Joshua 24

Joshua Na Pre Na Paara Haŋa

Joshua na Israel leele pre, na pe loplombo, na pe yɛkulo, na pe kalalifɛɛnlɛ, na mblɛ praa wa mu yire pe tnumu nyu na kro yeeri, a pra pan mu fni Shechem na, o Tafun Nyiɛkpɔɔ yiɛ. 2 A Joshua na yo pe pan mbo, “Kee ŋga o Tafun, Israel leele Nyiɛkpɔɔ wre yuu yi kre, ‘Fa kre, ŋga e tolɛɛlɛ pre naa wa Euphrates lɔɔ kro wa kre, sɛɛnlɛ praa sumi, hali Terah, Abraham na Nahor lɛ wre nyjila, sɛɛnlɛ yire praa sumi. 3 La, ndaa e tolɛɛ Abraham yii kɛ na, mna u wɔ tra kre nu, mna yiɛ klu u pan, mna yili na u ni Euphrates lɔɔ kro tra kre nu, mna nyaari na u ni mu tro Canaan tra kre nu, mna u ŋga nanae tataara. Ndaa u ŋga Isaac, mna Isaac ŋga Jacob, na Esau. 4 A ndaa nyuɛ lawee ŋga praa yeeri Seir kre wru mu Esau ŋga. La, Jacob na u bibilɛ na sɛ tni Egypt tra nu. 5 Mbakɔ kre, ndaa Moses, na Aaron tun e tolɛɛlɛ pre pan Egypt tra nu wa, mna tia Egypt leele pre na kala nya kpɔɔ. La, ndaa e tolɛɛlɛ pre wɔ soo mu yili Egypt tra nu. 6 Ŋga ndaa pe wɔ Egypt tra nu kre, pra sɛ da epo nyiɛ kre nyu na. A Egypt leele pre na pe kɔŋgɔ ni na soolo, na sookɛɛ ni, mna pan mu pe da epo kre nyu na. 7 A e tolɛɛlɛ pre na nyɛni mu ni yeeri, a ndaa tia wɔmu ka na pan mu le pre na Egypt leele pre lalaa. A ndaa tia epo kre na pe li peii. E na kee ŋga kra Egypt leele pre da kre nya nyini ni. A e na tni tablɔ tra kre nu mu mu.

8 A ndaa pan na e ni Amora leele tra ŋga kraa wa Jordan lɔɔ yila finhaa kre nu, a pra yiri mna wi na e ni. La, ndaa pe le e kɛɛ, mna pe kla e pan, a e na pe tra kre shɔ mu tni. 9 Ŋga Zippor biblɔ Balak ŋmba na wi Moab tra ŋunu wre na yiri mbe wi na e ni kre, wra Boer biblɔ Balaam wre tun na u sɛ yire Israel leele sun. 10 La, mi Nyiɛkpɔɔ nsra u ŋga kolo, ŋga wra yo we e sun kre, dwan wra kɔ na dwan na e kaan. Ndaa e shɔ mu yili Balak kɛɛ.

11 E na yiri wa mna sɛ Jordan lɔɔ kre kun, mna to Jericho na. Leele mblɛ praa wa wa pre na wi na e ni. Pan chɔɔ Amora, na Perizzite, na Canaan, na Hittite, na Girgash, na Hivite, na Jebusite, leele pre na wi na e ni, a ndaa pe kro le e kɛɛ, a e na wi mu pe ja. 12 Ndaa tia fiɛrɛ na e loŋgoolo yii, a pra fɛ e yiɛ. Pan chɔɔ, ndaa Amora ŋulo shiin pre le e kɛɛ. Yire titi bɛnyi, na e snimi, na e brɔfiɛn yiɛshiin ni ma e na pe ja. 13 Ki tia ndaa e ŋga tra, a yire titi ma e na fna mu ki ta. Yire na kakpɔɛ nyjɛ yire titi ma e na sin, e na yi ta mu tni, mna sro, na olive simi ta na lii seele nyjɛ yiri titi n na luu nu.’”

14 A Joshua na ndru mu yo pe pan mbo, “E o Tafun Nyiɛkpɔɔ wre fiɛ, e u sumi kpra ni. E sɛɛnlɛ nyjɛ e tolɛɛlɛ na sumi Euphrates lɔɔ kre kro, na Egypt tra nu yire wa, e o Tafun Nyiɛkpɔɔ wre chiin sumi. 15 La, na e n na chaa mbe o Tafun Nyiɛkpɔɔ wre sumi kre, kena e ŋmba ee sumi haa cha aŋga. Na sɛɛnlɛ nyjɛ e tolɛɛlɛ pre naa sumi Euphrates lɔɔ kro wa kre ee sumi, ndee na Amora leele mblɛ tra nu e nyi ŋga sɛɛnlɛ yire ee sumi naa, e ŋga e chaa wɔ. La, mi na mi katoo leele rɛ, o Tafun Nyiɛkpɔɔ wre oo sumi.”

16 A leele pre kro na kna mbo, “Nyiɛ we o kisi na oo laa o Tafun Nyiɛkpɔɔ wre kro, mbe sɛ sɛɛnlɛ sumi. 17 O Tafun Nyiɛkpɔɔ wre titi wra wre na o tolɛɛlɛ pre wɔ mu yili pe tnibim nu Egypt tra nu, a o na kawako kee nyjɛ wra pe yire kro nya nyini ni. Wra kɛ tɔ o na, o kolo kɔɔn kre nu. A o na nyaari mu tro waŋgrɛ nu, a yaka nsra o ta. 18 A ŋga o naa paan kre, o Tafun Nyiɛkpɔɔ wre na waŋgrɛ yire leele kro ni o yiɛ, hali Amora leele mblɛ praa wa tra ŋga nu pre, wra pe ni. Kena wre, o Tafun Nyiɛkpɔɔ wre chɔɔ oo sumi, ŋgi na hin? Wre wi o Nyiɛkpɔɔ.”

19 A Joshua na kna mu yo Israel leele pre pan mbo, “O Tafun Nyiɛkpɔɔ wree cheche, a u pe Nyiɛkpɔɔ yenyjamfun. Ni chin na yaa jaa u sumi imi na u chaa. Kena na e waa ndikana pe, maa sisam pe, wa ki ti mbe kɛ. 20 Na e waa laa o Tafun Nyiɛkpɔɔ wre kro, maa sɛ taa sɛɛnlɛ kro, we e ndie tini, mbe e kla, nde kii wa na u da mu nyu e na.”

21 A leele pre na kna mna yo Joshua pan mbo, “Kpra o yuu mu pan kre, O Tafun Nyiɛkpɔɔ wre oo sumi.” 22 A Joshua na kna mbo, “Yire lɛ eyɛ dansiɛfɛɛnlɛ na e yo na O Tafun Nyiɛkpɔɔ wre ee sumi.” A pra kna mbo, “Ɛnhɛɛn, o ki nɔɔloo.”

23 A Joshua na kna mbo, “Kena e sɛɛnlɛ nyjɛ yii wa e pan yire waari, e kna e pan e taa o Tafun Israel Nyiɛkpɔɔ wre kro lɛɛ nunu ni.”

24 A leele pre na kna mu yo Joshua pan mbo, “Oo O Tafun Nyiɛkpɔɔ sumi, mbe li u nyu kee na.”

25 Ki ble kre Joshua na yire mna tia leele pre na Nyiɛkpɔɔ na nyu nunu pe Shechem na, a wra pe ŋga Nyiɛkpɔɔ mbra nyjɛ na ki fna pe taa yire. 26 Wra mbra yire kro nyunɔ Nyiɛkpɔɔ mbra hlɛ yire nu, mna tia pra dnɛ badaaŋga ka gbila mu tɛɛ tiŋge badaaŋga ka jaara o Tafun Nyiɛkpɔɔ Suminyuŋgo cheche kre mbɛɛ na, mbe ki pe dansiɛrɛ yira. 27 A Joshua na kna mna yo leele pre pan mbo, “E le, dnɛ ŋga yi o kro dansiɛrɛ yira. Kee nyjɛ o Tafun Nyiɛkpɔɔ wre yo o pan yire kro, dnɛ ŋga yi loo kro. Kena na e waa fɛ mu laa e Nyiɛkpɔɔ wre kro kre, kie dansiɛrɛ li mbe e taan.”

Joshua Kumu

28 A Joshua na leele pre wa kolo, a pra ndru mu sɛ pe tnihɛɛ nu. 29 Yire kee nyjɛ kɔkro kre, Nun biblɔ Joshua, o Tafun Nyiɛkpɔɔ sumifun wre na u li yɛlɛ lafaa na kɛ. 30 A pra u le wre titi chia ŋga pra yeeri Timnath-Serah kre na, kraa wa Ephraim nyambie lawee yire nu, na shie nyua ŋga praa yeeri Gaash kre nyjeeri haa.

31 Nyjila ŋga ni Joshua naa wa ŋmaa ni kre, Israel leele pre naa Nyiɛkpɔɔ sumi. A u kum kɔkro chɔɔ, pra Nyiɛkpɔɔ sumi, mna sɛ su na pe loplombo mblɛ pra kee nyjɛ o Tafun Nyiɛkpɔɔ na pe yire nya nyini ni pre na ku mu kɔ. 32 Ŋga Israel leele pre na yili Egypt tra nu kre, pra Joseph kajle wɔ, mna sɛ na yi ni Shechem na, mna sɛ yi le tra ŋga Jacob na lɔ swafinyi lafaa kre nu. Wra kre tra kre lɔ blɔ ŋmba wra chia kre pɔ, a praa u yeeri Hamor wre nanae pan. Kre tra kre kɔ mu pe Joseph nanae tra.

33 Aaron biblɔ Eleazar wre na ku, a pra u le u biblɔ Phinehas tra ŋga pra u ŋga nu Gibeah na, kraa wa Ephraim nyambie lawee yire nu.