Saul Na U Biile Kumu
31
Philistine leele pre na Israel leele pre na ndru mu tun nyua Gilboa na. A pra Israel leele pre tataara gbo wa. Leele pre hamblɛ, na ŋunu Saul na u bibilɛ pre na fɛ. 2 A pra pe kɔŋgɔ ni mna sɛ pe yii mna Saul bibilɛ Jonathan, na Abinadab, na Malki-Shua gbo. 3 Ŋunɔ kre na wɛɛri mu Saul le, a loŋgoolo pre wa snimi na to u na, mna u yii sisaa. 4 A wra yo u ŋunɔ wi yirɛ tiofun wre pan mbo, “Mu brɔfiɛn yiɛshiin kre wɔ mu ni gbo, mbe Philistine leele mblɛ pe n Nyiɛkpɔɔ chin ŋga, waa pan mbe ni pe imi na ki n fna, mbe ni gbo.” La, fiɛrɛ na ŋunɔwiyirɛ tiofun wre yii kpɔɔ na we ki pe. A Saul titi na u brɔfiɛn yiɛshiin kre nɔɔ kan tra, mna uyɛ wa ki na. 5 Ŋga ŋunɔwiyirɛ tiofun wre na nya na Saul uyɛ gbo ma kre, a wre na u brɔfiɛn ŋunɔ tini mu foli, mna ki nɔɔ kan tra, mna uyɛ wa ki na mna ku na. 6 Kena kre kolo ŋga na Saul na u bibilɛ taarɛ pre, na u ŋunɔwiyirɛ tiofun wre na u ŋunɔwifɛɛnlɛ pre kro na tro mu ku ki ble kre. 7 Ŋga Israel leele pre hamblɛ mblɛ praa wa Jezreel lawee kre nu, na pe mblɛ praa wa Jordan lɔɔ kre yila finhaa, na loo na Israel wifɛɛnlɛ pre na fɛ, a pe Saul na u bibilɛ taarɛ pre gbo kre, pra fɛ mna pe chiɛ yire ti, a Philistine leele pre na pan mu tni yi na.8 Ŋga pra ŋunɔ kre wi a nyiŋge na se kre, Philistine leele pre na sɛ Israel leele pre pe wi mu to pre yirɛ foolohaa. A pra sɛ Saul na u bibilɛ taarɛ pre nya na pee wa mu sni nyua Gilboa na. 9 A pra Saul ndra kɔ, mna u ŋunɔwiyirɛ wɔ u na, mna leele tun Philistine chiɛ yire na, mbe pe sɛ kre mandiɛ taan kre bɔ pe leele, na pe sɛɛnlɛ pan. 10 A pra sɛ Saul ŋunɔwiyirɛ yire tɛɛ pe sɛɛn Ashtaroth nyuŋgo, mna sɛ u gboo wre kan mu mbra buŋgo ŋga pra sin mu Beth-Shan chia kre fɛ mu kun kre na.
11 Ŋga Jabesh Gilead leele pre na loo imi na Philistine leele pre na Saul gboo pe kre, 12 gbunfɛɛnlɛ mblɛ praa wa pe nu na peyɛ kna blee kre, mna sɛ Beth-Shan na. Pra sɛ Saul na u bibilɛ gboolo pre laala mboo mbɛɛ kre na, mna pan na pe ni Jabesh na, mna pan mu pe gboolo pre sro wa. 13 A pra pe kajle yire yoori mna sɛ yi le tamarisk tiŋge ka jaara, mna ble fun ble kɔɔnashin.