Ki ble ka Ephraim jlom leele na peyɛ kna mna Jordan lɔɔ kre kun, mna sɛ Zaphon na, mna sɛ Jephthah wie mbo, “Yira ŋgi kra tia mna sɛ wi na Ammon leele ni a mu nsra u bɔ mandiɛ, a o na ka sɛ hin? Kre kee ŋga mu pe ŋga ndra na, o paan mbe mu katoo ŋga sro mbe wo mu na.” 2 A Jephthah na kna mbo, “Ŋga mi na ni leele pre na Ammon leele pre naa wii kre, ndaa kɛ wa mna e yeeri, la, e nsra pan mu ya o na. 3 Ŋga ndaa nya na e n na chaa mbe pan mbe ya o na kre, ndaa ni ŋmaa wa jenyje, mna yiri mna sɛ wi na Ammon leele pre ni, a o Tafun Nyiɛkpɔɔ wre na tia ndaa pe ja. Kena ki ŋgi na mu pan mbe wi na ni ni aŋga ŋga hin?” 4 A Jephthah na Gilead leele yeeri, a pra pan mu ya pe na, a pra sɛ wi na Ephraim jlom leele pre ni. Gilead leele pre na pe gbo titi, ŋgi na hin? Ephraim wolo pre na yo Gilead leele pre pan mbo, “Yire Gilead leele kuraa, Ephraim na Manasseh wolo na lɛ yire, a e na yiri mu pe taan.” 5 Gilead wifɛɛnlɛ pre na leele wɔ a pra sɛ yire lawee tɛɛtɛɛ nyjɛ nu Ephraim leele pre we jaa fɛ mbe tro, mbe Jordan lɔɔ kun mbe shɔ kre nu. Kena na ki pan na Ephraim leele pre wa Jordan lɔɔ kre kuun kre, mbe wifɛɛnlɛ pre u wie na, “Ephraim ndro wi ŋu ree?” Na ufun wre waa yo, “Ɔɔhɔn kre.” 6 Mbe pe ndru mbe u wie na, “Yo Shibboleth mbe o loo.” Na u nsra ja mu ki yo chichie kre, kena pe chin na Ephraim ndro wi, mbe pe u yii mbe u gbo lɔɔ kre nyu na wa. Pra Ephraim leele pre kagbenyi fuloe shiin na shiin gbo kre nyjila kre. 7 Jephthah na Israel leele pre yiɛklu yɛlɛ kɔɔnanu, mna chin mu ku, a pra u le u chia Gilead tra nu.