Tola
10
Abimelech kumu kɔkro kre, blɔ wa praa u yeeri Tola, a u lɛ mɛɛ naa Puah, a u tolɛɛ na wi Dodo, wre wra yiri mna wi mu Israel leele shɔ mu wa. Wra yiri Issachar jlom na, mna tni chia ŋga pe yeeri Shamir kre na, chia kre naa wa Ephraim nyambie lawee yire nu. 2 Wre wra yiɛklu Israel leele pan yɛlɛ fulo na taarɛ mna chin mu ku, a pra u le Shamir na wa.Jair
3 Tola kumu kɔkro kre, Jair ŋmba wra yiri Gilead na wre wra pan mu Israel leele yiɛ klu yɛlɛ fulo na shiin. 4 U bibilɛ naa fulo na kɛ, a pe kro naa bubunlɔ ni na ndru. Praa chiɛ fulo na kɛ le Gilead tra nu, hali mu pan mu su aŋga na, pee wa na yire chiɛ yire yeeri Havvoth-Jair. 5 Ŋga Jair na ku kre, a pra sɛ u le Kamon na.
6 Jair kumu kɔkro kre, Israel leele pre na ndru mu sisam pe o Tafun Nyiɛkpɔɔ wre yiɛ. Pra kna mu sɛ na sɛɛn Baal, na sɛɛn chlɔ Astarte na sɛɛnlɛ nyjɛ yiraa wa Syria, na Sidon, na Moab, na Ammon, na Philistine leele tra nu yire sumi. Ŋga Israel leele pre na o Tafun Nyiɛkpɔɔ wre je, a pe nsraa u sumi na kre, 7 kra tia Nyiɛkpɔɔ krɔ na kun na pe ni, a wra pe wru mu le Philistine leele, na Ammon leele kɛɛ. 8 Yire waŋgrɛ shiin yire leele na pe fiŋge imi na ki fna yɛlɛ kɛmbɔkɔɔnatarɛ. Israel leele mblɛ praa wa Gilead na, na shie Jordan yila finhaa Ammon leele tra nu kre na kala nya Philistine leele, na Amora leele pre kɛɛ titi. 9 Ammon leele pre na Jordan lɔɔ kre kun mna sɛ wi na Judah, na Benjamin, na Ephraim jlom yire ni. Israel leele pre na kanyana kpɔɔ nya.
10 A Israel leele pre na chin mna nyɛni mu o Tafun Nyiɛkpɔɔ wre yeeri mbo, “Nyiɛkpɔɔ, jande o sisaa pe mu mu taan, mu fɛ mu ŋu ŋmba wi o Nyiɛkpɔɔ wre wa, mu sɛ na Baal sɛɛnlɛ sumi.” 11 A O Tafun Nyiɛkpɔɔ wre na pe nyu wɔ mbo, “Nyjila ka nu e na nyɛni mu ni yeeri, a ndaa e shɔ mu yili Egypt, na Amora leele, na Ammon leele, na Philistine leele kɛɛ. 12 Ŋga Sidon, na Amalek, na Maon leele naa e fiŋge fa, a e na nyɛni mu ni yeeri, ndaa e shɔ pe kɛɛ. 13 La, e je mu laa ni na, mu sɛ na sɛɛnlɛ sumi, kena e laa ni na, mba e shɔ na. 14 E sɛ nyɛni e wo sɛɛnlɛ nyjɛ e ni je mu sɛ na sumi yire na. E ti mbe yi e shɔ e kanyana nu.” 15 La, Israel leele pre na kro na yuu o Tafun Nyiɛkpɔɔ wre pan mbo, “O sisaa pe, kena o pe imi na mu chaa, la, o mu tali mbe mu o shɔ.” 16 A pra chin mna sɛɛnlɛ nyjɛ pra pe yire koli mna sɛ wo, mna na o Tafun wre sumi. Nyiɛkpɔɔ nsra ja mbe frɔ Israel leele pre kanyana yire na.
17 Ki ble ka, Ammon leele pre na peyɛ kna mna sɛ ble Gilead na mbe wi, a Israel leele pre na sɛ ble Mizpah na. 18 Bawa Israel loplombo pre na kna na yuu pe yɛ pan mbo, “Ndro ŋmbi we ja mbe yiɛklu mbe o sɛ wi na Ammon leele mblɛ ni hin? A pe kro na nyu pe nunu na ŋmba we yiɛklu o pan kpan, wre we pe o lopom Gilead tra nu.”