2 Bawa o Tafun Nyiɛkpɔɔ wre na yo Gideon pan mbo, “Mu wifɛɛnlɛ mblɛ kɛɛ mbe Midian leele pre le pre, pe nɛɛ ni pan titi. Imi kie pe mbe pia peyɛ kpɔɔ na pre titi faŋga ni pe wi mu peyɛ shɔ, mbe mi mɛɛ la kre ndra na, 3 ki kpali leele pre pan na, ndro ŋmba u fiɛ kpan u ndru mbe sɛ katoo, mbe e hamblɛ pre kro nyua Gilead na mna.” Ŋga kra pan ma kre, leele pre kagbenyi fulo na shiin na ndru mu sɛ katoo, a pra kro kagbenyi kɛ.

4 La, o Tafun Nyiɛkpɔɔ na yo Gideon pan mbo, “Leele pre wa mu nɛɛ tɛ. Kena sɛ na pe ni lɔɔ kre nu, bawa mbe pe yɔ mbe plɛ wɔ mbe mu ŋga. Na ni waa yo na ŋmba we ya mu na mbe e sɛ wi kre, ufun wre fna mbe sɛ, a na ni waa yo na ŋmba n fna mbe ka sɛ kre, ki n fna mbe ufun wre sɛ.” 5 A Gideon na sɛ na leele pre ni lɔɔ kre mbɛɛ na. Bawa o Tafun wre na yo u pan mbo, “Leele mblɛ pie nyu kan nyumu kre nu mbe gbɔ na nyikaanla lɛ pre le mu pe yoori peyɛ na, mu mblɛ pie kosie kan mbe kɛnyi tɛɛ mbe gbɔ pre yoori peyɛ na.” 6 Leele lafɛɛ taarɛ pra kɛnyi tɛɛ mu nyumu kre ko na ki lala na nyikaanla lɛ, a pe hamblɛ pre na nyu kan nyumu kre nu mu gbɔ. 7 A o Tafun Nyiɛkpɔɔ wre na yo Gideon pan mbo, “Leele lafɛɛ taarɛ mblɛ pe kɛnyi tɛɛ mu gbɔ kre, pre na mbe yire mbe ŋu na pre shɔ. Mbe Midian leele pre le e kɛɛ. Kena ti mbe pe hamblɛ pre ndru mbe sɛ katoo.” 8 A Gideon na tia Israel leele pre hamblɛ pre na ndru mu sɛ katoo, mna leele lafɛɛ taarɛ pre ti. A wra mblɛ praa shie pre sroe na pe bnɔɛ yire shɔ maa le mblɛ pra kro pre kɛɛ. Midian leele pre naa wa pe tapan haa landɛɛ kre nu.

9 Ki ble kre blee, o Tafun Nyiɛkpɔɔ na yo Gideon pan mbo, “E yiri e sɛ Midian leele pre tɔ pe tnihaa wa, mbe pe wru mbe le e kɛɛ. 10 A na fiɛrɛ mu yii naa, kena mu sumifun Purah wre wru mbe ŋu na wre pe brɛmm mbe sɛ Midian leele pre tnihaa wa. 11 Na e waa kaalɛɛ nyjɛ Midian leele pre yuu yire loo kre, kie ti mbe e gbun ta mbe sɛ pe tɔ.” A Gideon na Purah na ndra mna sɛ ja pe loŋgoolo pre mbookrɔ. 12 Na Midian leele pre, na Amalek leele pre, na yila finhaa wa leele pre kroo wa mu wo landɛɛ kre nu na kpatɔ lɛ. Pe nyuuma na nɛɛ na epo nyu tanyiɛ yi, a ndro wa jaa pe tɔɔnri.

13 Nyjila ŋga nu Gideon na da wa kre, na Midian blɔ wa u ŋunɛ nyjɛ wra ŋunu tɔɔnri u nunu wa pan mbo, “Ndaa ŋunɛ ŋnu mu paanu ka nya, a kra gbila mna pan o tnihaa mna, mna yoŋgo nyuŋgo ka sin mna ki kna mu chan kanyjuula.” 14 A u nunu wre na kna mbo, “Yaka ma mu nya kre, Israel ndro Gideon wre brɔfiɛn yiɛshiin yi. Ki nyina na Nyiɛkpɔɔ u wre Midian leele pre, na o tnihaa ŋga leele kro wru mu le u kɛɛ.”

15 Ŋga Gideon na loo imi na pra ŋunɛ yire nɔɔ nyina kre, a wra Nyiɛkpɔɔ ŋga mboo, mna ndru mna pan u wolo Israel leele pre tnihaa wa, mna pe fni mbo, “E yiri, o Tafun Nyiɛkpɔɔ wre Midian leele pre, na pe tnihaa kre leele wru mu le o kɛɛ.” 16 A wra u wifɛɛnlɛ lafɛɛ taarɛ pre yɔɔlɛ taarɛ, mna bnɔɛ le le pe kɛɛ, mna mɔɔlɛɛ mu mu le chɔɛ bɛɛlɛ bɛɛlɛ nu, a pra yi yii kɛɛ. 17 A wra yo pe pan mbo, “Na o waa da leele pre tnihaa wa, e na ni le, kee ŋga mbe pe kpan, mbe e ka pe. 18 Na o da wa kre, e ki fɛ e kun, kena na e waa loo na mi na ni wolo mblɛ pe taa ni kro kre o bnɔɛ yire fɔ kre, mbe e na e bnɔɛ yire foo na, mbra gble leni mbra yuu na, ‘E wi e o Tafun Nyiɛkpɔɔ, na Gideon ŋga.’”

19 A Gideon na leele lafaa mblɛ pra taa u na pre na da leele pre tnihaa wa nyu na, na ki kro chiɛri mbe ki gbun ndroo kɛmbɔshiin. Na ki nyjila kre pe pe tnihaa wa kre shiefun wre chinɛ. A praa pe bnɔɛ yire foo poŋgo, mna chɔɛ nyjɛ nu muɔɛnlɛɛ yire na nyi pe kɛɛ yire juari. 20 Feko taarɛ pre kro naa pe bnɔɛ yire foo poŋgo, mna chɔɛ nyjɛ yiraa wa pe kɛɛ yire juari, mna mɔɔlɛɛ yire, na bnɔɛ yire wɔ mu yii, na gble leni na yuu mbo, “E brɔfiɛn yiɛshiin yire tɛɛ e wi e o Tafun Nyiɛkpɔɔ na Gideon ŋga.” 21 Israel leele pre na yire mu Midian leele pre tnihaa kre fɛ mu kun, a Midian leele pre naa gble leni na nyɛni na feni na shie. 22 Kena ŋga Israel leele pre naa pe bnɔɛ lafɛɛ taarɛ yire foo ma kre, o Tafun Nyiɛkpɔɔ wre na tia pe loŋgoolo pre na kna mu na peyɛ kuu pe brɔfiɛnlɛ yiɛshiin yire ni. Pra mɔŋɔ mu kna mu yiɛ le Beth-Shittah na, na shie Zererah na, hali mna sɛ da Abel Meholah sam na mu mbra Tabbath na.

23 Gideon na leele tun Naphtali, na Asher, na Manasseh jlom leele pan a pra yiri mna Midian leele pre kɔŋgɔ ni. 24 Gideon na leele tun a pra sɛ Ephraim leele mblɛ pee wa nyambie lawee yire nu pre pan mbo, “E pan mbe o wi na Midian leele pre ni. E Jordan lɔɔ kre, na lafoelee nyjɛ yii wa mu sɛ su Beth-Barah na yire le, mbe Midian leele pre wa jaa yi kun.” A Ephraim jlom wolo pre kro na yili mna sɛ Jordan lɔɔ kre, na lafoelee nyjɛ yiraa wa mu sɛ su Beth-Barah na yire kro shɔ mu ta. 25 Pra Midian ŋulo shiin Oreb na Zeeb yii, mna Oreb gbo dnɛ kpɔɔ ŋga praa yeeri Oreb kre na, mna Zeeb gbo simi fɛɛri ndoo ŋga praa yeeri Zeeb kre nu. Pra Midian leele pre kɔŋgɔ ni, ŋga pra ndru na paan kre, a pra pan na Oreb na Zeeb ndrɛ ni mna Gideon ŋga, na uu wa Jordan lɔɔ kre mbɛɛ na.