Dan Leele Na Tni Laish Na
18
Kre nyjila ŋga krɛrɛ kre na Israel leele pre n wa na ŋunu ni. A kre nyjila kre na Dan jlom leele lawee chaa mbe tni. Ŋgi na hin? Na pre chiin pe n wa na tra ni kpiki Israel leele pre nu. 2 Ki tia pra ŋunɔwifɛɛnlɛ kunɔ wɔ mu yili chiɛ nyjɛ praa yeeri Zorah na Eshtaol yire na mna pe tun na pe sɛ Ephraim nyambie yire nu mbe sɛ kila mbe ki le mbe tro, na pie lawee ta wa mbe tni. A pra sɛ Ephraim nyambie yire nu mna sɛ le Micah katoo, mna ŋunu wa. 3 Nyjila ŋga ni praa mbra Micah katoo kre na kre, pra Levi ndro wre mana loo, mna chin na Bethlehem na u yiri, a kra tia pra kna mna le katoo kre lam mna u wie mbo, “A ndro ŋmbi u pan na mu ni mna hin? A yira ŋgi kuraa mu chaa katoo ŋga nu hin?” 4 A wra kee ŋga Micah pe u na yo pe pan mbo, “Wru u ni wru u srawɔfun, mbra ni fɔlɔ toni.” 5 A pra kna mna yo u pan mbo, “Jande Nyiɛkpɔɔ wie o pan mbe o chin, na o kolo ŋga o kuun ŋga we nyu mbe o ŋga.” 6 A srawɔfun wre na kna mna yo pe pan mbo, “E sɛ wejinyiŋge ni, o Tafun Nyiɛkpɔɔ wre yiɛ shɔ kolo ŋga e kuun kre na.”7 A bilɛ kunɔ pre na yili wa mna sɛ chia ŋga pe yeeri Laish kre na. Bawa pra nya na leele mblɛ pee wa wa pre wejiŋge nyjii pe na, na Sidon leele pre lɛ, a pe n naa sisaa ka jawa, a yaka nsraa pe tɔɔra. Yira ŋga praa chaa kro, praa ki taa tra kre nu. Pre na Sidon leele pre haa na le, a kala ka nsraa wa pre na pre lalaa. 8 Ŋga bitumblɔ pre na ndru mna pan Zorah na Eshtaol na kre, a pe wolo pre na pe wie mbo, “Mni e bawa nya hin?” 9 A pra kna mbo, “E pan mbe o sɛ wi Laish leele pre ni, o nya na tra kre nyu. Yaa ti mbe o tni mna mbra nyjila klai, e ti mbe o sɛ nyaanyaa mbe sɛ wi mbe tra kre shɔ. 10 Na o waa da wa ee nya na leele pre n na kala ka jawa. Pe tra kre kpɔɔ, a yira ŋga mu na chaa tra kre nu kro mu ki ta. Yirɛ kro bɔ ki na, a Nyiɛkpɔɔ ki le o kɛɛ.”
11 A pra leele lafɛɛ kɔɔnanu wɔ mu yili Dan jlom kre na, a pra peyɛ kna mna yili Zorah na Eshtaol na mbe sɛ wi. 12 Ŋga praa shie kre, a pra sɛ tni mu mbra chia ŋga praa yeeri Kiriath-Jearim kre na, Judah tra nu. Kre ki tia pra lawee ŋga yi Kiriath-Jearim yila to haa wa kre yeeri Mahaneh-Dan, ki nɔɔ nyina Dan leele tni haa. 13 Ŋga pra yiri wa kre, a pra sɛ Ephraim nyambie yire nu, mna sɛ mbra Micah katoo kre na.
14 Bawa bilɛ kunɔ pre pra klu mna tun Laish tra nu wa kre na yo pe wolo ŋunɔwifɛɛnlɛ hamblɛ pre pan mbo, “E chin na ndro waa wa katoo ŋga nu, a srawɔfun dodoŋgi kpro kre ka na sɛɛnlɛ nyini nyinii wa u paan? Kena kee ŋgi ki fna o pe hin?” 15 Ki tia pra sɛ le Micah pan katoo, na Levi srawɔfun wree wa wa, a pra u shaari. 16 Kre nyjila kre na Dan ŋunɔwifɛɛnlɛ lafɛɛ kɔɔnanu mblɛ pra peyɛ kna mbe sɛ wi pree wa mu yire katoo kre jlonwee nyu na. 17 A bilɛ kunɔ mblɛ pra sɛ tra kre ju mu le pre na le katoo kre lam wa, mna sɛ sɛɛnlɛ nyjɛ pe tɛ mu tɛɛ wa yire, na srawɔfun dodoŋgi kpro kre, na katoo wa sɛɛnlɛ, na yi swafiŋge sɛɛnlɛ yire kro koli. Kre nyjila kre na srawɔfun wre na ŋunɔwifɛɛnlɛ lafɛɛ kɔɔnanu pree wa mu yire katoo kre jlonwee nyu na. 18 Ŋga pre leele pre na le Micah katoo wa na sɛɛnlɛ yire, na srawɔfun dodoŋgi kpro yire kolii kre, a srawɔfun wre na pe wie mbo, “Yira ŋgi kee e pini ŋga hin?” 19 A pra kna mbo, “Mu nyu tɔ, maa paara. Pan mu tro mbe wre na ŋu sɛ mbe mu sɛ pe o knafun, na o sɛɛnlɛ pɛɛrifun. Na mu jlom poŋgo le, kre prɔ ŋga mu tni katoo nunu chom na na.” 20 Kee kre pra yo kre na tna u pan. A wra sɛ dodoŋgi kpro kre wru, mna sɛɛnlɛ nyjɛ yiraa wa katoo wa yire kro koli, mna yili mu taa leele pre kro.
21 A pra pe biile fiɛnfiɛn, na pe tuuro na pe katoo yurɛ, gbun mu wa yiɛ, mna krɔ kna mu na shie. 22 Ŋga pra yili wa mna sɛ yiɛ chiɛri mu laa Micah katoo kre na kre, bawa leele mblɛ praa wa mu mbra Micah katoo na wa pre kro na peyɛ yeeri mu fni mna Dan jlom leele pre kɔŋgɔ ni mna sɛ pe da. 23 Ŋga Dan jlom leele pre na leele pre gblee loo pe kro kre, a pra kna mu Micah wie mbo, “Yira ŋgi ki tia mu mu leele mblɛ yeeri pra paan mbe wi na o ni ŋga hin?” 24 A Micah na kna mbo, “E chin kee ŋga e pe rɔ. E ni sɛɛnlɛ nyjɛ ni gbeele yire koli, mu sɛɛnlɛ yire pɛɛri tnumu kre shɔ ni pan, a yaka n kro ni pan na, fuŋga e chin na ni wie na yira ŋgi ki pan hin?” 25 A Dan jlom leele pre na kna mna yo Micah pan mbo, “O n na chaa mbe kee ka loo mu nyu na na. Na maa tia krɔ waa o kun, mu bilɛ pɔɔrɔfɛɛnlɛ nya o nu, a ŋu na mu sele leele mblɛ kro we e ndra cha mbe la.” 26 A Dan jlom leele pre na krɔ kna mna to kolo na shie. Ŋga Micah na nya na pe sheli mu wɛ u na kre, a wra laa pe kro mna ndru mu sɛ u katoo.
27 A pra sɛ na yirɛ nyjɛ pra koli Micah katoo wa yire kro ni. Yire na yirɛ nyjɛ ni wraa sɛɛnlɛ yire tnumu tuni yire ni kro, mna sɛ Laish na. Bawa leele pre naa wa mu tni wejinyiŋge nu, pe nsraa yaka jawa, a pra sɛ wi na pe ni mna pe gbo, mna chia kre sro. 28 Ndro nsraa wa mbe wi mbe chia kre shɔ, ŋgi na hin? Pre na Sidon chia kre haa na le, a pre na leele plɛ nsraa wa na nyu nunu kee ka ni mbe ki ti pe ya pe na. A kakpɔɔ kre naa wa Beth Rehob landɛɛ kre nu. A Dan jlom leele pre na chia kre gbeele mu sin mu tni wa. 29 A pra pe tolɛɛ mɛɛ tɛɛ chia kre na, na ki yeeri Dan. Dan lɛ na wi Jacob. La, jle kre na chia kre mɛɛ Laish. 30 Kre chia kre na Dan jlom leele pre na sɛɛnlɛ yire tɛɛ na sumi. Nyjila ŋga ni Israel leele pre loŋgoolo nsra ta mu pe yii tinlɛ mu sɛ waŋgra ka nu kre, na Moses biblɔ ŋmba praa yeeri Gershom wre biblɔ Jonathan na u bibilɛ pre lɛ Dan jlom kre sɛɛnlɛ pɛɛrifɛɛnlɛ. 31 Hali nyjila ŋga ni Nyiɛkpɔɔ Yoŋgo Nyuŋgo ŋga nu praa u sumi kre naa wa Shiloh na kre, na Dan jlom leele pree wa na Micah sɛɛnlɛ nyjɛ wra pe yire sumi.