Samson Na Sɛ Philistine Leele Pre Fɔlɔ Tɔ
15
Mbakɔ, Samson na sikapɔlɔ wa yii mna sɛ u chɔ shaari haa. Kre nyjila kre na pe yua kun nyjila yi. Ŋga wra sɛ le kre, a wra yo we sɛ le u chɔ wre pan, la, chlɔ wre lɛ na je na wa ti mbe u le wa. 2 Blɔ wre na yo mbo, “Kolo ŋga na mna tro mu sɛ kre ndra na, ndaa jawa na mu n na u chaa. Ki tia ndaa u wru mna mu nunu ŋga, a wra leŋge. U chunu wre nyu mu wɛ u na, kena wre wru mu leŋge.” 3 A Samson na yo pe pan mbo, “Fuŋga rɛ, na ni kala ka taa Philistine leele na, kena ki kolo yi, mba pe ti kuraa.” 4 A wra yili mna sɛ ŋmbokuŋmboe lafɛɛ taarɛ yii mna pe nɛɛ pɔ peyɛ na shiin shiin, mna mɔɔlɛɛ pɔ pɔ pe nɛɛ yire na na, 5 mna kanhun mu mu le mɔɔlɛɛ yire na, mna yurɛ pre ni mu le pe yua seele yire nu. A kra tia kanhun na to pe yua nyjɛ pra kun mu tɛɛ, na nyjɛ praa paan mbe kun yire kro, na pe tre seele, na pe olive seele kro, a yira shɔ putuu. 6 Ŋga Philistine leele pre na wie ŋmba u kre kee kre pe kre, a pra yo mbo, “Samson wi, wre u Timni ndro wre bichlɔ wa wru mu leŋge, a u nafun blɔ wre u chɔ wre shɔ u pan, mu u bijanɔɔlɔ pre wa ŋga, a u leŋge.” Ŋga Philistine leele pre na ki loo ma kre, a pra sɛ chlɔ wre, na u lɛ wre gbo mna pe sro. 7 A Samson na yo pe pan mbo, “Kee ŋga e pe ŋga ndra na, mba kee kre ti, fɔna ni fɔlɔ tɔ e na.” 8 A Samson na le pe nu pɔɔrɔ ni mna pe gbo tataara, mna yiri wa mna sɛ tni dnɛ wee ka nu Etam na.9 Kraa wa wa, a Philistine leele pre na sɛ pe yonyi nyinyi kan Judah tra nu, mbe sɛ wi na chia ŋga pe yeeri Lehi kre leele ni. 10 A Judah leele pre na pe wie mbo, “Mni a e pan mbe wi na o ni hin?” A pra kna mbo, “Samson yii haa o pan mbe sɛ u pe kee ŋga u o pe kre ka.” 11 A Judah leele pre bilɛ kagbenyi taarɛ na sɛ Samson da Etam nyua wee kre nu mna u wie mbo, “Mu n chin na oo wa Philistine leele kɛɛ ra? Kena yira ŋgi kala mu chaa mbe o ŋga ŋga hin?” A Samson na kna mbo, “Kee ŋga pe ni pe kre ka ni pe pe na mu fɔlɔ tɔ.” 12 A pra kna mbo, “O pan mbe mu pɔ mbe sɛ le Philistine leele pre kɛɛ.” A Samson na yo pe pan mbo, “E da na yire titi wa ni gbo.” 13 A pra kna mbo, “O da na waa mu gbo, pɔɔ oo mu pɔ mbe sɛ pe ŋga.” A pra u yii mna u pɔ mɛnyi fɔnyi shiin ni, mna u wɔ mu yili nyua wee kre nu.
14 Ŋga praa dani na u ni Lehi na kre, a Philistine leele pre naa gble leni na paan u pan. Titɛɛ kre nu, o Tafun Nyiɛkpɔɔ Ŋumu na yiri u nu, mna u ŋga faŋga, a wra mɛnyi nyjɛ ni pra u kɛnyi pɔ yire tini mu knumu. Yira pe prɔɛprɔɛ na yokunu ŋga ki shɔ yi. 15 A wra viŋge mu kna mna bubnɔ nyutan kajle bibre ka nya na ki sni, a wra to ki na, mna ki tɛɛ mu bilɛ kagbeŋge gbun mu gbo.
16 Ŋga wra wi mu kɔ kre, a wra u mɛɛ ka kɔ mbo,
“Ni bubnɔ nyutan kajle tɛɛ,
mu leele kagbeŋge gbo.
Ni bubnɔ nyutan kajle tɛɛ,
mu pe fa mu ble titɛɛ.”
17 Ŋga wra leele pre gbo mu kɔ kre, a wra yurɔ wre nyutan kajle kre viŋge mu wa tra, a kra tia praa lawee kre yeeri Ramath-Lehi. Ki nɔɔ nyina na nyutan kajle nyambie.
18 Gbɔɔ na Samson ta mu tro, a ki tia wra nyɛni mu o Tafun Nyiɛkpɔɔ yeeri mbo, “Mu tia mu sumifun wi mu yili. Kena mu ti mbe nyumu gbɔɔ ni gbo mbe wa mna, mbe ni to leele mblɛ pe n ŋu Nyiɛkpɔɔ chin ŋga kɛɛ ra?” 19 A Nyiɛkpɔɔ na tia nyumu na vru mu yili tra, Lehi na wa. Ŋga Samson na gbɔ mu kɔ kre wra faŋga ta. A pra kre blo kre mɛɛ tɛɛ En-Hakkore, ki nyina na, ŋmba u nyɛni gbɔɔ na blo. Hali kii wa aŋga bi Lehi tra nu. 20 Samson na Israel leele pre yiɛklu yɛlɛ fulo, a kre nyjila kre krɛrɛ na Philistine pre jaara pe nyi.