tra nu kre pan. 4 Pre leele mblɛ kro, na pe ŋunɔwifɛɛnlɛ kro na yili mu pan, pra nɛɛ hali pe nsraa nyu ni. Praa wa na soolo, na sookɛɛ nyjɛ ni praa ŋunɔ wii ni tataara. 5 Yire chiɛ nyjɛ ŋulo, na pe wifɛɛnlɛ kro na pan mu fni titɛɛ Meron lɔɔ kre lawee, bawa pra fni mu nyu nunu pe, mbe sɛ wi na Israel leele ni.

6 O Tafun Nyiɛkpɔɔ wre na yo Joshua pan mbo, “Maa pe fiɛ, ŋgi na baŋga imi nyu na ni pe gbo mu kɔ Israel leele pan, mbe e pe soolo pre panyi saanla, mbe kanhun le pe soo kɛɛ yire kro na.”

7 A Joshua na u leele pre na sɛ leele pre fo mu pe tɔ Meron lɔɔ kre lawee, 8 a o Tafun Nyiɛkpɔɔ wre na pe loŋgoolo pre le pe kɛɛ, a pra pe gbo, mna pe ni mna sɛ su na pe ni chiɛ nyjɛ praa yeeri Sidon kpɔɔ kre, na Misrephoth-Maim na. Hali pra pe gbo chiin mna sɛ su Mizpah landɛɛ ŋga kraa wa na shie yilafin haa kre nu. Ndro nunu chom nsra kro. 9 Imi o Tafun Nyiɛkpɔɔ na yo Joshua pan na u pe kre, pan wra pe. Wra pe soolo pre panyi saanla, mna kanhun le pe soo kɛɛ yire na.

10 Joshua na ndru mna sɛ wi Hazor leele ni, mna ki ŋunu gbo. Kre nyjila kre na Hazor mɛɛ ki yili titi yire waŋgrɛ yire kro nu. 11 Pra leele mblɛ praa wa wa kre yii mu gbo kro, ndro nunu chom kuraa nsra kro wa, a pra chia kre sro.

12 Joshua na yire chiɛ nyjɛ leele, na pe ŋulo yii mna pe gbo peii. Wra pe kla imi na o Tafun Nyiɛkpɔɔ sumifun Moses na yo u pan kre. 13 Israel leele pre nsra chiɛ nyjɛ pra sin sin kotum na yire ka sro, fɔna Hazor ŋga Joshua na u leele na sro kre chiin. 14 Israel leele pre na chia kre yirɛ chichiele, na pe yurɛ kro wru mu sɛ ta, la, pra leele pre kro gbo peii, pe n sra ndro nunu chom kuraa ti. 15 Imi na o Tafun Nyiɛkpɔɔ na yo u sumifun Moses pan kre, pan chɔɔ Moses na yo Joshua pan, a wra li u mayolo na, u nsra kee nyjɛ o Tafun Nyiɛkpɔɔ na yo Moses pan yire ka ti.

16 Joshua na u leele pre na wi mu chiɛ nyjɛ yiraa wa nyambie na, na shie nyjeeri haa, na nyjɛ yiraa wa nyambie na, na shie tapan yire kro shɔ. Yire na nyambie nyjɛ yiraa wa na shie yila to haa yire kro, na tablɔ tra ŋga kraa wa na shie nyjeeri haa kre, na Goshen tra kre kro, Jordan lɔɔ kre landɛɛ kre ni kro. 17-18 Mu yire nyua ŋga praa yeeri Halak, a kra mbra Seir na kre na, mu sɛ su Baal-Gad ŋga kraa wa Lebanon nyuɛ landɛɛ yire nu, na Hermon nyua ŋga kii wa na shie nyjeeri haa kre. Yire lawee nyjɛ nu Joshua na wi na pe ŋulo pre ni chiin mna pe ni mna sɛ pe gbo pei. 19 Leele mblɛ pre na Israel leele na yira ka na lɛ Hivite leele mblɛ praa wa Gibeon na kre. La, leele hamblɛ pre, wra pe gbo peii. 20 O Tafun Nyiɛkpɔɔ wre wra tia pre leele mblɛ na wi Israel leele ni, mbe u yire ki na mbe pe gbo peii, hali foorochiɛn wa pe ki nu, imi na wra yo Moses pan kre.

21 Kre nyjila kre nu chɔɔ Joshua na sɛ Anakim nanae mblɛ pra pe legbakrɛ kre gbo na. Pre leele pre, nyuɛ chiɛ yɛ na pra nyi. Yire chiɛ yire na yi Hebron, na Debir, na Anab, hali, pe mblɛ praa wa Judah na Israel nyuɛ chiɛ yire na kre kro, Joshua na pre na pe chiɛ yire kla peii. 22 Anak nanae pre wa nsra kro Israel leele pre tra nu, fɔna pe chiɛri mblɛ pra kro Gaza, na Gath, na Ashdod na kre.

23 Joshua na tra kre kro shɔ mu ta, imi na o Tafun Nyiɛkpɔɔ na yo Moses pan kre. Joshua na tra kre yɔɔlɛ mu Israel leele pre ŋga na pre titi wee yi, sele yire kro na ta, a wejinyiŋge na pan tra kre nu, a pe nsra ŋunɔ wi na.