3 A u lɛ na u lo na kna mbo, “Kena mu n chlɔ wa nya mu sele leele, ndee o leele mblɛ nu mbe leŋge, kena Philistine leele mblɛ pe n Nyiɛkpɔɔ chin ŋga nu mu chlɔ nya mbe leŋge ra?” A Samson na yo u lɛ pan mbo, “Wre ni chaa, kena sɛ u kee yo mu ni ŋga.” 4 Samson lɛ, na u lo nsra chin na kre leŋgeere kre, o Tafun Nyiɛkpɔɔ pan ki yiri. Kre nyjila kre na Israel leele pree wa Philistine leele pre jaara, a Nyiɛkpɔɔ naa chaa mbe yire leŋgeere kre na, mbe Philistine leele pre le kanyana nu.

5 Samson na u lɛ, na u lo na sɛ Timnah na wa. Tre kagbla ka naa wa chia kre mbookrɔ, ŋga praa dani wa kre, a blɛkpɔɔ yirifuŋu wa na yili na nyɛni na paan Samson pan, 6 Titɛɛ kre nu, a o Tafun Nyiɛkpɔɔ Ŋumu na yiri Samson nu, a wra faŋga ta mna sɛ blɛkpɔɔ wre yii, mna u tini mu wla na sugbɔ pɔ wi. La, u nsra ki kee ka yo u lɛ ndee u lo pan.

7 Ŋga pra le Timnah na kre, wre na chlɔ wre na paara, mna nya na u u chaa. 8 Kraa wa wa ki ble ka, a Samson na u lɛ, na u lo na sɛ chlɔ wre bijam pe haa. Ŋga praa shie chia kre na, mna da lawee ŋga nu wra blɛkpɔɔ wre gbo mu wa kre, wra nya na srɛ pan mu nyumu le u nu. 9 A wra ka kun na lii na shie. Ŋga wra u lɛ na u lo da kre, a wra pe ŋga ka a pra li, la, u nsra yo pe pan na blɛkpɔɔ kajle nu u srɛ wre wɔ.

10 Samson na u lɛ na sɛ le Timnah na, a Samson na tia pra sukpɔɔ pe, a lenɛɛrɛ na pan mu li imi na bijɔ plɔ naa pini kre nyjila kre nu kre. 11 Ŋga pe nsra nɔɔlɔ nya Samson kro kre, kra tia Philistine leele pre na u ŋga nɔɔlɔ fulo na kɛ. 12 A Samson na yo pe pan mbo, “Mbe gondo kee ka yo e pan, na e ja mu ni nyina ki nɔɔ ble kɔɔnashin nyjɛ nu oo bijam ŋga pe kre, mbe e ŋga dodonyi finyi, na yonyi chichiele fulo na kɛ. 13 A na e n ja mu ni nyina ki nɔɔ kre, ee ni ŋga dodonyi finyi, na yonyi chichiele fulo na kɛ.” A pra kna mbo, “Mu gondo kee kre yo mbe o loo.” 14 A Samson na kna mbo,

15 Ki ble jijirɛ wo na, a pra sɛ yo Samson chɔ wre pan mbo, “Mu plɔ fana mbe u mu nyina gondo yolo kre nɔɔ, na kre ma oo ŋu na mu lɛ katoo leele kro sro mbe gbo. Kena yeeri mu o yeeri mbe paan o gbun na fɔlɔ ni ra?” 16 A Samson chɔ wre na sɛ uyɛ viŋge mu wa u plɔ na na nyɛni mbo, “Ni chin na mu ni pra, mu n ni kori. Mu gondo kee yo ni leele pre pan, a mu n ni nyina kee kre nɔɔ.” A Samson na kna mbo, “Ni lo na ni lɛ kuraa, ni n pe nyina ki yi, kena mni mbe pe mbe mu nyina ki yi hin?” 17 Chlɔ wre n na nyɛnɛɛ ti mna sɛ su na ble kɔɔnashin yire naa paan mbe da. Ble kɔɔnashin ble kre na, kre Samson na chin mu u chɔ nyina gondo kee kre nɔɔ, ŋgi na hin? Na uu wa na u plɔ tɔɔra kee kre na. Ŋga wra ki yo u pan kre, a wra sɛ u leele pre nyina gondo yolo kre nɔɔ. 18 Ble kɔɔnashin ble kre yilakɔŋgɔ, a chia kre leele pre na sɛ yo Samson pan mbo,

A Samson na kna mu yo pe pan mbo,

19 Bawa o Tafun Nyiɛkpɔɔ Ŋumu na yiri Samson nu, mna u ŋga faŋga, a wra sɛ Ashkelon na, mna bawa leele pre fulo na kɛ gbo, mna pe wejiyirɛ shɔ pe pan, mna pan mu leele mblɛ pra u gondo yolo kre nɔɔ nyina pre ŋga yi yi. Krɔ sisaa na Samson kun, a kra tia wra ndru mu sɛ u lɛ chia. 20 A pra Samson chɔ wre wru mna u nɔɔlɔ pre lopom ŋga, a wra leŋge.