3 Ŋga David na u wolo pre na le chia kre na, pra nya na pe chia kre sro peii, mna pe biile na pe chiɛlɛ kro yii mu sɛ. 4 David na u leele pre na nyɛni chiin mna sɛ fna. 5 Hali David chiɛlɛ shiin pre kro pra pe yii mu sɛ, Ahinoam ŋmba wra yiri Jezreel na wre, na Abigail, Nabal ŋmba wra yiri Carmel na wre lekuchɔ wre.

6 David yiɛ na nyina. Ŋgi na hin? U leele pre krɔ na kun na u ni, a praa u chaa mbe waari dnɛ ni mbe gbo, na u tia pe pan mu pe chiɛlɛ na pe biile koli mu sɛ. La, David na faŋga ta mu yiri o Tafun Nyiɛkpɔɔ wre pan. 7 A David na yo Ahimelech pɔ srawɔfun Abiata pan mbo, “Srawɔɔ dodoŋgi kpro kre wru mu pan mbe o ki tɛɛ mbe Nyiɛkpɔɔ wie.” A Abiata na sɛ ki wru mu pan. 8 A David na O Tafun Nyiɛkpɔɔ wre wie mbo, “Ni chaa mbe leele mblɛ pe pan mu o tɔ pre kɔŋgɔ ni, mbe pe ta mbe yii ŋgaa?”

A wra kna mu yo u pan mbo, “Pe kɔŋgɔ ni, mu pe yii, mbe e leele pre shɔ.”

9 A David na u wolo lafɛɛ kɔɔnanu pre na yili, mna sɛ da Besor lafolo kre nu, a pe plɛ na kro wa. 10 A David na leele lafɛɛ jijirɛ na sɛ. Pe lafɛɛ shiin hamblɛ pre na fna mu tro, kra tia pe nsra ja mu lafolo kre kun, a pra kro ki kro. 11 David wolo mblɛ praa wa u kro pre na Egypt blɔ wa nya nyaa wa, mna pan na u ni mu David ŋga, a pra u ŋga sro na nyumu, 12 mna u ŋga fig tinyi sɛnyi yua wee yɛ, na tre sɛnyi nyjɛ ni pe simi pini yua wee pɔmu shiin. Ŋga wra li mu kɔ kre, wra faŋga ta, a na kie pe ble taarɛ lafo, na blee na u n sro, ndee nyumu ta mu gbɔ. 13 A David na u wie mbo, “Sena mu yiri hin? A ŋmbi ndro wi ŋu hin?” A wra kna mbo, “Egypt wo wi mi, a Amalek wo wa ni yii tnu. La, ndaa yaa a ni lopom wre na sɛ mu ni ti kro, kie pe ble taarɛ yi ŋga. 14 O sɛ Kereth leele, na Caleb jlom leele mblɛ pee wa Judah tra tapan haa pre tɔ, mu Ziklag sro peii.”

15 A David na kna mbo, “Mu jaa sɛ o nyina leele mblɛ pe sɛ kre kee ŋga pe ra?”

A wra kna mbo, “Mbe jaa sɛ na e ni pe lawee, na ee da Nyiɛkpɔɔ mɛɛ ni mbe ni ŋga, na yaa mi gbo, ndee yaa ni wru mbe le ni tafun wre kɛɛ.” 16 A wra yiɛ klu na David ni mu sɛ wa. Ŋga pra da pe na kre na pee wa mu tni tni mu nyina poŋgo na lii, na kaa, na gboo. Pe yiɛ na shɔ yirɛ tataara nyjɛ pra ta mu foolo Philistine, na Judah tra nu yire na. 17 Kie pe ndram hulo nyjila, David na u wolo pre na sɛ pe tɔ, mna wi na pe ni chiin, a nyiŋge na pan mu se, a yila na pan mu kɔ. Pra leele pre gbo peii, fɔna pe yirifumblɔ lafɛɛ jijirɛ mblɛ pra pe nyaanyaa mna nduu nyuuma na, mna fɛ mu sɛ pre bɔkɔ. 18 David na u chiɛlɛ shiin pre, na yirɛ nyjɛ Amalek leele pre na koli yire kro ta mu shɔ. 19 David na u leele pre yaka nsra kro a pe nsra ki ta mu shɔ Amalek leele pre pan, wra u wolo pre biile bibilɛ, na bichiɛlɛ kro ta mu shɔ mu pan. 20 Wra pe mbaala na nui pre ta mu shɔ, mna Amalek leele pre titi wolo koli mna ya, la, pra pre wɔ pe yɛ a wra tia u leele pre na pe kɔɔnri mna yiɛklu yurɛ hamblɛ pre pan, a leele pre naa yuu mbo yurɛ mblɛ rɛ David wolo lɛ.

21 A David naa shie u wolo lafɛɛ shiin pre pra ti Besor lafolo kre nu pre pan. Ŋga praa dani wa kre, a u wolo pre na yiri mna pan mu David na u leele pre fni kolo, a David na sɛ pe da mu pe shaari kama. 22 Ndrashelifɛɛnlɛ lewaala mblɛ pre na David na sɛ ŋunɔ kre nu pre na yo mbo, “Wre na pre ma o na sɛ, kena yirɛ nyjɛ o ta kre, waa pe ŋga yɛ. E pe ŋga pe chiɛlɛ na pe biile mbe pe sɛ.”

23 A David na kna mbo, “Ni wolo, yaa jaa kre kee ŋga yo ni pan, yirɛ nyjɛ o Tafun Nyiɛkpɔɔ wre o ŋga yire na. Wre u kɛ tɔ o na, mu tia o na leele mblɛ pra o yire kolo mu sɛ pre ja. 24 Kena ndro n wa mbe taa kee ŋga e yuu ŋga na. Mblɛ pe sɛ wi o, mblɛ pee wa mu tni na o yirɛ le o, e kro we yi yɔ mbe yila.” 25 David na kre kee ŋga le mbra mu tɛɛ, a Israel leele pre na taa ki na mu pan mu su aŋga na.

26 Ŋga David na ndru mu sɛ le Ziklag na kre, wra yirɛ nyjɛ pra ta ŋunɔ yire yɛ yɔ, na pe sɛ u nɔɔlɔ mblɛ pe pe Judah loplombo pre ŋga, mna kla mu taa yi na mbo, “Yirɛ nyjɛ o sɛ wi na Nyiɛkpɔɔ loŋgoolo pre ni mu ta yire, e wee yi kre.” 27 Wra tia pra sɛ yirɛ yire yɛ ni mna sɛ Bethel leele, na leele mblɛ praa wa Ramoth na, na shie Judah tapan haa pre ŋga, pre na Jattir leele ni. 28 Yirɛ yire yɛ na sɛ Aroer na, a yɛ na sɛ Siphmoth na, a yɛ na sɛ Eshtemoa na, 29 a yɛ na sɛ Racal na, Jerahmeel leele pre nu, na Canaan leele pre nu. 30 Pra sɛ yɛ ni leele mblɛ praa wa Hormah, na Bor-Ashan, na Athach na, 31 na Hebron na. Chiɛ nyjɛ na David na u wolo pre na kila mu tro yire kro, wra tia yirɛ yire yɛ na da wa.