Samuel Hlɛ Shiinwo
David Na Loo Na Saul Ku
1
Saul na ku, kre nyjila kre nu chɔɔ David na sɛ wi na Amalek leele pre ni mna pe ja, mna ndru mu pan mu ble shiin li Ziklag na. 2 Ŋga wraa wa wa kre, nyanyjɛble wa na yiri Saul leele pre tnihaa wa mu pan na nyɛnɛɛ ni, mna pan mu kosie kan David yiɛ, na u u dodonyi wla uyɛ na, mu bloŋgo tɛɛ mu u ndra fa. 3 A David na u wie mbo, “Sena mu yiri hin?” A wra yo mbo, “Israel leele pre tnihaa wa ni fɛ mu yili na paan.” 4 A David na yo u pan mbo, “Kee ŋga ki pan wa yo ni pan.” A wra kna mbo, “Pe o leele pre tataara gbo, a hamblɛ fɛ, a pe Saul na u pɔ Jonathan gbo na.”5 A David na u wie na, “Mni mu pe mu chin na Saul na Jonathan ku hin?” 6 A wra kna mbo, “Ndaa tro nyua Gilboa na, mna nya na Saul wa mu gbun u chombo na mu yire, a na loŋgoolo pre paan u pan na pe soo kɛɛ ni. 7 A wra viŋge mu kna mu ni nya, mna ni yeeri, a ndaa shɔ u pan, 8 a wra ni wie ndro ŋmba nyini wi mi, a ndaa yo u pan na Amalek wo wi mi. 9 A wra yo ni pan mbo, ‘pan mu ni taa mu gbo, mna ni da kre ki n nyu, mbe ku.’ 10 A ndaa flo mu da u na mna u gbo, ŋgi na hin? Na ni chin na wa mu mbe to tra mbe ku. A ndaa u ŋujuulee kre laa u ndra na, na u kɛgbrɛ ŋga kraa wa u kɛ na kre ni, mu pan na yi ni mbe paan mu ŋga, ni tafun.”
11 A David na fooro tɛɛ mu u dodonyi tini mu wla u yiɛ na, a u leele pre kro na pe ma na. 12 Pra fooro li, mna nyɛni, mna blefun mu sɛ su yila kɔŋgɔ, Saul na Jonathan, na o Tafun Nyiɛkpɔɔ sojae, na Israel leele pre, imi pra pe gbo tataara kre na.
13 A David na ndru mu nyanyjɛble wre wra pan mu mandiɛ kre bɔ wre wie mbo, “Sena mu yiri hin?” A wra yo na, “Amalek ndro wa pɔ wi mi, a nii wa mu tra ŋga nu.”
14 A David na yo mbo, “Mni ki pe a mu ŋunu ŋmba o Tafun Nyiɛkpɔɔ wre wɔ wre gbo hin?” 15 Titɛɛ kre nu, a David na u leele pre wa yeeri mna yo u pan mbo, “U gbo.” A wra nyanyjɛble wre gbun mu gbo. 16 Na David klu mu yo u pan mbo, “Ŋu mu kala cha mu muyɛ ŋga. Ŋgi na hin? Ŋu titi nyuu ki yili na ŋu mu ŋunu ŋmba o Tafun Nyiɛkpɔɔ wɔ wre gbo.”
17 A David na kuulo tɔɔnri Saul na Jonathan kumu kre na. 18 A wra ki yo na pe Judah leele kro nyina u nyɛnɛɛ kre, a pra ki nyunɔ mu le Jashar hlɛ kre nu mu tɛɛ.
19 Israel nyuɛ yire na pe
o yɛkulo pre gbo mu wo,
a o ŋunɔwifɛɛnlɛ gbunfɛɛnlɛ
pre to ŋunɔ.
20 Yaa shia ki yo Gath na,
ndee mbe ki yo Ashkelon lete na,
yaa shia ti mbe Philistine chiɛlɛ
yɛshɔɔrɔ ta,
ndee mbe leele mblɛ pe n Nyiɛkpɔɔ
chin pre chiɛlɛ yɛshɔɔrɔ li.
21 Nyiɛ ndee mɛŋɛ waa shia wo
Gilboa nyua kre na na fio,
a yaka waa shia nyu ki tra na.
Ŋgi na hin? Gbunfɛɛnlɛ ŋunɔ
wiyirɛ nyjɛ ni pe peyɛ toni,
yire to mu sni na nyifɛɛrɛ ni.
Saul ŋunɔ wiyira ŋga ni
u uyɛ toni kre,
ndro n wa mbe ki fa simi ni na.
22 Jonathan bɛŋɛ nsraa waa na laa,
a Saul tokombe kre
naa u loŋgoolo kuu,
imi na u chaa,
a foorochiɛn nsraa wa ki nu.
23 Saul na Jonathan nyjila kre
pra tna na peyɛ ni,
a ŋmaa na kumu nu o,
pe lalaa nsra knumu.
Praa nyaanyaa na nyuu wi,
a pra sheli na jira wi.
24 Israel chiɛlɛ, e Saul nyɛni,
wre wra e ŋga yonyi chichiele,
na swanyiɛ yirɛ,
a e na tɛɛ mu eyɛ san.
25 Ŋunɔwifɛɛnlɛ gbunfɛɛnlɛ to,
a ŋunɔ nu pe pe gbo.
Jonathan sɛ ku mu sni nyuɛ nu.
26 Jonathan, mu ndra na ni fooro lii,
mu kee na tna ni pan,
a mna ni kori,
a kra hɛ wɛ chlɔ koroo na.
27 Ŋunɔwifɛɛnlɛ gbunfɛɛnlɛ to,
a pe wiyirɛ pe finfin,
yia jaa yaka pe na.