5 Bawa pra peyɛ wie mbo, “Israel jlom yire kro nu, pe mblɛ haa pe n wa o Tafun yiɛ mna hin?” Ŋga ki tia rɛ? Pra da na Israel jlom yire ŋga ki n pan o Tafun yiɛ Mizpah na kre, ki fna mbe pe ki leele gbo. 6 A fooro na Israel leele pre yii pe wolo Benjamin jlom wolo pre ndra na. A praa yuu mbo, “Aŋga, jlom nunu leele chaa kɔ o nu.” 7 Benjamin jlom leele bilɛ chiɛri plɛ pe kro, a pe nsra ku ŋunɔ kre nu, a ki fna mbe o pe ŋga chiɛlɛ mbe pe leŋge, imi kie pe mbe pe jlom kre nɔɔ wa kɔ. Mni oo kre kee ŋga pe hin? Na wre o sɛ da o Tafun Nyiɛkpɔɔ wre mɛɛ ni na, waa o lechiɛlɛ wru mbe pe ŋga mbe pe leŋge fio. 8 A Israel leele pre na kna na peyɛ wie mbo, “O jlom yire, ŋgi haa leele pe nsra sɛ fni o Tafun Nyiɛkpɔɔ wre yiɛ Mizpah na kre hin?” Bawa pra nya na leele nsra yiri plɛ Jabesh ŋga kii wa Gilead tra nu kre na mna ka pan. 9 Ŋga pra peyɛ tɔɔnri kre, pe nsra Jabesh leele mblɛ pe yiri Gilead tra nu pre nya peyɛ nu. 10 Ki tia pra yire wa mna ŋunɔwifɛɛnlɛ kagbenyi kɛmbɔshiin wɔ mna tun na pe sɛ Jabesh leele mblɛ pee wa Gilead tra nu pre kro gbo, pre na pe chiɛlɛ na pe biile ni kro. 11 Pra yo ŋunɔwifɛɛnlɛ pre pan mbo, “Na e sɛ e pe bilɛ pre gbo peii, e pe chiɛlɛ mblɛ pe bilɛ chin pre kro gbo na.” 12 Ŋga pra sɛ kre, pra bichabɛɛlɛ mblɛ pe nsra bilɛ chin tun lafɛɛ jijirɛ nya leele mblɛ praa wa mu tni Jabesh na wa pre nu. A pra pe yii mna pan na pe ni Shiloh na Canaan tra nu. 13 A Israel leele pre na fni mna leele tun na wejinyiŋge kee ni Benjamin jlom leele pre pra fɛ mu sɛ tni Rimmon dnɛ lawee yire nu pre pan. 14 Ŋga kra pan ma kre, Benjamin leele pre na yili Rimmon dnɛ lawee yire nu mu pan, a Israel leele pre na tia pra chiɛlɛ mblɛ pra yii Jabesh na mu pan kre leŋge. La, bilɛ pre kro ma pra chiɛlɛ pre plɛ ta.

15 Ŋga Israel leele pre na Benjamin jlom wolo pre nya kre, fooro kpɔɔ na pe yii, ŋga pe nɔɔ na chaa fun jlom yire nu kre na. 16 A Israel loplombo pre pra fni wa kre na yo mbo, “Kre yi ŋga, Benjamin jlom leele pre chiɛlɛ pre ku mu kɔ, sena oo chiɛlɛ ta mbe pe bilɛ pre hamblɛ ŋga mbe pe leŋge hin?” 17 Israel leele pre n fna mbe pe jlom yire ka leele nɔɔ fun. Ki fna o tro kolo ka na mbe pe hamblɛ pre chiɛlɛ ta mbe leŋge. 18 La, waa jaa o lechiɛlɛ wru mbe pe ŋga mbe pe leŋge, ŋgi na hin? O na da Nyiɛkpɔɔ mɛɛ ni na waa pe ma. Ki tia ndro ŋmba we u bichlɔ wru mbe Benjamin jlom ndro ŋga mbe u leŋge kpan, suŋgɔ we u yii. 19 Bawa wa na pan na jawala ni mbo, “E le, o Tafun Nyiɛkpɔɔ yɛlɛ nyu ble kpɔɔ lie ka chaa da Shiloh na. Shiloh chia kree wa na shie Bethel nyjeeri haa, na shie Lebonah tapan haa, kii wa yila fin haa, Bethel na Shechem kolo kre na.” 20 A pra yo Benjamin bilɛ mblɛ pe n na chiɛlɛ ta pre pan mbo, “E sɛ ja pe tre seele yire nu, 21 e na pe dɔɔ taa. Na e waa Shiloh bichabɛɛlɛ nya, a pe yili na paan yɔ haa kre, mbe e yili tre seele yire nu nyaanyaa mbe sɛ plɛ yii, mbe sɛ na pe ni Benjamin tra nu, mbe sɛ pe pe e chiɛlɛ. 22 Na ki pan na pe lɛɛlɛ na pe lɛmblɛ pan na kee ka ni o pan kre, oo yo pe pan na, ‘Jande e nyu o na, ŋgi na hin? O n chiɛlɛ ta mu pe ŋga mbe pe leŋge, ŋunɔ ŋga o na wi Jabesh na kre na. A ŋga yire titi ma e chiɛlɛ pre yii mu pe ŋga kre ndra na, suŋgɔ kre wa e yii.’”

23 Kena pan Benjamin leele pre na pe. Ŋga bichabɛɛlɛ pre na pan na yoo kre, a pra sɛ plɛ yii yii mna sɛ na pe ni, mna sɛ leŋge. Ŋga kra pan ma kre, pra ndru mna sɛ pe kataa kre pɔ na, mna pe chiɛ yire gbeele mu sin mu tni wa. 24 Kre nyjila kre Israel leele pre hamblɛ na yili wa, mu sɛ pe katoe na pe jlom yire na, mna sɛ tni pe jlom wolo trɛ yire nu. 25 Kre nyjila kre na Israel leele pre n ŋunu ni. Kee nyjɛ pra nya na yi fraka pe yiɛ na praa pini.