Jephthah
11
Loplombo pre na Jephthah wifun gbuntitremfun wre wɔ mbe u pe yiɛklu. U lɛ mɛɛ naa Gilead, a u lo na pe tɛtiɛrɔɔ. 2 Gilead chɔ wre na bibilɛ plɛ se mu ya, la, ŋga pe yiɛ na kun kre, a pra Jephthah ni pe lɛ katoo wa mbo, “O sele ŋga krɔyirɛ nyjɛ oo kɔɔ ta kre, waa yi yɔ mbe mu yɛ ta, ŋgi na hin? Mu loo u yɛ.” 3 Ŋga kra pan ma kre, Jephthah na fɛ mu yili u chinlɛ pre nu mna sɛ tni Tob tra nu. Ŋga wraa wa wa kre, lewaala plɛ na peyɛ wru mu gbun u na.4 Kraa wa wa nyjila ka nu, a Ammon leele pre naa chaa mbe sɛ wi na Israel leele ni. 5 A Gilead loplombo pre na sɛ Jephthah wru Tob tra nu wa, 6 mna yo u pan mbo, “Pan mu yiɛklu o pan mbe wre na Ammon leele mblɛ wi.” 7 A Jephthah na kna mu yo pe pan mbo, “Yire ma e na ni pra, mna ni ni mu yili ni lɛ katoo kree? Fuŋga e nyibie nyina, a e chin na ni haa chaa ra?” 8 A Gilead loplombo pre na kna mbo, “Jande, wre o ndru mu pan mu pan, kena pan mu sɛ yiɛklu o pan mbe o sɛ wi na Ammon leele pre ni, na o waa wi mu yili, ŋu oo pe ŋunu Gilead na.” 9 A Jephthah na kna mbo, “Kena na ki pan na e ni wru, a o sɛ wi na pe ni, a o Tafun Nyiɛkpɔɔ waa pe le ni kɛɛ, ee ti mbe ni pe e ŋunu yɛŋgɛɛ?” 10 A Gilead loplombo pre na kna mbo, “O Tafun Nyiɛkpɔɔ wre wi o dansiɛfun na waa kɔ o nyu kee na fio.” 11 A Jephthah na yiri mu taa Gilead loplombo pre na, a pra sɛ Mizpah na, a leele pre na u pe pe ŋunu, na pe wifɛɛnlɛ pre lopom. Bawa Jephthah na kee nyjɛ wre na loplombo pre na klu mu yo yire kro yo o Tafun Nyiɛkpɔɔ pan.
12 A Jephthah na leele tun Ammon ŋunu wre pan na pe sɛ u wie na, “Yira ŋgi o pe mu na, a mna paan mbe wi na o ni hin?” 13 A Ammon ŋunu wre na yo Jephthah bitumblɔ pre pan mbo, “Ŋga Israel leele na yiri Egypt tra nu kre, pra ni tra shɔ mu yire Arnon lɔɔ ŋga kii wa na shie tapanhaa kre na, mu sɛ su Jabbok lɔɔ ŋga kii wa nyjeeri haa kre na, hali mna sɛ su Jordan lɔɔ ŋga kii wa yila tohaa kre nyu na, kena na mu wejinyiŋge chaa to, ni tra ndro mu ni ŋga.” 14 A Jephthah na ndru mna leele tun Ammon ŋunu wre pan mbo, 15 “Kee ŋga Jephthah yuu yi kre, Israel leele pre nsra Moab, ndee Ammon tra shɔ pe pan. 16 La, ŋga pra yili Egypt tra nu kre, tablɔ tra kre nu pra tro mu mbra epo nyiɛ kre na, mna sɛ yili Kadesh na. 17 A pra leele tun Edom ŋunu pan mbo, ‘O ŋga kolo mbe o tro mu tra nu.’ A Edom ŋunu wre na je. A pra ndru mu leele tun Moab ŋunu pan, a wre na je pe pan na, a kra tia pra kro Kadesh na. 18 Ŋga pra kɔ mu yiri wa kre, a pra tro tablɔ tra kre nu mna Edom, na Moab klɛ, mna tro Moab yilafinhaa, mna sɛ tni Arnon lɔɔ kre kro wa. Pe nsra le Moab tra nu, a na mu le Arnon lɔɔ kre na yi sam. 19 Bawa Israel leele pre na leele wɔ mu tun, a pra sɛ yo Amora ŋunu Sihon ŋmba wraa wa Heshbon na wre pan mbo, ‘Jande ti mbe o tro mu tra nu mbe sɛ o lawee.’ 20 Ŋunu Sihon nsra Israel leele pre shɔ mu li, ki tia wra je pe pan. A wra u ŋunɔwifɛɛnlɛ kro nyu ble chia ŋga pe yeeri Jahaz kre na, a pra wi na Israel leele ni. 21 A o Tafun Nyiɛkpɔɔ ŋmba wi Israel leele Nyiɛkpɔɔ wre na ŋunu Sihon, na u leele pre le Israel leele kɛɛ, a pra pe ja. A Israel leele pre na tra ŋga nu Amora leele na nyi mu tni kre shɔ pe pan. 22 Pra tra kre shɔ mu yire Arnon lɔɔ kre tapan haa, mna sɛ su Jabbok lɔɔ kre na nyjeeri haa, mna yire wa mu sɛ su tablɔ tra kre na, na shie yilafin haa, mu sɛ su Jordan lɔɔ kre na na shie yila to haa. 23 Kena na o Tafun Nyiɛkpɔɔ, Israel leele Nyiɛkpɔɔ wre wra Amora leele ni pe yiɛ, kena ŋgi ni mu nyi mbe jaa tra kre shɔ o pan na hin? 24 Kena tra ŋga e sɛɛn Chemosh shɔ mu e ŋga kre na ma mu jaŋga nyii? Pan yi chɔɔ, na tra ŋga o Tafun Nyiɛkpɔɔ shɔ mu o ŋga kre yi wre wo. 25 Mu jawa na mu wɛ Zippor biblɔ Balak na ree? Wre na wi Moab ŋunu, nde u nsra da mu Israel leele nyu cha, ndee mna ŋunɔ wi na o ni. 26 Israel leele na Heshbon, na Aroer, na yi kabɛɛlɛ yire, na chiɛ nyjɛ yiraa wa Arnon lɔɔ kre mbɛɛ na yire shɔ, mna tni wa yɛlɛ lafɛɛ taarɛ. Yira ŋgi ki tia mu nsra sɛ yire tra yire shɔ pe pan kre nyjila kre nu hin? 27 Ni n mu pe sisaa, la, ŋu mu ni piin sisaa na chaa mbe ŋunɔ wi na ni ni. Ni nyiɛtali mbe o Tafun Nyiɛkpɔɔ wre na pe wre Israel leele, na yire Ammon leele lalaa kpra kunfun aŋga.” 28 Kee nyjɛ Jephthah bitumblɔ pre naa yuu yire krɛrɛ, Ammon ŋunu wre n na ndie tɛɛ yi na.
29 Bawa o Tafun Nyiɛkpɔɔ wre ŋumu na le Jephthah nu, a wra yiri mna tro Gilead na Manasseh tra yire nu, mna yire wa mu sɛ tro Mizpah na Gilead tra nu, mna yire wa mna sɛ Ammon leele pre na. 30 Bawa Jephthah na nyu yo o Tafun Nyiɛkpɔɔ wre pan mbo, “Na mu Ammon leele pre le ni kɛɛ, 31 na ndaa ndru na paan katoo, ndro ŋmba we klu mbe yili ni katoo mbe paan ni fni kpan, mbe u tɛɛ mbe yirɛ sroo sra wɔ mbe ŋu o Tafun Nyiɛkpɔɔ wre ŋga.” 32 A Jephthah na yiri mna sɛ wi na Ammon leele pre ni, a o Tafun Nyiɛkpɔɔ wre na pe le u kɛɛ. 33 Chiɛ fulo nyjɛ yiraa wa mu yire Aroer na mu sɛ su Minnith na, mu yire wa mu sɛ su chia ŋga pe yeeri Abel-Keramim na kre kro, wra yi kla peii. Israel leele pre na jaŋga li Ammon leele pre na mna mu.
Jephthah Pɔ Chlɔ Wre
34 Ŋga Jephthah na yiri ŋunɔ kre nu mu na paan u chia Mizpah na kre, ndro ŋmba wra klu mu yili u katoo mu pan mu u fni na wi u pɔ chlɔ nunu chom, pɔ wa nsraa wa u pan na, wre wra yambrawa wru na nyaara, na yoo mna sɛ u lɛ fni. 35 Ŋga wra u nya to, ki fooro na tia wra u yirɛ tini mu wla uyɛ na, na nyɛni na yuu mbo, “Oh, ni bichlɔ, mu ni gbo, ŋgi na hin? Ni nyu yo Nyiɛkpɔɔ pan, a mba jaa kɔ ki na.” 36 A u pɔ wre na kna mbo, “Ndoo, na mu nyu yo o Tafun Nyiɛkpɔɔ wre pan mu kɔ, a o Tafun Nyiɛkpɔɔ wre tia mu mu loŋgoolo Ammon leele pre ja ŋga, kena ni pe imi na mna yo kre. 37 La, mbe mu tali yira nunu. Ni ŋga nyiɛpɔ shiin mbe ni sɛ kila nyambie yire na, mbe mi na ni nɔɔlɔ sɛ nyɛni, ŋgi na hin? Mba leŋge mbe ku.” 38 A u lɛ wre na yo u pan mbo, “Mu jaa sɛ.” A wra u wa kolo a wra sɛ li nyiɛpɔ shiin, a wre na u nɔɔlɔ na sɛ nyambie yire na wa, mna sɛ nyɛni, ŋgi na hin? Wa leŋge mbe ku. 39 Ŋga nyiɛpɔ shiin yire nyu na to kre, a wra ndru mna sɛ u lɛ wre pan, a u lɛ wre na u pe imi na wra u nyu yo kre. Bichable wre na ku na u n blɔ chin.