Joshua Klaa
23
O Tafun Nyiɛkpɔɔ na tia Israel leele pre na wuu pe loŋgoolo mblɛ pra fɛ mu pe kun pre kɛɛ nyjila tataara nu. A Joshua na kɔ mu lɛ blɛlɔɔ titi. 2 Ki ble ka wra kɛ wa mu Israel leele pre loplombo, na pe yɛkulo, na pe kalalifɛɛnlɛ, na mblɛ praa wa pe tnumu nyu na kro yeeri, mna yo pe pan mbo, “Fuŋgaami ni lɛ blɛlɔɔ, mu da kumu na. 3 Yire titi nya imi na o Tafun Nyiɛkpɔɔ wre wi na waŋgrɛ yire ni mu e ŋga, a kee nyjɛ u pe e ndra na yire kro, e yi nya. 4-5 Waŋgrɛ yire yɛɛ wa tɛ, la, o Tafun Nyiɛkpɔɔ wre nyu yo e pan na we e ŋga pe trɛ yire. Kena na e waa wi na pe ni, we ti mbe pe fɛ e yiɛ. Ni klu mu pe trɛ yire yɔɔlɛ mu e jlom yire ŋga, imi na ndaa trɛ nyjɛ o na wi mu shɔ Jordan lɔɔ na Mediterranean epo yire lalaa trɛ yire pe kre. 6 Kena e faŋga ta, e le na ee li kee nyjɛ pe nyunɔ Moses mbra hlɛ yire nu mu tɛɛ yire kro na, wa waa shia kna mbe le kalie ndee kamɛŋɛ.7 Yire na waŋgrɛ nyjɛ yi kro yire leele waashia pe nunu, a yaa shia nyɛni mbe pe sɛɛnlɛ yire mɛɛ yeeri, ndee mbe yi da, ndee mbe lɛɛlɛ mbe yi sumi. 8 La, e na kpra lii e na o Tafun Nyiɛkpɔɔ wre kaan, imi na e pini nyjila kro nu kre.
9 O Tafun Nyiɛkpɔɔ wre na faŋgafɛɛnlɛ, na jaŋgafɛɛnlɛ ni e yiɛ. Pe wa nsra ja mu yire e yiɛ mu pan mu su aŋga na. 10 Ndro nunu chom we yiri e nu mbe jaa ti leele kagbeŋge fɛ e yiɛ, ŋgi na hin? O Tafun Nyiɛkpɔɔ u wii na e kaan, imi na wra u nyu yo e pan kre. 11 Kena e eyɛ le chichie, e e Tafun Nyiɛkpɔɔ wre kori.
12 La, na e waa laa u kro, maa sɛ pe nunu na waŋgrɛ nyjɛ yi kro yire leele ni, a yire na pre waa eyɛ leŋge, a yire na pre waa nɔɔlɔ wru, 13 kena e shɔ e li na, o Tafun Nyiɛkpɔɔ wre wa e loŋgoolo pre ni e pan na. La, pan pie pe e nu na pɛlɛ yi, mbe pe na fwɛ, na wuuro yi e nu, mbe ti e kala nya, mbe sɛ su na ee ku mbe kɔ tra chichie ŋga o Tafun Nyiɛkpɔɔ wre e ŋga kre nu.
14 E le, ni nyjila da mbe ni ku mbe ni tolɛɛlɛ kɔŋgɔ ni, a yire titi chin kain na, kee chiriri nyjɛ o Tafun Nyiɛkpɔɔ na yo, na we pe mbe e ŋga yire kro, u n ka ti, u yi pe peii, u n nunu chom kuraa ti. 15 La, imi na wra chichie pee nyu yo e pan kre, pan chɔɔ we jaa ti mbe e sisam kanyana nyjɛ kee u yo na yie e nya yire tuu e na, mbe sɛ su na ee ku mbe kɔ tra taan ŋga u e ŋga kre nu. 16 Na e waa o Tafun Nyiɛkpɔɔ wre nyu nunu ŋga wra pe na e ni kre je, maa sɛ sɛɛnlɛ yire sumi kre, u krɔ we kun na e ni, mbe u e gbo nyaanyaa mbe yili tra taan ŋga u e ŋga kre nu.”