7 Ŋga Israel leele pre na yila Midian leele pre na, mna nyɛni mu o Tafun Nyiɛkpɔɔ wre yeeri kre, 8 a Nyiɛkpɔɔ na u kee nyanyofun tun a wra sɛ yo pe pan mbo, “Kee ŋga o Tafun Nyiɛkpɔɔ, Israel Nyiɛkpɔɔ wre yo yi kre, mi ndaa e wɔ mu yili e tnibim nu Egypt tra nu mu pan. 9 Mi ndaa e shɔ pɔɔrɔ na mu yili jaŋga ŋga kraa e lii Egypt tra nu kre kɛɛ. A ndaa leele mblɛ praa wa tra ŋga nu pre ni e yiɛ, mna pe tra kre wru mu e ŋga. 10 Ndaa yo e pan na mi wi e Tafun Nyiɛkpɔɔ wre, kena yaashia Amora leele mblɛ tra nu e nyi mu tni kre sɛɛnlɛ yire sumi, a e je e n ndie tɛɛ ni pan.”

11 Ki ble ka o Tafun Nyiɛkpɔɔ wre nyjeeri bituŋu wa na sɛ seechia ŋga praa yeeri Ophrah kre na, mna sɛ tni tiŋge kpɔɔ ka jaara. Kre tiŋge kre, Joash ŋmba wra yiri Abiezra katoo wre wo na yi. Kre nyjila kre na Joash biblɔ ŋmba praa yeeri Gideon wre wa mu ndra na yua gbuun simi fɛɛri ndoo ka nu, imi kie pe mbe Midian leele pre wa yi nya. 12 A o Tafun Nyiɛkpɔɔ nyjeeri bituŋu wre na uyɛ wɔ mu Gideon nyina mna yo u pan mbo, “Ŋunɔ wifun faŋgafun, o Tafun Nyiɛkpɔɔ wree wa mu kro.” 13 A Gideon na kna mbo, “Na o Tafun Nyiɛkpɔɔ wre naa wa o kro yɛŋgɛ, ŋgi ki tia kee nyjɛ krɛrɛ o da ŋga hin? O tolɛɛlɛ na yo o pan na o Tafun Nyiɛkpɔɔ wre na kawako kee tataara pe, mna pe wɔ mu yili Egypt tra nu. Fuŋgaami ŋga o Tafun Nyiɛkpɔɔ wre o je, mu o wru mu le Midian leele kɛɛ.” 14 A o Tafun Nyiɛkpɔɔ wre na kna mna yo u pan mbo, “Sɛ faŋga ŋga kii wa mu nu ŋga ni, mu sɛ wi mu Israel leele pre shɔ Midian leele pre kɛɛ. Mi ni mu tuni.” 15 A Gideon na kna mbo, “Ni Tafun Nyiɛkpɔɔ, mni mbe pe mbe jaa sɛ wi mbe Israel leele shɔ hin? Mi katoo leele nu faŋga n wa kuraa Manasseh jlom na, a ndro n ni le mu nya ni sele leele nu.” 16 A o Tafun Nyiɛkpɔɔ wre na kna mbo, “Mbe ya mu na mbe mu Midian leele pre kro gbo na ndro nunu mu kuu.” 17 A Gideon na kna mbo, “Ni Tafun Nyiɛkpɔɔ, na ni mu yiɛ nyi yɛŋgɛ wala, kena sɛmbɛɛrɛ kee ka pe mbe ni chin na ŋu titi mu paara ni pan. 18 Jande ni Tafun Nyiɛkpɔɔ maa shia sɛ, ni shie mbe ni paan mu ŋga sro tun.”

19 A Gideon na le katoo, mna sugbɔ pɔlɔ wa yii mna gbo mu sɔɔ, mna paanu mimi bɔtɔ nunu tɛɛ mna paanu ŋga nu yiisi n wa pe. Ŋga wra kɔ kre, a wra kaara yire chile mu le kakɛɛ nu, mna chiin yire le chɔ nu, mna pan mu o Tafun Nyiɛkpɔɔ wre ŋga yi yi tiŋge kre jaara wa. 20 A Nyiɛkpɔɔ nyjeeri bituŋu wre na yo u pan mbo, “Kaara yire, na paanu yire wɔ mu taa dnɛ kpɔɔ ŋga na, mu chiin yire kna mu wo yi na.” A Gideon na yi pe ma. 21 Kanyie ka naa wa nyjeeri bituŋu wre kɛɛ, a wra ki nyu tɛɛ mna kaara, na paanu yire su, a kanhun na nyi mna yili dnɛ kre nu mna kaara kre, na paanu yire sro putuu, to a bituŋu wre na fun u yiɛ na. 22 Ŋga Gideon na nya na o Tafun Nyiɛkpɔɔ wre nyjeeri bituŋu wi kre, a wra gble le mbo, “Ni Tafun Nyiɛkpɔɔ Jaŋgafun, ni mu nyjeeri bituŋu nya na ni nyibie ni.” 23 A o Tafun Nyiɛkpɔɔ wre na yo u pan mbo, “Muyɛ yii, maa fiɛ, ma ku.” 24 A Gideon na sragbunu sin wa o Tafun wre pan mna ki mɛɛ tɛɛ Nyiɛkpɔɔ pe Wejinyiŋgefun. Hali mu pan mu su aŋga na, kii wa mu yire Ophrah na mu pe Abiezer katoo wolo wo.

25 Kre ble kre blee, o Tafun Nyiɛkpɔɔ wre na yo Gideon pan mbo, “Sɛ mu lɛ nablɛm ŋmba u li yɛlɛ kɔɔnashin wɔ nagbɛɛ. Na mu kɔ mbe mu sɛ sɛɛn Baal sragbunu ŋga mu lɛ na sin kre juari mbe wo, mbe mu sɛɛn chlɔ Asherah kaan prɔɔrɔ ŋga kii kan ki mbɛɛ na kre chile mbe wo. 26 Na mu kɔ mbe mu dnɛ tɛɛ mbe sragbunu chiriri sin mbe o Tafun Nyiɛkpɔɔ wre ŋga kre kotum ŋga na. Mbe mu nablɛm wre gbo, mbe sɛɛn chlɔ Asherah kaan ŋga mu chile mu wo kre tɛɛ mbe nuu wre sro sragbunu kre na mbe mi Nyiɛkpɔɔ ŋga.” 27 A Gideon na u sumifɛɛnlɛ pre kɛ wru, mna kee ŋga o Tafun Nyiɛkpɔɔ na yo u pan kre pe. Wraa fiɛ u katoo leele na chia kre leele na, ki tia blee wra ki pe, u n na sro mu ki pe lafo na.

28 Ŋga nyiŋge na se a chia kre leele na yiri kre, pra nya na pe sɛɛn Baal sragbunu kre gbun mu juari, mu sɛɛn chlɔ Asherah kaan kre chile mu wo, mu sragbunu fɔŋgɔ sin mu sra wɔ ki na. 29 A leele pre na kna na peyɛ wie chaachaa mbo, “A ndro ŋmbi u kre kee ŋga pe hin?” A pra wie wie chiin mna kɔ mu loo na Joash biblɔ Gideon wre wra ki pe. 30 A chia kre leele na sɛ yo Joash pan mbo, “Pan na mu biblɔ wre ni mu o ŋga, ki fna o u gbo. Ŋgi na hin? O loo na wre u sɛɛn Baal sragbunu kre juari, mu sɛɛn chlɔ Asherah kaan kre chile mu wo.” 31 Imi na pra pnaŋa u na poŋgo ma kre, a Joash na pe wie mbo, “Baal ŋmbee e wii ndee mni hin? Yire ee paara mbe Baal ŋga ra? Ŋmba we wi mbe Baal ŋga kpan, nyiŋge naa yo kie se na ki ufun wre gbo. Na Baal chin na ki pe sɛɛn, a ki chin na ndro wa sɛ ki sragbunu juari kre, kena e ti mbe kre titi wi mbe kiyɛ ŋga.” 32 Mu yire kre ble kre, a praa Gideon yeeri Jerub-Baal. Ki nyina na, e ti mbe Baal titi wi. Ŋgi na hin? Joash na yo pe pan na, “Na Baal chin na ndro ki sragbunu juari wala, e ti mbe Baal titi wi na kifun ni.”

33 Kre nyjila kre Midian leele, na Amalek leele, na leele mblɛ praa wa yila finhaa lawee yire nu kro na pe ŋunɔwifɛɛnlɛ kro na chaa mna sɛ Jordan lɔɔ kre kun mna pe yonyi nyinyi kan Jezreel landɛɛ kre nu. 34 Bawa o Tafun Nyiɛkpɔɔ Ŋumu na pan mu le Gideon nu, a wra bnɔ fɔ mna Abiezer katoo wolo pre yeeri na pe paan taa u kro. 35 A wra leele tun Manasseh jlom kre pan, pre na Asher, na Zebulun, na Naphtali leele kro pan, a pe kro na pan mu ya u na.

36 A Gideon na yo Nyiɛkpɔɔ pan mbo, “Nyiɛkpɔɔ, na mu yire ni na mbe Israel leele shɔ imi na mu nyu yo ni pan kre wala, 37 kena mbe mbahlɛ tɛɛ tra shunshun ŋga na, na mɛŋɛ waa wo mu mbahlɛ kre chiin nyiŋge, a tra kre waa yuwa. Kena ni chin na mu yire ni na mbe Israel leele pre shɔ yɛŋgɛ, imi na mu ki yo kre.” 38 Kra pe ma yɛŋgɛ. Ŋga Gideon na yiri bnimi pupu, mna sɛ mbahlɛ kre yuwi mu le, a mɛŋɛ nyumu na wo, hali mna gbɔyira nyi. 39 A Gideon na yo Nyiɛkpɔɔ pan mbo, “Nyiɛkpɔɔ jande maa ti mbe mu krɔ kun na ni ni, ti mbe ni mu tali kee nunu ka na. Ni chaa mbe mbahlɛ kre tɛɛ mbe mu pe mbe le na. Ni chaa mbe mu ti mbe mɛŋɛ wo mbe tra yiɛ nyjii, mbe mbahlɛ kre ti.” 40 Ki ble kre blee, Nyiɛkpɔɔ na tia kra pe ma. Mbahlɛ kre chiin kra yuwa, a mɛŋɛ na wo mu tra yiɛ nyiŋge.