Judges 20

Israel Leele Pre Na Wi//Na Benjamin Leele Ni

Israel leele pre na peyɛ yeeri mna sɛ fni titɛɛ. Dan jlom wolo pre naa wa na shie nyjeeri haa, a Beersheba naa wa na shie tapan haa, a Gilead tra wolo pre naa wa na shie yila fin haa, pe kro na sɛ fni o Tafun Nyiɛkpɔɔ yiɛ Mizpah na. 2 Israel jlom yire kro loplombo pre kro na fni wa ka. A ŋunɔwifɛɛnlɛ kagbenyi lafɛɛ jijirɛ na peyɛ kna mna pe brɔfiɛnlɛ yiɛshiin wru wru. 3 Kre nyjila kre na Benjamin leele pre loo na pe wolo Israel leele pre sɛ fni Mizpah na. A Israel leele pre na peyɛ wie mbo, “E o nyina ŋga ki tia kre kefɔɔn ŋga sembremu pe.” 4 A Levi blɔ ŋmba bichrɔ wra ku wre na kna mbo, “Mi na ni bichrɔ o na sɛ Gibeah na Benjamin wolo tra nu mna sɛ ŋunu wa. 5 Ŋga ble na wɔ kre, a Gibeah wa bilɛ pre na pan ni pan, mna pan mu katoo ŋga nu o na le kre fɛ mu kun na ni chaa mbe gbo, hali mna ni bichrɔ wre cha jaŋga na, a wra ku. 6 A ni ni bichrɔ wre wru, mu u knumu kɛmbɔshiin, mu yi yɔɔlɛ mu Israel leele jlom yire kro ŋga, ŋgi na hin? Kre kee kre pe kefɔɔn, na nyifɛɛrɛ kee Israel tra nu. 7 Kena Israel leele, e kro e fni mna kre, e paara, e e jawala nyina kre kee ŋga na.”

8 A leele pre kro na nyu nunu ta mna yo mbo, “Wre mblɛ o fni mna ŋga, wa wa ndru mbe sɛ katoo na. Ndro nunu chom kuraa wa yili o nu mbe sɛ katoo. 9 La, kee ŋga oo pe yi na, oo kɛɛn tɛɛ, mbe o plɛ wɔ mbe pe sɛ wi na Gibeah leele pre ni. 10 Oo jlom yire leele pre yɔɔlɛ kɛ kɛ, mbe pe yɔm nununu wɔ mbe pe sɛ sro cha mbe paan ŋunɔwifɛɛnlɛ pre ŋga, kena na wifɛɛnlɛ pre waa le Benjamin wolo pre nu Gibeah na, mbe pe jaa pe pe imi na ki fna, pe kefɔɔn ŋga pe pe Israel tra nu kre ndra na.” 11 A Israel leele pre hamblɛ na nyu pe nunu na pe sɛ wi na Gibeah leele pre ni.

12 A pra leele tun a pra sɛ Benjamin jlom leele chiɛ yire kro na mna sɛ yo pe pan mbo, “Yira ŋgi afuŋgo kee e tni na le a pe ki pe e nu ŋga hin? 13 E pre leele pre pe kre sisam ŋga pe Gibeah na pre wɔ e o ŋga, mbe o pe gbo, mbe kre sisam kee kre yili Israel tra nu.” La, Benjamin jlom leele pre nsra ndie tɛɛ kee ŋga pe wolo Israel leele hamblɛ pre naa yuu kre na. 14 A Benjamin jlom kre leele pre na peyɛ nya chiɛ yire na mna sɛ fni Gibeah na, mbe pre na Israel leele hamblɛ pre sɛ wi. 15 Titɛɛ kre nu, na Benjamin jlom leele pre pe ŋunɔwifɛɛnlɛ kagbenyi fulo na kɔɔnanu yeeri, a pra sɛ ya Gibeah wa wifɛɛnlɛ lafɛɛ kɔɔnashin mblɛ pra wɔ pre na. 16 Pre ŋunɔwifɛɛnlɛ pre pra wɔ kre, pe lafɛɛ kɔɔnashin na pe kamiumble. Na mu ndra nyjuro yire sholo, a u ki wa vuŋmbɔ ni wa ki la. 17 Na mu Benjamin jlom wolo pre wɔ mu tɛɛ mbɛɛ na, Israel leele hamblɛ pre na pe ŋunɔwifɛɛnlɛ titie kagbenyi lafɛɛ jijirɛ.

18 Israel leele pre na sɛ Bethel na, mna praa shie na Nyiɛkpɔɔ sumi kre, mna sɛ Nyiɛkpɔɔ wie mbo, “O jlom yire ŋgi haa kie klu mbe sɛ wi na Benjamin jlom leele pre ni hin?” A o Tafun Nyiɛkpɔɔ wre na yo mbo, “E ti mbe Judah jlom kre klu mbe sɛ.” 19 Ŋga nyiŋge na se bnimi, a Israel leele pre na sɛ pe nyinyi kan mu mbra Benjamin leele kakpɔɔ ŋga praa yeeri Gibeah kre na, 20 Israel leele pre na peyɛ kna mna sɛ yire mu tɛni mbe wi na Benjamin leele pre ni Gibeah na wa. 21 A Benjamin leele pre na yili mna sɛ pe fni. Ŋga yila naa kɔɔ kre na pe Israel ŋunɔwifɛɛnlɛ pre kagbenyi fulo na shiin gbo mu wo tra kre nu. 22-24 Israel leele pre na ndru mna sɛ lawee ŋga nu pe shie na Nyiɛkpɔɔ sumi kre nu, mna sɛ nyɛni a yila na pan mu to. A pra o Tafun Nyiɛkpɔɔ wre wie mbo, “O ndru mbe sɛ wi na o sele wolo Benjamin jlom leele pre nii?” A o Tafun Nyiɛkpɔɔ wre na yo pe pan mbo, “E sɛ wi na pe ni na.” A Israel leele ŋunɔwifɛɛnlɛ pre na peyɛ le gbeŋmbaa, na pe gbun ta mbe wi na faŋga ni. Ŋga nyiŋge na se kre, a pra ndru mna sɛ Gibeah na wa na, mna sɛ yire yire lawee nyjɛ nu pra sɛ yire jle kre chɔɔ nu. 25 Kre ble kre Benjamin ŋunɔwifɛɛnlɛ pre na yili Gibeah na wa mna pan mu wi na Israel leele pre ni. Pra ndru mna Israel leele ŋunɔwifɛɛnlɛ pre kagbenyi kɛmbɔkɔɔnatarɛ gbo mu wo nyaa wa.

26 A Israel leele pre kro na ndru mna sɛ fni Bethel na, mna nyɛni chichie mu wo o Tafun Nyiɛkpɔɔ wre na, mna ble fun mu yire bnimi mu sɛ su yilakɔŋgɔ, mna yurɛ sroo sra, na wejinyiŋge sra wɔ mna o Tafun Nyiɛkpɔɔ wre ŋga. 27 Israel leele pre na ndru mu o Tafun Nyiɛkpɔɔ wre wie. Yire ble yire nu na Nyiɛkpɔɔ Nyu Nunu Daka kre wa wa. 28 Na Eleazar biblɔ Phinehas Aaron nana wre u ki tnumu tuni. A Israel leele pre na o Tafun Nyiɛkpɔɔ wie mbo, “O ndru mbe sɛ wi na o wolo Benjamin jlom leele pre nii?” A o Tafun Nyiɛkpɔɔ na yo pe pan mbo, “E sɛ, baŋga rɛ, mbe ti mbe pe to e kɛɛ.”

29 A Israel wifɛɛnlɛ pre plɛ na sɛ ja nyaa mu Gibeah fɛ mu kun. 30 Ble taarɛ wo na, a pe wifɛɛnlɛ pre hamblɛ na ndru mna sɛ yire yire pe yire hɛɛ lɛɛlɛ yire nu na wii Benjamin jlom leele pre ni Gibeah na wa. 31 Benjamin leele pre na yili mna sɛ pe fni, na wii na pe ni na shie yiɛ, mna pe chia kre ti kro. Benjamin jlom wolo pre naa Israel leele pre kuu na jle kre yi. Ki ble kre pra pe leele fulo na kɛ gbo mu wo nyaa na kooloe nyjɛ yira sɛ Bethel na yire na. 32 Nyjila ŋga ni Benjamin leele pre na yuu mbo, “O chaa pe ja na kre,” Na Israel leele pre chɔɔ wa na yuu mbo, “E ti mbe o na shie kro, mbe praa laari pe chia kre na, mbe o sɛ na pe ni pe see kooloe yire na.”

33 Kena ŋga Israel ŋunɔwifɛɛnlɛ nɛɛrɛ pre na ndru kro mna sɛ da Baal-Tamar na kre, a pe wolo mblɛ pra ndra nyaa mu Gibeah fɛ mu ku pre na yili nyaanyaa mna le chia kre na. 34 Na Israel wifɛɛnlɛ kagbenyi kɛ pre na Benjamin wifɛɛnlɛ pree wa na wii kolo wa. Ŋunɔ kre nyu na wɛɛri, la, Benjamin jlom wolo pre nsra chin na pe kla nyjila da. 35 Kre ble kre o Tafun Nyiɛkpɔɔ na tia Israel leele na Benjamin leele pre ja. Israel leele pre na Benjamin leele pre kagbenyi fulo na kunɔ na lafaa gbo, a nde na brɔfiɛn yiɛshiin wa wa pe kɛɛ. 36 Fuŋga rɛ, Benjamin leele pre na nya na Israel leele pre pe ja.

Nyjila ŋga ni praa wii a Israel wifɛɛnlɛ pre naa ndru kro ni kre, na Israel leele pre kaan pe wolo mblɛ pra sɛ ndra nyaa mu Gibeah fɛ mu kun pre na. 37 Kra tia Israel wifɛɛnlɛ pre pra ndra nyaa mu Gibeah fɛ mu kun kre na yili nyaanyaa mna le chia kre lam mna ki shɔ mu ta, mna leele pre kro gbo. 38 Israel leele pre na pe wolo mblɛ pra ndra nyaa wa kre na klu mu paara mu fni, na na pe waa le chia kre na, pe kanhun le ki na. Kena na pre Israel leele mblɛ pee wa na wii kolo wa kre waa wree nya chia kre na poŋgo kre, 39 kena pe kna mbra wii na pe ni mbra paan kro.

Kre nyjila kre nu Benjamin leele pre na Israel leele pre fulo na kɛ gbo mnaa yuu mbo, “O pe ja aŋga na.” 40 Kena ŋga wree kre na kun chia kre na kre, a Benjamin leele pre na kna mna nya na wree kun chia kre na poŋgo na shie nyjeeri. 41 Titɛɛ kre nu, a Israel leele pre na kna mu pe tɔ. Fiɛrɛ kpɔɔ na wo Benjamin leele pre na. Ŋgi na hin? Na pe nya na nyibinyiɛ kpɔɔ pe da. 42 A pra fɛ mna yiɛ le tablɔ tra kre nu poŋgo, la, pe n nsra ja mu shɔ Israel leele pre kɛɛ. Israel leele mblɛ pra yili chiɛ nyjɛ yira mbra wa yire na kre na pe chrɔ kolo mna pe gbo. 43 Israel wifɛɛnlɛ pre na Benjamin wifɛɛnlɛ pre le lalaa mna pe ni mna sɛ pe gbo Gibeah yila yili haa wa. 44 Benjamin leele pre kagbenyi kɛmbɔkɔɔnatarɛ na to ŋunɔ ki ble kre, a nde pe kro na pe ŋunɔwifɛɛnlɛ titie. 45 Nyjila ŋga ni praa feni na shie Rimmon dnɛ lawee wa tablɔ tra kre nu kre, Israel leele pre na leele pre kagbenyi kunɔ gbo kooloe nyjɛ pra yii yire na. Pra pe kɔŋgɔ ni chiin mna sɛ le chia ŋga pe yeeri Gidom kre na, mna gbo pe nu leele kagbenyi shiin mu ya. 46 Kre ble kre Benjamin ŋunɔwifɛɛnlɛ kagbenyi fulo na kunɔ pra to, ande pe kro na pe ŋunɔwifɛɛnlɛ titie. 47 La, pe bilɛ lafɛɛ kɔɔnanu na je mna fɛ mu sɛ tablɔ tra kre nu, mna sɛ tni Rimmon dnɛ lawee yire nu nyiɛpɔ jijirɛ. 48 Israel leele pre na ndru mna sɛ chiɛ nyjɛ yiraa wa Benjamin jlom wolo pre tra nu pre gbo peii, pre na pe yurɛ, na yirɛ nyjɛ pra nya wa kro ni. Chiɛ nyjɛ pra nya kro, pra kanhun le yi na mna yi sro.