4 Kraa wa nyjila ka nu, a Samson na chlɔ wa nya mnaa u chaa, u mɛɛ naa Delilah, a wra wa Sorek nyua kre landɛɛ nu wa. 5 Ŋga Philistine ŋulo pre na ki loo kre, a pra sɛ chlɔ wre pan mbo, “Le, na mu ja mbe u fana mbe u mu nyina yira ŋga ki u ŋga kre faŋga ŋga sembremu, na kolo ŋga na oo tro mbe jaa u ta, mbe u pɔ mbe sɛ na u ni kre, leele mblɛ kro we mu ŋga swa fiŋge ŋga snamu ki da kra dnɛ lafaa na fuloe shiin.” 6 Kena ŋga Samson na ndru mu pan Delilah katoo kre, a wra yo Samson pan mbo, “Jande ni nyina yira ŋga ki tia mu faŋga ta, na kolo ŋga na ndro we jaa tro mbe mu ta mbe mu pɔ mbe sɛ na mu ni.” 7 A Samson na kna mbo, “Na pe bɛŋɛ mɛnyi fɔnyi kɔɔnashin tɛɛ mu ni pɔ kre, pan mbe pe yiɛyiɛ na ndro kro wi.” 8 A Philistine ŋulo pre na pan mna chlɔ wre ŋga bɛŋɛ mɛnyi fɔnyi nyjɛ yi n yua, a wra yi tɛɛ mna u pɔ. 9 Kre nyjila kre na pe tia bilɛ pre sɛ ndra nyuŋgo ka nu. Ŋga chlɔ wre na kɔ kre, a wra kna mna yo Samson pan mbo, “Samson, Philistine leele pre paan mu pan.” A wra mɛnyi yire tini mu knumu na kanhun ki to maŋa fuuloo na mu ki shɔ mu kun. Ki tia pe nsra imi pie pe mbe u ta na.

10 A Delilah na yo Samson pan mbo, “Mu kala fnɛ ni pan mu tia pra ni le jijio. Jande ni nyina kolo ŋga na ndro we jaa tro mbe mu pɔ chiriri.” 11 A Samson na kna mbo, “Na pe ni pɔ chichie na mɛnyi fɔnyi nyjɛ pe n da mu tɛɛ mu yirɛ pɔ tun ni kre, mbe pe yiɛyiɛ imi na ndro kro nyi kre.” 12 A Delilah na mɛnyi fɔnyi wru mna tɛɛ mu u pɔ. A wra sɛ bilɛ plɛ cha mu pan mu ndra nyuŋgo wa, mna kna mbo, “Samson, Philistine leele pre paan mu pan.” A wra mɛnyi yire tini mu kunumu na jese mɛnyi yi.

13 A Delilah na ndru mna yo Samson pan mbo, “Kena muu wa na ni piin jijio na ni fana tɛɛ? Ni nyina kolo ŋga na mbe tro mbe jaa mu pɔ.” A Samson na kna mbo, “Na mu ni ndra nyjuro nyjɛ pe tin kɔɔnashin nyjɛ tin mu chaa jese nu, mu yi kan mu mbra mboo na kre, mbe pe yiɛyiɛ imi na lewo kro nyi.” 14 Ŋga Samson na sni na ŋunu kre, a Delilah u nyjure nyjɛ pe tin kɔɔnashin yire yii, mna yi tin mu chaa kpɛɛra jese nu, mna ki kan mu mbra mboo na. Ŋga wra kɔ kre, a wra u yeeri mbo, “Samson, Philistine leele pre paan mu pan.” A wra nyi mna kpɛɛra kaan kre pra kan mu mbra mboo na kre tini mu kɔ, mna u ndra wɔ.

15 Ŋga kra pan ma kre, a chlɔ wre na yo Samson pan mbo, “Ŋga mu n na kaan ni na ŋga, ma jaa yo ni pan na mu ni kori. Gbee taarɛwo yi ŋga, na pan mu ni pini na jijio wi. Mu n na chaa mbe ni nyina mna mu faŋga kre yiri.” 16 Delilah na kro na Samson tɔɔra na kre kee kre ni blenyini ŋga, mna sɛ su na sra titi na kɔ mu wɔ u na. 17 Ŋga kra pan ma kre, a Samson na yo u pan mbo, “Brɔfiɛnklo n da mu taa ni ndra na tun. Ŋgi na hin? Pe ni pe Nazirite ndro mu o Tafun Nyiɛkpɔɔ ŋga mu yire ni se ble. Ki tia na pe ni ndra klu kre, ni faŋga kre we yili ni nu. A mbe pe imi na ndro kro nyi kre.”

18 Ŋga Delilah na nya na u kpra kee yo u pan kre, a wra tia pra sɛ yo Philistine ŋulo pre pan mbo, fuŋga rɛ u kpra yo ni pan, kena e pan. A Philistine ŋulo pre na ndru mna pan na pe swa fiŋge kre ni kɛɛ. 19 A Delilah na Samson pe a wra sni mu ndra taa u jeele na na ŋunu, a wra tia pra u nyjure nyjɛ pe tin kɔɔnashin yiri klu, a u faŋga kro na yili u nu, a wra pe yiɛyiɛ. 20 A Delilah na Samson yeeri mbo, “Samson Philistine leele pre paan mu pan.” A wra nyi mna na jawa na we jaa yiri mbe pe na jle kre yi, mbe uyɛ nyaara, mbe shɔ. Na u n chin na o Tafun Nyiɛkpɔɔ wre jaŋga kre yili u nu. 21 Bawa Philistine leele pre na u yii, mna u nyiɛlɛ foli, mna sɛ na u ni Gaza na, mna sɛ swafre sɛɛrɛ le u na, mna shɔlɔ tre dnɛ kpɔɔ ka pɔ u na, na u kna mbe kraa shɔlɔ yire trei. 22 La, ŋga pra u ndra kre klu kre, u nyjure yire na kɔ na gbuun na paan.

23 Ki ble ka Philistine ŋulo kro na sɛ fni, mbe pe sra kpɔɔ ka wɔ mbe pe sɛɛn ŋga pe yeeri Dagon kre ŋga, mbe ki ble kpɔɔ li. Pe kee ŋga praa yuu yi mbo, “O sɛɛn kre, o loŋgo Samson wɔ mu o ŋga.” 24 Ŋga leele pre na Samson nya kre, a praa pe sɛɛn kre kaan mɛɛ na yuu mbo,

25 Nyjila ŋga nu pe yɛshɔɔrɔ na wɛ kre, a praa gble leni na yuu mbo, “E sɛ Samson wru e pan mbe u paan o yiɛ shɔ.” A pra sɛ Samson wɔ nyuŋgo mna pan, a wra pan na pe yiɛ shio. Pra tia wra yire pe sɛɛn nyuŋgo kre pilɛɛ shiin lalaa. 26 A Samson na yo sumifun ŋmba wra u kɛ yii kre pan mbo, “Ni yire lawee ŋga nu mbe jaa yire mbe ni kɛnyi da pilɛɛsi kpɔɛ nyjɛ yi nyuŋgo kre yii kre na, mbe ni yire mbe gbun yi na.” 27 Nyuŋgo kre na kpɔɔ titi, mna nyi leele, hali ndro nsra ja mbe le wa na. A Philistine ŋulo pre kro naa wa wa. Leele kagbenyi taarɛ praa wa nyuŋgo kre ndra na, na Samson le wra pe yiɛ shio.

28 A Samson na o Tafun Nyiɛkpɔɔ wre tali mbo, “Ni Tafun Nyiɛkpɔɔ Jaŋgafun, jande ni sɔɔnri. Oh, Nyiɛkpɔɔ Jaŋgafun, ni ŋga faŋga mbe ni fɔlɔ tɔ Philistine leele mblɛ pra ni nyiɛlɛ foli ŋga na.” 29 A Samson na kɛ wa mna nyuŋgo kre pilɛɛsi kpɔɛ shiin nyjɛ na nyuŋgo kre na yire kre yii. U kamɛŋɛ na nunu yii, a u kalie kɛ na haŋa kre yii. 30 A wra kna mbo, “Ti mbe mi na Philistine leele mblɛ kro chaa mbe ku.” A wra u faŋga kro tɛɛ mna yi ŋunɔ, a nyuŋgo kre na to wre na Philistine ŋulo pre, na leele mblɛ praa wa ki nu kre kro na. Wra leele gbo nɛɛrɛ mu wɛ ŋga wraa ŋmaa ni kre na. 31 Ŋga kra pan ma kre, u lɛbiile, na u katoo leele na sɛ u gboo kre wru Gaza na mna pan katoo mna sɛ u le u lɛ Manoah faŋga ŋga kraa wa Zorah na Eshtaol lalaa wa kre nu. Samson na Israel leele yiɛ klu yɛlɛ fulo.