Levi Ndro Wa Na U Bichrɔ
19
Kre nyjila kre na Israel leele pre n wa na ŋunu ni. Na Levi blɔ waa wa mu tni haalee Ephraim nyambie lawee yire nu, mna bichrɔ wa wru Bethlehem ŋga kii wa Judah tra nu kre na. 2 Ki ble ka chlɔ wre na yili blɔ wre kro, a kra tia wra tio mna ndru mu sɛ tni u lɛ katoo Bethlehem na nyiɛpɔ jijirɛ. 3 Blɔ wre na chlɔ wre kɔŋgɔ ni, mbe sɛ paara u pan mbe u ndru mbe pan. Ŋga wraa shie kre wra sɛ na u sumifun wa ni, a pra bubunlɔ shiin wru. Ŋga blɔ wre na da wa kre, a chlɔ wre na sɛ na u ni u lɛ katoo. Ŋga u lɛ wre na u nya kre, wra u shɔ na yɛshɔɔrɔ ni. 4 Chlɔ wre lɛ wre nsraa chaa mbe u nafun wre ndru mbe sɛ, a ki tia wra tni pe jaara ble taarɛ, na lii, na gboo, na sni. 5 Ki ble jijirɛ ble kre na, pra gbolo na peyɛ kna mbe sɛ, a chlɔ wre lɛ wre na yo u nafun wre pan mbo, “E yaka le nyuu tun e chin e to kolo.” 6 A blɔ wre na u sumifun wre na sɛ tni mu chaa mu li mu gbɔ. Ŋga pra kɔ kre, a chlɔ wre lɛ wre na yo u nafun wre pan mbo, “E ŋunu mna aŋga na, e eyɛ nyu li.” 7 Blɔ wre na je mu yiri mbe sɛ, a u nafun wre na je mna wɛ u na, a wra ŋunu wa ki ble kre na. 8 Ble kunɔ ble kre bnimi, blɔ wre na yiri mbe sɛ, a u nafun wre na ndru mu yo u pan mbo, “Jande, e yaka le lɛɛ, na lafo da mbe e sɛ.” A pra tni mna yaka le lɛɛ. 9 Ŋga pra kɔ kre, a blɔ wre na u bichrɔ wre, na u sumifun wre na yiri mbe sɛ, a chlɔ wre lɛ wre na yo mbo, “Fuŋgaami ŋga yila kɔ, e ŋunu e eyɛ yiɛshɔ, nyiŋge kie se kre, kena e yiri yaari baŋga bnimi mbe to kolo mbe sɛ.” 10 La, Levi blɔ wre nsraa chaa mbe ŋunu wa na ki ble kre, a wra yiri mna to u bubunlɔ shiin pre na, a wre na u sumifun wre, na u bichrɔ wre na yiɛ le Jerusalem na.11 Ŋga praa mbra Jerusalem na kre, na ndram hulo, a u sumifun wre na yo u pan mbo, “Ni tafun, ti mbe o ŋunu kakpɔɔ ŋga na mna.” 12 A u lopom wre na kna mbo, “Waa ŋunu leele mblɛ pe n pe Israel leele chia na. Oo sɛ ŋunu Gibeah na. 13 Na o gbeŋmba oo jaa le Gibeah na, aada oo jaa da Ramah na mbe ble chiin wɔ kple.” 14 A pra Jerusalem wa mu tro na shie, pan yila na to to, a pra le Gibeah ŋga kii wa Benjamin jlom wolo tra nu kre na. 15 Bawa pra pe jawala pe na pie ŋunu Gibeah na wa. A pra yɔ mna sɛ tni chia kre lete na mna leele naa jiin na pini kre nu, hali ndro nsra pe wru mu sɛ katoo.
16 Nyjila ŋga ni pra wa mu tni wa kre, blɛlɔɔ wa na sɛ tnumu tun see na paan, wre blɔ wre na yiri Ephraim nyambie yire nu, mna pan mu tni Gibeah na wa. La, leele mblɛ praa wa Gibeah na pre tataara na yiri Benjamin jlom na. 17 Ŋga blɛlɔɔ wre na kna mna leele pre nya lete na wa kre, a wra kna mna pe wie mbo, “Sena e yiri hin? A sena e shie hin?” 18 A Levi blɔ wre na kna mbo, “Bethlehem na o yiri Judah tra nu, bawa o sɛ ndro wa shaari. Fuŋgaami o shie chia ŋga na pe o Tafun Nyiɛkpɔɔ sumi kre na, a na o yiri wa, oo ndru mbe sɛ Ephraim nyambie lawee yire nu. Kre o da mna, hali ndro n o wru mu sɛ u katoo. 19 Ŋga o paan, o pan na sro ni o bubunlɔ pan, a paanu na simi gbɔwoo wa wre titi pan, ki tia o n yaka shian ndro pan, na lawee ŋga oo ta mbe sni bɔkɔ.” 20 A blɛlɔɔ wre na yo pe pan mbo, “E pan e sɛ ŋunu ni pan katoo, mbe e ŋga yira ŋga ki e shian kro, yaa sni lete na mna.” 21 A wra pe wru mna sɛ katoo, mna pe bubunlɔ pre ŋga sro. Ŋga pra pe jeelee je mu kɔ kre, a wra pe ŋga sro a pra li, mu gbɔ.
22 Nyjila ŋga ni pra tni na wuui kre, titɛɛ kre nu to, a sisampefɛɛnlɛ plɛ na pan mu katoo kre fɛ mu kun, na katoo kre krɔ gbuun kpɔɔ, na fuuru blɛlɔɔ katoofun wre na na yuu mbo, “Blɔ ŋmba u le mu pan mna kre wɔ mu o ŋga, mbe o sni na u ni.” 23 A katoofun wre na yili fimi na mna yo pe pan mbo, “Ni wolo, e jande yaa kre kefɔɔn ŋga pe, ni fumblɔ lɛ, kena yaa kre nyifɛɛrɛ kee ŋga pe. 24 E le, mi titi pɔ chlɔ wi kre, u n blɔ chin tun. Mbe wre na blɔ wre bichrɔ wre wɔ mbe e ŋga, mbe e pe pe imi e chaa, la, blɔ wre rɛ, yaashia kre nyifɛɛrɛ kee ŋga pe u na.” 25 A leele pre na je, pe nsraa kee ŋga blɛlɔɔ wre yuu kre ndru. A Levi blɔ wre na u bichrɔ wre wɔ mna pe ŋga fimi na wa, a pra sni na u ni jaŋga na, mna u pe imi na pe chaa, ŋga nyiŋge naa sii kre, a pra u wa na u sɛ katoo. 26 A wra sɛ to mu sni jlonwee nyu na.
27 Ŋga nyiŋge na se a blɔ wre na krɔ nyaa mbe yili mbe sɛ kre, na u bichrɔ wree ŋmba u to mu sni, mu kɛ taa jlonwee taanhaa kre na. 28 A blɔ wre na yo chlɔ wre pan mbo, “Yiri mbe o sɛ.” Chlɔ wre n nsra ja mu paara to, mna fii. A blɔ wre na u bali mu taa u bubnɔ na, na shie u chia. 29 Ŋga wra da u chia kre, a wra brɔfiɛn wru mna chlɔ wre knumu nununu kɛmbɔshiin, mna u yɔɔlɛ mu Israel jlom kɛmbɔshiin yire kro ŋga. 30 Ndro ŋmba wra kaara yire nya kro naa yuu mbo, “Mu yire ŋga o yiri Egypt tra nu mu pan mna, o n da mu kre kee ŋga ka nya, ndee mu ka loo tun. E ti mbe o ki jawa chichie, mbe chin kee ŋga ki fna o pe.”