Samson Se Nyjila
13
Israel leele pre na ndru mna sisaa pe o Tafun Nyiɛkpɔɔ yiɛ. A Nyiɛkpɔɔ na pe le Philistine leele kɛɛ yɛlɛ fuloe shiin. 2 Blɔ wa, praa u yeeri Manoah, a wra yiri Dan jlom na, mna yiri chia ŋga pe yeeri Zorah kre na, a u chɔ na pe gbende. 3 Ki ble ka o Tafun Nyiɛkpɔɔ wre nyjeeri bituŋu na uyɛ wɔ mu u nyina, mna yo u pan mbo, “Ŋu chlɔ gbende ŋmba mu n na sii, mu siire ta mbe biblɔ se. 4 La, muyɛ le chichie mbe ma simi ka na ka gbɔ, ndee mbaa yira ŋga ki n pe cheche le nyuu. 5 Mu siire ta mbe biblɔ se. Wre pɔ wre, yaa shia brɔfiɛnklo taa u ndra na, ŋgi na hin? Mu biblɔ wre we pe Nazirite ndro, ŋmba pie wɔ mbe u tni mbe Nyiɛkpɔɔ ŋga mu yire u seble. Wre we Israel leele shɔɔ ŋga pie pe shɔ Philistine leele pre kɛɛ kre nɔɔ hle.”6 A chlɔ wre na sɛ ki yo u plɔ pan mbo, “Nyiɛkpɔɔ ndro wa pan ni pan. Uu fiɛrɛ ni, a u pe na Nyiɛkpɔɔ nyjeeri bituŋu wi. La, ni n u wie mna u yiri ya, a u n ni nyina u mɛɛ. 7 La, u yo ni pan mbo, ‘Mu siire ta mbe biblɔ se. Kena mu yire aŋga na shie, maashia simi ka na ka gbɔ, a maashia yira ŋga ki n pe cheche le nyuu. Ŋgi na hin? Pɔ wre we pe Nazirite ndro, ŋmba pe wɔ mu Nyiɛkpɔɔ ŋga, mbe yire u seble mbe sɛ su u kumu ble.’”
8 A Manoah na o Tafun Nyiɛkpɔɔ wre tali mna yo mbo, “Oh, ni Tafun Nyiɛkpɔɔ, ni mu tali, ti mbe mu bituŋu wre ndru mbe pan mbe o nyina imi nyini oo pɔ ŋmba oo se wre le mbe da.” 9 Nyiɛkpɔɔ na Manoah kee kre loo, mna tia nyjeeri bituŋu wre na ndru mu pan chlɔ wre pan na, na uu wa see lam, a na u plɔ Manoah wre n wa wa ka. 10 A wra fɛ nyaanyaa mna sɛ u plɔ yeeri mbo, “Blɔ ŋmba wra uyɛ wɔ mna ni nyina wre ndru mu pan.” 11 A Manoah na yiri mna taa u chɔ kro. Ŋga pra da mna blɔ wre nyi kre, a wra kna mna blɔ wre wie mbo, “Ŋu mna pan mu paara na ni chɔ ni kree?” A wra yo, “Ɛnhɛɛn.” 12 A Manoah na blɔ wre wie mbo, “Na mu kee nyjɛ mu yo yire waa pe yɛŋgɛ, kolo ŋgi na oo tro mbe pɔ wre le, a tnumu ŋgi ki fna u tun hin?” 13 A nyjeeri bituŋu wre na kna mbo, “Mu chɔ fna mbe taa kee nyjɛ ni yo u pan yire kro na. 14 Waa shia tre sɛnyi yaka le nyuu, ndee mbe simi ka na ka gbɔ, ndee mbe yira ŋga ki n pe cheche le nyuu. Kee nyjɛ ni yo yire kro, ki fna u li yi na.”
15 A Manoah na yo nyjeeri bituŋu wre pan mbo, “Tni chiɛri mbe o sugbɔ pɔlɔ wa gbo mbe sɔɔ mbe mu ŋga.” 16 A nyjeeri bituŋu wre na kna mbo, “Mbe jaa shie chiɛri, la, mba mu sro le nyuu. Na mu yurɔ tɛɛ mbe sra wɔ kre, kena u sro mu sra wɔ mu o Tafun Nyiɛkpɔɔ wre ŋga.” Manoah nsra chin na nyjeeri bituŋu ni u paara. 17 Bawa Manoah na o Tafun Nyiɛkpɔɔ nyjeeri bituŋu wre wie mbo, “A mu mɛɛ yi ŋgi hin? Kena na ki pan na kee nyjɛ mu yo yire waa pe yɛŋgɛ, mbe o jaa mu ŋga mɛɛ.” 18 A wra kna mbo, “Mni a mna ni mɛɛ wie hin? Ki n fna mbe ni mu nyina ni mɛɛ. Na ni mu nyina ki yi kuraa kre, ma ki nɔɔ chin.” 19 A Manoah na sikapɔlɔ, na yua wru mna sra wɔ dnɛ ka na mna o Tafun Nyiɛkpɔɔ ŋga. O Tafun Nyiɛkpɔɔ wre na kawako kee ka pe, na Manoah na u chɔɔ wa mu yire na le. 20 Nyjila ŋga kanhun kre naa nyini sragbunu kre na na shie nyjeeri kre, a nyjeeri bituŋu wre na le kanhun kre ndile nu mu sɛ nyjeeri. Ŋga Manoah na u chɔ na ki nya ma kre, a pra to mna pe yiɛ juule tra.
21 Ŋga nyjeeri bituŋu wre nsra uyɛ wɔ mna Manoah na u chɔ nyina na kre, bawa Manoah na chin na o Tafun Nyiɛkpɔɔ wre bituŋu na wi. 22 Bawa Manoah na kna mna yo u chɔ pan mbo, “O ku, O Nyiɛkpɔɔ nya.” 23 A u chɔ wre na kna mbo, “Na o Tafun Nyiɛkpɔɔ wre naa chaa mbe o gbo, wa na o sra yirɛ nyjɛ shɔ. A wa na o nyina yire kee nyjɛ, ndee mbra kee nyjɛ u yo o pan ŋga yo.”