Deborah Na Barak Na Mɛɛ Kɔ//Mu Nyiɛkpɔɔ Ŋga
5
Ŋga pra ŋunɔ kre wi mu kɔ kre, kre Deborah na Abinoam biblɔ Barak na kre mɛɛ ŋga kɔ mbo,2 “E ti mbe o o Tafun Nyiɛkpɔɔ
wre ŋga mboo,
Israel ŋunɔwifɛɛnlɛ na peyɛ kɔ
mu tɛɛ mbe sɛ wi,
a leele pre na yiri mu taa pe kro.
3 Yire ŋulo pre e ndie tɛɛ e loo,
yire mblɛ kɛɛ leele nyi e na le kre, e ndie tɛɛ.
Mbe mɛɛ kɔ mbe o Tafun
Israel Nyiɛkpɔɔ wre ŋga mɛɛ.
4 O Tafun Nyiɛkpɔɔ,
ŋga mna yili nyua Seir na,
ŋga mna yili tra ŋga nu
Edom leele na nyi mu tni kre,
tra na seeri, a nyiɛ na yiri nyjeeri
tloe nu mu wo tra.
5 Nyuɛ na seeri
o Tafun Nyiɛkpɔɔ wre yiɛ,
Nyiɛkpɔɔ ŋmba wraa wa
nyua Sinai na kre,
nyua na seeri u yiɛ.
6 Anath biblɔ Shamgar wre nyjila,
na Jael nyjila kre,
fiɛrɛ na tia leele nsraa
kokpɔɛ yire yiri na.
Kobɛɛlɛ yire na
kolo kunfɛɛnlɛ naa tro.
7 Leele na kɔ Israel chiɛ yire na,
ndro nsraa wa mna sɛ su
na ŋu Deborah na pan, mu pan
mu pe na Israel leele lo wi.
8 Ŋga Israel leele na sɛ sɛɛnlɛ sumi kre,
ŋunɛ wiire yira pan tra kre nu,
hali, ndro sra ŋunɔ wi juulee,
ndee chombo nya
Israel leele kagbenyi fuloe shiin pre nu.
9 Israel ŋunɔwifɛɛnlɛ pre yɛkulo pre,
na leele mblɛ pra peyɛ kɔ
mu tɛɛ mna sɛ wi pre,
kee wa ni loloŋgo na.
Kena e ti, mbe o o Tafun Nyiɛkpɔɔ
wre ŋga mboo.
10 Yire mblɛ e jiin bubunlɔ fimble na,
mbe pe sniyira chan krɛgɛ na e pan,
na yire mblɛ e nyaari tra kre kro,
e loo.
11 E loo, mɛkɔmblɔ plɛ mana yilii
kɔlɔe yire lawee,
na o Tafun Nyiɛkpɔɔ wre kaan mɛɛ,
na u wi mu yili,
pe mɛɛ koni na Israel leele wiire
ŋga pe wi mu yili kre kee yuu.
A ki tia o Tafun Nyiɛkpɔɔ leele
pre yili mu sɛ yire
chia kre jlonwee nyu na.
12 Deborah yiri, yiri mu yiɛklu,
Yiri, mɛɛ kɔ mu yiɛklu,
Abinoam biblɔ Barak yiri.
Sɛ na leele mblɛ mu wi
mu yii pre ni.
13 Bawa o Tafun Nyiɛkpɔɔ leele pre,
pe mblɛ pra kro kre na yiri,
pre na pe yɛkulo ni,
mna pan mu ya, a o na wi.
14 Pe plɛ na yiri Ephraim jlom nu,
a praa wa tra ŋga nu
Amalek leele na nyi
mu tni fa kre nu.
A Benjamin jlom leele
na pe loplombo na taa.
A ŋunɔwifɛɛnlɛ loplombo plɛ
na yiri Makir leele nu,
a plɛ na yiri Zebulun jlom nu.
15 Issachar jlom yiɛkulo pre
na pan mu ya Deborah na,
a pe hamblɛ pre na sɛ taa
Barak kro nyua landɛɛ kre nu.
La, Reuben jlom wolo pre jawala
na yili peyɛ yɛ,
pe nsra chin kee ŋga pie pe.
16 Mni a e yila e mbaala na
mu tii sɛɛ hin?
Mbaala lefɛɛnlɛ pre pan e na tni
na ndie chaan,
pra pe mbaala yeeri ree?
Ki pe yɛŋgɛ na Reuben jlom leele
pre na yɔɔlɛ,
pe nsra chin ŋga ki fna mbe pe pe.
17 Gilead jlom wolo pre na kro
Jordan lɔɔ kre yila finhaa wa.
A mni a Dan jlom leele pre na kro
pe epo krɔɛ yire jaara hin?
Asher jlom leele na kro mu tni
epo nyu na wa,
krɔ yire yirehaa wa pra kro mu tni.
18 La, Zebulun na Naphtali
jlom wolo pre,
pra peyɛ ndrɛ wa jenyje
mna sɛ wi ŋunɔ.
19 Canaan ŋulo na sɛ fni Taanach na.
Megiddo lafoelee yire lawee
pra sɛ wi,
la, pe nsra swafiŋge ta,
ndee mna yaka ta mu foolo.
20 Wɔɛlɛɛ na wi nyiɛ yiɛ na.
Ŋga wɔɛlɛɛ yire na klɔ nyjeeri kre,
na wii yi wii na ŋunu Sisera taanla.
21 Kishon lɔɔ kre na nyi mu pe fo mu sɛ.
Fawolo lɔɔ Kishon kre na yi.
Mbe faŋga ta, mbe nyaari
mbe kɛnyi wa kpɔɔ.
22 O na Sisera soolo yeŋgrɔɛ tiŋge loo,
na yi tini na shie.
23 Bawa o Tafun Nyiɛkpɔɔ wre
nyjeeri bituŋu wre na yo mbo,
‘E chia ŋga pe yeeri Meroz kre sun,
e ki leele sun kpɔɔ.
Ŋgi na hin?
Pe n yili mu sɛ ya
o Tafun Nyiɛkpɔɔ na,
pe n ya, a u wi na u loŋgoolo
faŋgafɛɛnlɛ pre ni.’
24 Ndro ŋmba pe dwan chiɛlɛ nu wi Jael,
Kenite ndro ŋmba pe yeeri
Heber wre chɔ,
wre pe dwamu yoŋgo nyuŋgo nu,
mu wɛ chiɛlɛ kro na.
25 Sisera naa nyumu chaa mbe gbɔ,
la, Jael na u ŋga nɔnɔ,
wra naara le gbɔyira chichie ka nu,
a wra gbɔ.
26 Wra kɛ tini mna yoŋgo nyuŋgo
kaan ŋga pe kani na ki yiri wru,
mna kalie kna mu hama wru,
mna Sisera ndra gbun na ki ni mu ja,
wra kaan kre kan u ndra na
mu mbra tra.
27 Wra juule u kosie na,
mna wra sni, bawa wra kro.
Jael yiɛ wra kro mu sni,
mna wra sni kre, bawa wra ku.
28 Sisera lo na yiɛ wɔ na le nyuŋgo
vromboo nu na yuu mbo,
‘Mni a Sisera mu ma ŋga hin?
Hali waa u sookɛɛ tiŋge loo.’
29 A Sisera lo wre,
na chlɔ ŋmba wra kala chin
chiɛlɛ mblɛ praa wa u jaara
pre nu wre, na kro na yuu mbo,
30 ‘Aada yirɛ pe ta mu foolo ŋunɔ
mu na yi yɔɔlɛ,
mu na chiɛlɛ mblɛ pe ta pre yɔɔlɛ
nununu na shiin shiin
na wifɛɛnlɛ pre kaan,
mu dodonyi chichiele nyjɛ pe ta
yire wru na Sisera kaan,
yire na dodonyi chichiele
nyjɛ nu pe yirɛ tin mu le,
na lagboe yirɛ chichiele titi ni.’
31 O Tafun Nyiɛkpɔɔ,
o nyiɛtalaa yi na,
mbe mu loŋgoolo kro ku
na Sisera wi,
la, mbe leele mblɛ pe mu kori pre
naa chiɛnri na yila ki yili.”
Kre kɔkro wejinyiŋge na pan Israel tra nu yɛlɛ fuloe shiin.