Jlom Nyjɛ Yiraa Wa//Na Shie Yila Finhaa
22
Joshua na kɛ wa mna Reuben jlom, na Gad jlom, na Manasseh jlom yɔɔ ŋga kraa wa na shie yila finhaa wa kre leele yeeri, 2 mna yo pe pan mbo, “E ja mu li kee nyjɛ o Tafun Nyiɛkpɔɔ sumifun Moses na yo e pan yire kro na, mu ja mu li ni nyu kee ŋga ndaa yo e pan kro na. 3 Hali mu pan mu su aŋga na, e n laa eyɛ kro. E ja mu li e Tafun Nyiɛkpɔɔ wre nyu kee na. 4 Imi na wra yo kre, u e wolo pre ŋga wejinyiŋge kolo kro na, kena e ndru e sɛ tni tra ŋga o Tafun sumifun Moses na e ŋga Jordan lɔɔ kre yila finhaa wa kre na. 5 E le na ee li mbra nyjɛ Moses na e ŋga yire kro na. Wra yo e pan na, e e Tafun Nyiɛkpɔɔ wre kori, e na ŋga u chaa pini. E li u nyu kee na, e na kpra lii u yiɛ, e na u sumi na lɛɛ nunu ni.”6-8 A Joshua na dwan mna pe ŋga mna pe wa kolo, a pra ndru mu sɛ pe tra nu. Wra yo pe pan mbo, “E kɛ nyu, a e na shie katoo, ŋgi na hin? E katoo yurɛ ta, mu swanyiɛ, na swafiŋge, na yaawa, na tɔɔnrɔ, na yonyi ni tataara. Kena yirɛ nyjɛ e ta e loŋgoolo pan yire, yire na e wolo mblɛ pee wa katoo pre, e sɛ yi yɔɔlɛ.” Ŋga pra paara mu kɔ kre, a pra to kolo na shie pe tnihaa wa. Na Moses klu mu Manasseh jlom yɔɔ kre ŋga tra Jordan lɔɔ kre yila finhaa, la, Manasseh jlom yɔɔ haŋa kre rɛ, Joshua na pre ŋga tra Jordan lɔɔ kre yilatohaa, na shie lawee ŋga nu wra jlom hɛnyi yire ŋga trɛ kre.
9 Ŋga kra pan ma kre, Reuben, na Gad na Manasseh jlom yɔɔ ŋga kraa wa na shie yila finhaa kre na to kolo, mna sɛ katoo. Pra Israel leele pre hamblɛ ti Shilo na, Canaan tra kre nu wa, mna sɛ Gilead na, pre titi tra nu. Tra ŋga o Tafun Nyiɛkpɔɔ na tia Moses na pe ŋga kre na.
Pra Sragbunu Sin//Jordan Lɔɔ Mbɛɛ Na
10 Reuben, na Gad, na Manasseh sele yɔɔ kre, na sɛ da Geliloth ŋga kraa wa Canaan tra nu kre na, a pra sragbunu chichie badaaŋga ka sin Jordan lɔɔ kre mbɛɛ na.
11 A leele plɛ na pan mu yo Israel leele hamblɛ pre pan mbo, “E le, Reuben, na Gad, na Manasseh jlom yɔɔ wolo pre sɛ sragbunu sin Geliloth, Jordan lɔɔ kre kokoo ŋga na mna.” 12 Ŋga Israel leele hamblɛ pre na kee ŋga pe wolo pre pe kre loo kre, a pe kro na sɛ fni Shilo na, mna peyɛ kna mbe sɛ wi na pe ni.
13 Ŋga pra fni kre, a pra srawɔfun Eliezer biblɔ Phinehas wre wɔ mu tun Reuben, na Gad, na Manasseh jlom yɔɔ kre leele pre pan Gilead tra nu. 14 Jlom kɛ nyjɛ yiraa wa Shilo na wa yire na loplombo kɛ wɔ mna ya Phinehas na, 15 a pra sɛ Reuben, na Gad, na Manasseh jlom yɔɔ pre fni Gilead tra nu, mna yo pe pan mbo, 16 “O Tafun Nyiɛkpɔɔ leele pre kro pe fni mu o wɔ mu tun, na o paan e wie na, mni a e ayɛte o Tafun Nyiɛkpɔɔ wre na ma hin? E krɔ kna mu wa Nyiɛkpɔɔ na, mu sragbunu sin eyɛ pan, mu yiri mu o Tafun Nyiɛkpɔɔ wre taan. 17 E n o sisam ŋga o na pe Peor na kre sɔɔnri ra? Imi na o Tafun Nyiɛkpɔɔ wre na tia yira sisaa na pan mu le o nu, mna o tataara gbo. Hali oo wa na ki kanyana nyaa tɛ. Kena kre sisam kre n o da tun ra? 18 Kena e fɛɛ to, mu laa u kro ra? Na e ndikana pe o Tafun Nyiɛkpɔɔ wre na aŋga, baŋga u krɔ we kun na o kro ni. 19 Na e le na e tra kre n fna mbe e Nyiɛkpɔɔ sumi ki nu kre, kena e kun e pan o tra ŋga nu o yoŋgo nyuŋgo kan o Tafun Nyiɛkpɔɔ pan kre nu, e pan e tni e chaa o nu. La, yaa tni mna mbra ndikana kee pini o Tafun Nyiɛkpɔɔ wre, ndee o na, mbe sragbunu fɔŋgɔ sin eyɛ pan, mbe Nyiɛkpɔɔ wo kre ti. 20 E sɔɔnri imi na Achan, Zerah nana wre na ndikana pe, mna yirɛ nyjɛ o Tafun Nyiɛkpɔɔ wre na yo pe sɛ kla yire yɛ wru, a kra tia Israel leele kro na ndie tiniɛ ta. Achan nunu ma wra ku u sisam kre tlo.”
21 A Reuben, na Gad, na Manasseh jlom yɔɔ kre na kna mu yo Israel loplombo pre pan mbo, 22 “Jaŋgafun wi, O Tafun Nyiɛkpɔɔ wre, wre wi o dansiɛfun, ŋgi na hin? Na ndikana kee o pe, ndee na o ayɛte u na mu kre sragbunu ŋga sin kre, wre u ki chin. Kena na yɛŋgɛ yi na pan o pe kre, waashia o ti aŋga. E ti mbe o ŋga ki tia o kre sragbunu ŋga sin yo e pan mbe e loo. 23 Kee ŋga o yuu kro yi kre, na o waa kala fnɛ, Nyiɛkpɔɔ u o ndie tini. Ki n pe na siin o ki sin mbe yire ki na mbe krɔ kna mbe wa Nyiɛkpɔɔ na, ndee mu ki sin mbra yurɛ, na shɔlɔ sra woni ki na, mbe ki ti Nyiɛkpɔɔ yiɛ shɔ o na, mbe u o dwan. 24 Ŋga na o yila mu ki sin yi kre, o kawa na, aada brikana e nanae we yo o nanae pan na, 25 o Tafun Nyiɛkpɔɔ wra Jordan lɔɔ kre pe wre na yire lalaa sam, kena pe n pe Nyiɛkpɔɔ wre leele, mbe ki kɔɔ ti pe u sumiɛ ti. 26 Kre ki tia o kre sragbunu ŋga sin. O n ki sin mbra yurɛ sroi, ndee mbra shɔlɔ sra woni ki ni na. 27 La, o ki sin mbe kraa wre, na yire, na o kro nanae mblɛ pie kɔɔ yiri mbakɔ pre sɔɔnri na ki fna, mbe o Nyiɛkpɔɔ sumi u yoŋgo nyuŋgo kre nu, mbra yurɛ sroi wa mbra u kaan, mbra shɔlɔ na wejinyiŋge sra woni mbra u kaan. Kena na pe ki nya ma kre pia kɔɔ yo o nanae pan na, o Tafun Nyiɛkpɔɔ wre sumifɛɛnlɛ ma. 28 Kena o jawa na na o ki pe ma, a e nanae pre waa kɔ mu kee ka yo ma kre, o nanae pre we kee ka ta mbe pe nyu wɔ mbe yo na, ‘E le, o tolɛɛlɛ pre na sragbunu sin, a kra pe na o Tafun Nyiɛkpɔɔ wo kre yi. La, sra ma praa woni ki na, kena o na ki sin mbe ki pe sɛmbɛɛrɛ yira, mbe wre na yire ŋga.’ 29 Nyiɛ we o kisi na oo laa o Tafun Nyiɛkpɔɔ wre kro, mbe ndikana kee pe, mbe sragbunu fɔŋgɔ sin mbra yurɛ sroo, na shɔlɔ, na wejinyiŋge sra woni ki na, mbe ya o Tafun Nyiɛkpɔɔ wre sragbunu ŋga kii wa mu yire u yoŋgo nyuŋgo yɛsimi kre na.”
30 Srawɔfun Phinehas, na loplombo kɛ pre pra tun pre na kee ŋga Reuben, na Gad, na Manasseh jlom yɔɔ kre wolo na yo kre loo, a kra tna pe pan. 31 A Phinehas na kna mu yo pe pan mbo, “Fuŋga o chin na o Tafun Nyiɛkpɔɔ wree wa o jaara, ŋgi na hin? E n ndikana kee ka pe u na, ki tia e o shɔ mu wa ndie tiniɛ ŋga kie na o da kre kɛɛ.”
32 Ŋga kra pan ma kre, Phinehas na loplombo kɛ pre na yili Gilead tra nu, mna ndru mu sɛ Israel leele mblɛ praa wa Canaan tra nu pre bɔ mandiɛ. 33 Mandiɛ kre na tna pe pan, a praa Nyiɛkpɔɔ kaan mɛɛ. Ki tia pe nsra wiire ŋga pie na sɛ wi na Reuben, na Gad jlom yire leele pre ni mbra pe kla kre kee ka yo na.
34 Ki tia Reuben, na Gad jlom leele pre na sragbunu kre ŋga mɛɛ, “Dansiɛrɛ.” Kena ki pe dansiɛrɛ mu o kro ŋga na o Tafun wre, Nyiɛkpɔɔ wi.