Micah Sɛɛnlɛ
17
Blɔ wa praa u yeeri Micah, a wra yiri Ephraim nyambie yire nu. 2 Ki ble ka wra yo u lo pan mbo, “Maa, ŋga pra mu swa fiŋge lafɛɛ kɛmbɔnunu yire ju kre, ndaa loo na mu ufun suni. Le, swa kree wa ni pan, mi ndaa ki wru.” A u lo wre na kna mbo, “Ni pɔ, o Tafun Nyiɛkpɔɔ wre we mu dwan.” 3 Ŋga pɔ wre na pan na swafiŋge lafɛɛ kɛmbɔnunu yire ni mbe u lo ŋga kre, a u lo wre na kna mbo, “Ni kre swa ŋga pe cheche mu o Tafun Nyiɛkpɔɔ wre ŋga, imi kie pe mbe ni pɔ Micah dwamu ta. Mbe pe sɛɛn tɛ, mbe swa kre nya mbe wo ki na.”4 A Micah na swa kre le u lo kɛɛ, a u lo na swa kre lafɛɛshiin wɔ, mna sɛ fiireefun ŋga, a wra sɛɛn tɛ, mna swa kre nya mu wo ki na, a pra sɛ ki tɛɛ Micah pan katoo.
5 Micah naa wa na wre titi sɛɛn nyuŋgo ni, a wra srawɔfun dodoŋgi kpro kre ka nyini pe, kre na sɛɛnlɛ yɛ ni, mna u bibilɛ pre nunu yii mu tɛɛ yi pɛɛrifun. 6 Kre nyjila kre na Israel leele pre n wa na ŋunu ni, ki tia kee nyjɛ leele pre na jawa na yi nyu pe pan praa pini.
7 Levi ndro yirifuŋu wa na sɛ tni Bethlehem na mu chaa Judah jlom wolo pre nu nyjila chiɛri ka. 8 A wra kɔ mu yiri Bethlehem na wa, na lawee fɔŋgɔ chaa mbe tni. Ŋga wraa kila na tro kre, a wra sɛ yili Micah na, u katoo Ephraim nyambie yire nu.
9 A Micah na u wie mbo, “Sena mu yiri hin?” A wra yo mbo, “Levi ndro wi mi, a ni yiri Bethlehem na Judah tra nu, na lawee fɔŋgɔ chaa mbe tni.”
10 A Micah na yo u pan mbo, “Tni ni pan mna, mu pe ni knafun, na ni srawɔfun, mna ni nyina kee ŋga Nyiɛkpɔɔ chaa mbe ni pe. Yɛlɛ nyu kpan, mbe na mu kaan swafinyi kɛ, mbra mu kaan mu dodonyi na mu sro.” 11 Levi blɔ wre na ki nɔɔ loo na we tni u pan, ki tia wra u wru mu pe na u bibilɛ pre wa wi. 12 Micah na Levi ndro wre pe u srawɔfun, a wra tni u pan katoo. 13 A Micah na yo mbo, “Ŋga Levi ndro pe ni srawɔfun ŋga, fuŋga ni chin na o Tafun Nyiɛkpɔɔ we nyu ni na.”