1 Samuel 29

Philistine Leele David Je

Philistine ŋunɔwifɛɛnlɛ pre kro na pan mu ble Aphek na, a Israel leele na sɛ ble Jezreel blo kre lawee. 2 Philistine ŋulo kunɔ pre na pe wifɛɛnlɛ naa nyaari feko feko. Plɛɛ naa wa feko lafaa lafaa, a plɛ naa wa feko kagbenyi kagbenyi. A David na u leele pre na ŋunu Achish na kro tɔ. 3 A Philistine ŋunɔwifɛɛnlɛ loplombo pre na pe nya mna yo mbo, “A yira ŋgi Hebrew leele mblɛ chaa mna hin?”

A Ŋunu Achish na yo mbo, “Blɔ ŋmba pe yeeri David kre, Israel ŋunu Saul sumifun na wi, a ŋga u pan ni pan mna u bleshiin kun, a mu yire ŋga u pan mu tni ni pan u n sisaa ka pe a ni nya.”

4 Philistine ŋunɔwifɛɛnlɛ loplombo pre krɔ na kun na Achish ni, a pra yo u pan mbo, “Ti mbe blɔ wre na u leele pre ndru mbe sɛ tni chia ŋga mu pe ŋga kre na, maa ti mbe u taa o na mbe sɛ ŋunɔ. Kie jaa pan na na ŋunɔ kre wɛɛri, we kna mbe wi mbe o taan. Kre kee ŋga we jaa ti mbe u tafun wre yiɛ shɔ u na na. 5 Ŋgi na hin? Wre David ŋmba chiɛlɛ na le mɛɛ nu, na yoo na yuu na,

David gbo leele kagbenyi kɛ,

a Saul gbo kagbeŋge.”

6 A Achish na David yeeri mna yo u pan mbo, “Ni o Tafun Nyiɛkpɔɔ ŋmba uu wa wre da, na ŋga mi na ŋu tni, ni kaan mu na, a ki tna ni pan na mu ya ni na mbe o sɛ ŋunɔ kre nu. Mu yire ŋga ble mu pan, a mi na ŋu tni, ni n kee sisaa ka nya mu na. La, ŋulo hamblɛ pre n na chaa mbe mu chaa o nu mbe sɛ ŋunɔ kre nu. 7 Kena ndru mu sɛ katoo wejinyiŋge nu, maa shia kee ka pe mbe krɔ pe kun.”

8 A David na u wie mbo, “Yira ŋgi sisaa ni pe hin? Imi na mu yo, na mu yire ŋga ble ni pan mu tni mu pan, mu n ni sisaa ka nya ŋga. Na yɛŋgɛ yi wala, kena ni n chin yira ŋga ki tia ki n fna mbe ni sɛ wi na mu loŋgoolo ni mbe mu ŋga, ni tafun.”

9 A ŋunu Achish na yo u pan mbo, “Mu kee ni yiɛ nyi na Nyiɛkpɔɔ nyjeeri bituŋu wi. La, ŋulo hamblɛ pre pe yo na pe n na chaa mbe mu chaa o nu mbe sɛ ŋunɔ. 10 Kena David, baŋga bnimi ŋu na mu wolo mblɛ e fɛ Saul pan mu pan mna kre, e gbolo e yiri e sɛ.”

11 Ŋga nyiŋge na se bnimi kre, David na u wolo pre na gbolo mu yiri mna ndru mu sɛ Philistine leele pre tra nu wa, a Philistine leele pre na sɛ Jezreel na.