2 A David na kna mbo, “Pan ki fna, mu sumifɛɛnlɛ lɛ wre, mu nya, kee ŋga oo pe.”

A Achish na yo “Ki tna ni pan, mbe ti mu pe ni shiefun nyjila kro nu.”

3 Kre nyjila kre, na Samuel ku fuŋga ma, a Israel leele pre na u nyɛni mu u le u chia Ramah na. A na Saul chlɛfɛɛnlɛ, na gboolo yeerifɛɛnlɛ pre kun lɔɔ Israel tra kre nu kro.

4 A Philistine leele pre na pan mu ble chia ŋga praa yeeri Shunem kre mbɛɛ na mbe wi. A Saul na Israel leele pre na sɛ ble Gilboa nyua kre na. 5 Ŋga Saul na Philistine wifɛɛnlɛ pre nya kre, gbun na yɔ u na, 6 a wra o Tafun Nyiɛkpɔɔ wie ŋga ki fna u pe. A o Tafun Nyiɛkpɔɔ wre nsra yire ŋunɛ, ndee kɛɛn tɛɛ na, ndee mna yire u keenyanyofɛɛnlɛ na, mna kee ka yo u pan. 7 A Saul na yo u loplombo pan mbo, “E sɛ chlɔ ŋmba u gboolo wie cha, e pan e ni ŋga mbe u chlɛ ni pan.”

A pra yo mbo, “Pe waa wa Endor na.”

8 A Saul na u yirɛ chinɛ mna fɔnyi le, mbe pia u chin. A wre na u leele pre shiin na sɛ chlɔ wre pan blee, a wra yo chlɔ wre pan mbo, “Maa, gboo ŋmba mɛɛ mbe yeeri mu pan ŋga, u yeeri mbe u pan mbe ni nyina kee ŋga kie pan.”

9 A chlɔ wre na yo u pan mbo, “Ŋu titi mu chin kee ŋga ŋunu Saul na pe, mna gboolo wiefɛɛnlɛ, na chlɛfɛɛnlɛ kun lɔɔ Israel tra ŋga nu kro. Kre mu paan mbe mi pɛɛri pɛlɛ mbe u ni gboo?”

10 A Saul na yo mbo, “Ŋga o Tafun Nyiɛkpɔɔ wa ŋga, na mu ki pe, ma ndie tiniɛ ka ta.”

11 Bawa chlɔ wre na kna mbo, “Gboo ŋmbi mu chaa mbe ni yeeri hin?”

A wra yo mbo, “Samuel yeeri.”

12 Ŋga chlɔ wre na Samuel nya kre, a wra gble fɔɔri mu le mbo, “Mni a mu ni fana imi hin? Ŋunu Saul wi ŋu!”

13 A wra kna mbo, “Maa fiɛ, yira ŋgi mu nya hin?”

A chlɔ wre na yo mbo, “Ni ŋumu ka nya, na ki yili tra na paan.”

14 A wra chlɔ wre wie mbo, “Mni sembremu ki nyi hin?”

A wra yo mbo, “Ki pe na blɛlɔɔ u yilii na paan, mu dodoŋgi tutnɔŋɔ le.” Saul na chin na Samuel wi, a wra kosie kan tra u yiɛ.

15 A Samuel na yo Saul pan mbo, “Mni a mu ni tɔɔra mu ni yeeri a ni ndru mu pan hin?”

A Saul na yo mbo, “Keshian ka ki ni da. Philistine pe pan mbe wi na ni ni, a Nyiɛkpɔɔ krɔ kna mu wa ni na. Hali u n nyu kun na ni ni, ndee mu yire u keenyanyofɛɛnlɛ pre, ndee ŋunɛ na mu paara na ni ni. Kre na ni mu yeeri mbe mu paan ni nyina kee ŋga mbe pe.”

16 Na o Tafun Nyiɛkpɔɔ wre krɔ kna mu wa mu na, a mu sɛ kaari u loŋgo, kena yira ŋgi na mu jawala chaa ni pan hin? 17 Kee nyjɛ o Tafun Nyiɛkpɔɔ na yire ni na mu yo mu pan yire nyjila ki da. “U mu ŋunumu kre shɔ mu kɛɛ jaŋga na, mu mu chinfun David ŋga ki yi. 18 Mna o Tafun Nyiɛkpɔɔ nyu kee je, a mu nsra u krɔkuɔn sisaa kre wɔ mu Amalek leele pre nyina, mna pre na pe yirɛ kro kla. Kre ki tia wra kre kee ŋga pini mu na kre. 19 We ŋu na Israel leele pre le Philistine kɛɛ. Baŋga ŋu na mu bibilɛ pre we ni kɔŋgɔ ni kuulo ndoo mna. A o Tafun Nyiɛkpɔɔ wre we Israel leele ŋunɔwifɛɛnlɛ pre kro le Philistine kɛɛ na.”

20 Titɛɛ kre nu to, Samuel kee ŋga wra yo kre na fiɛrɛ kpɔɔ titi wo Saul na, a wra to mu sni tra mu fraka. Wra pe yiɛyiɛ. Ŋgi na hin? Na u n yaka le nyuu ble poŋgo kre, na blee kre kro.

21 A chlɔ wre na yiri mu da u na, mna u nya na u seeri, a wra yo u pan mbo, “Ni tafun, ni ŋmaa ni wa jenyje mu tɛɛ mu ŋga mu yo ni pe kre pe. 22 Kena, jande, kee ŋga mbe yo ŋga loo mu ni ŋga. Ti mbe ni sro ka pe mbe mu ŋga, na mu n li ma faŋga ta mbe ndru mbe sɛ.”

23 A Saul na je, u nsraa chaa mbe yaka ka. La, u leele pre na ya chlɔ wre na a pra u le gbeŋmbaa, a wra ki nɔɔ loo, mna yiri tra, mna tni dɛŋglɛ na. 24 Na chlɔ wre nuu pɔ wa pɔɔri, a u nyina le, a wra u gbo titɛɛ kre nu. Mna paanu mimi cha, mna paanu ŋga nu yiisi n wa pe, 25 mna sro kre pe mu tɛɛ Saul na u loplombo pre yiɛ, a pra li, mna yili wa blee kre.