2 A Gideon na yo pe pan mbo, “Yaa ti mbe ki e tɔɔra, kee ŋgi ni ja mu pe a ki wɛ ŋga e pe na hin? Chiɛri ŋga ŋu na mu leele pan mu pe ŋga kuraa kpɔɔ mu wɛ kee ŋga mi na ni katoo wolo pe na. 3 Nyiɛkpɔɔ Midian ŋulo shiin, Oreb na Zeeb pre le e kɛɛ. Na mu kre kee ŋga e pe ŋga le, mu chin na mi n yaka pe.” Ŋga wra kre kee ŋga yo to, a pe krɔ na nyjii.

4 Gideon na u leele lafɛɛ taarɛ pre na fna titi, a nde pra je mna Midian leele pre ni mna sɛ Jordan lɔɔ kre kun. 5 Ŋga pra da chia ŋga praa yeeri Succoth na kre, a wra yo chia kre bilɛ pan mbo, “E ni wifɛɛnlɛ mblɛ ŋga paanu yɛ mbe pe ka, pe pra pra, a oo wa na Midian ŋulo Zebah na Zalmunna kɔŋgɔ nini mbe pe yii.”

6 A Succoth loplombo pre na kna mbo, waa jaa mu leele pre ŋga sro. Fuŋgaami ŋga o n chin tun, na ee ja mbe Zebah na Zalmunna yii. 7 A Gideon na kna mbo, “E tni mna, na o Tafun Nyiɛkpɔɔ wre waa Zebah na Zalmunna yii mu le ni kɛɛ, a ndaa ndru na paan, tablɔ tra wuuro na ki mbrambra kɛɛn ni mbe e gbun mbe pile.” 8 Ŋga wra yiri wa kre, a wra sɛ chia ŋga pe yeeri Peniel kre leele pan, mna sɛ pe tali sro mbe u leele pre ŋga. Kee ŋga Succoth leele pre na yo kre chɔɔ pre na yo na. 9 A wra yo Peniel leele pre pan mbo, “Na ni waa sɛ wi mu yili soo na paan, na ndaa da mna mbe e nyuŋgo gedeŋge ŋga juari mbe wo.”

10 Kre nyjila kre na Zebah na Zalmunna wa chia ŋga pe yeeri Karkor kre na, pre na yila finhaa wa ŋunɔwifɛɛnlɛ kagbenyi kɛmbɔkunɔ mblɛ pra kro pre ni. Midian ŋunɔwifɛɛnlɛ mblɛ pra to ŋunɔ pre naa kagbenyi lafaa na fulo. 11 A Gideon na kolo ŋga kra tro tablɔ tra kre nyu na, mna sɛ tro Nobah, na Jogbehah yila finhaa wa kre yii, mna sɛ Midian wifɛɛnlɛ pre tɔ, a kra pe fo. 12 Midian ŋulo shiin pre, Zebah na Zalmunna na yiri na feni, a Gideon na pe kɔŋgɔ ni mna sɛ pe yii, a kra tia pe ŋunɔwifɛɛnlɛ pre na fɛ mu nyina.

13 Ŋga Gideon na ndru na paan katoo kre, a wra tro lawee ŋga pe yeeri Heres kre kolo na, 14 mna Succoth nyanyjɛble wa yii kolo wa, mna u wie a wra Succoth chia kre loplombo fuloe taarɛ na kɛmbɔkɔɔnashin mɛɛ nyunɔ mu u ŋga. 15 A Gideon na sɛ yo chia kre loplombo pre pan mbo, “E sɔɔnri na ŋga o na da mna, ndaa e tali sro mbe ni ŋunɔwifɛɛnlɛ mblɛ pra fna pre ŋga, a e na je, mna yo ni pan na, ‘Na mu n ja mu Zebah na Zalmunna ta mu yii tun.’ Pre lɛ kre rɔ” 16 A Gideon na u wuuro fwa wɔ, mna Succoth loplombo pre frɔ imi na ki fna. 17 Ŋga wra da Peniel na kre, a wra pe nyuŋgo gedeŋge kre juari mu wo, mna chia kre bilɛ gbo kro.

18 Bawa wra Zebah na Zalmunna wie mbo, “Leele mblɛ nyini e na gbo chia ŋga pe yeeri Tabor kre na hin?” A pra kna mbo, “Pan pra nyi na ŋu wi, pe kro na pe na ŋunu biile lɛ.” 19 A Gideon na kna mbo, “Ni lɛ, na ni lo biile na lɛ. Ŋga o Tafun Nyiɛkpɔɔ wa ŋga, na e nsra pe gbo, mbe na e ti, mba na e gbo.” 20 Bawa wra kna mna yo u pɔ lopom Jether pan mbo, “Pe gbo fuŋgaami,” La, Jether nsra u brɔfiɛn yiɛshiin kre tini mu foli, ŋgi na hin? Pɔ na wi ki tia wraa fiɛ. 21 A Zebah na Zalmunna na kna mbo, “Ŋu titi pan mu o gbo, imi na blɔ nyi, pan u faŋga da.” A Gideon titi na pe gbo, mna swanyiɛ jlɔnyi nyjɛ pra le le pe nyuuma lagboo yire wɔ.

22 Ŋga kre ŋunɔ kre nyu na to kre, a Israel leele pre kro na yo Gideon pan mbo, “Pe o ŋunu, na mu n wa, mbe mu biile, na mu nanae na jɔɔn kre lii. Ŋgi na hin? Ŋu mu o shɔ mu yili Midian leele kɛɛ.” 23 A Gideon na kna mna yo pe pan mbo, “Mba pe e ŋunu, a ni pɔ wa wa jaa pe e ŋunu, o Tafun Nyiɛkpɔɔ wre chiin wi e ŋunu.” 24 A Gideon na kna mbo, “Kee nunu ka ni chaa mbe e tali, ni chaa mbe e ni ŋga ndiile yirɛ nyjɛ e na foolo mu ta ŋunɔ yire nununu.” Midian leele pre naa swanyiɛ ndiile yirɛ leni. 25 A pra kna mbo, “Ki tna o pan na oo mu ŋga yi yi.” A pra yoŋgo chan tra, a leele pre na ndiile yirɛ nyjɛ pra ta ŋunɔ yire woni nununu na waari ki na. 26 Ndiile yirɛ nyjɛ wra ta ki ble kre snamu na da kradnɛ fuloe shiin na ki kro. Swanyiɛ yirɛ, na lagboo jlɔnyi, na yonyi nyiɛ duu dodonyi nyjɛ Midian ŋulo naa leni, na yirɛ chichiele nyjɛ ŋulo pre na le le pe nyuuma lagboe yire n sra chaa. 27 A Gideon na swanyiɛ yire yɛ tɛɛ mna yira ka pe na srawɔfun dodoŋgi yi, mna sɛ ki tɛɛ u chia Ophrah na. Ŋga kra pan ma kre, Israel leele pre kro na laa Nyiɛkpɔɔ kro, mna sɛ na kre yira kre sumi, a kra Gideon na u sele leele le penlee nu.

28 Nyjila ŋga nu Gideon naa ŋmaa ni kre, Israel leele na Midian leele pre ja, a pe kee nsraa fiɛrɛ ni pe pan na, kra tia wejinyiŋge na pan tra kre nu yɛlɛ fuloe shiin, mna sɛ su na Gideon na ku. 29 Gideon na sɛ tni u chia Ophrah na wa. 30 U bibilɛ naa fuloe taarɛ na kɛ, ŋgi na hin? U chiɛlɛ na nɛɛ. 31 Wraa wa na bichrɔ wa ni Shechem na, a wre na wre na biblɔ se, a wra u ŋga mɛɛ Abimelech. 32 Gideon na lɛ blɛlɔɔ mna chin mu ku, a pra u le u lɛ Joash faŋga, Abiezer katoo leele tra nu Ophrah na.

33 Ŋga Gideon na ku kre, ki nsra mu, a Israel leele pre na ndru mna sɛ na sɛɛn Baal sumi. Pra sɛɛn Baal-Berith pe na ki sumi. 34 Hali pe nsra pe Tafun Nyiɛkpɔɔ ŋmba wra pe shɔ pe loŋgoolo kɛɛ kooloe tataara nu kre sɔɔnri. 35 Yire kee nyjɛ krɛrɛ kɔkro ni kre, Israel leele pre na ayɛte, kee tataara nyjɛ Gideon na pe mu pe ŋga yire krɛrɛ nu, pe nsra nyu u sele leele na.