David Naa Wa Philistine Na
27
David na u jawala pe mbo, “Na ni n dɔɔta, Saul we ni gbo brikana na. Kena ŋga ki fna ni pe yi na, mbe fɛ mbe sɛ tni Philistine na. Kre Saul we laa ni kro mbe ni wuu.” 2 Titɛɛ kre nu, a David na u wolo lafɛɛ kɔɔnanu pre na sɛ Gath ŋunu Achish ŋmba lɛ praa yeeri Maoch wre pan. 3 A David na u wolo pre, na pe sele wolo pre na sɛ tni wa. Wre na u chiɛlɛ shiin pre na lɛ, u chɔ Ahinoam ŋmba wra yiri Jezreel na kre, na Abigail, Nabal lekuchɔ wre, ŋmba wra yiri Carmel na kre. 4 Ŋga Saul na loo na David fɛ mna sɛ Gath na kre, u nsra u kɔŋgɔ ni na.5 A David na yo Achish pan mbo, “Na mu chin na mu nunu wi mi kre, kena ni nyina see chiɛ yire ka mbe ni sɛ tni wa. Ki n fna na mi mu sumifun na ŋu we chaa mbe tni ŋunu chia ŋga na.” 6 Ki ble kre, Achish na u ŋga chia ŋga pe yeeri Ziklag kre, a wra sɛ tni. Ki tia chia kre kaari Judae ŋulo chia mu pan mu su aŋga. 7 A David na tni Philistine na nyiɛpɔ kɛmbɔkɔɔnanu.
8 Nyjila ŋga ni David na u wolo pre naa wa wa kre, pra sɛ Geshur, na Girzi, na Amalek leele mblɛ praa wa tra kre nu wa pre tɔ. Leele pre naa wa mu tni tra kre nu fa, hali praa wa mu sɛ su Shur na, mu sɛ yili Egypt tra nu. 9 Pra bilɛ, na chiɛlɛ mblɛ praa wa wa gbo peii, mna pe nui, na mbaala, na bubunlɔ, na nyuuma, na pe yonyi kro koli, mna sɛ na yi ni mna sɛ yi tɛɛ pe lawee, mna chin mu sɛ Ŋunu Achish bɔ mandiɛ. 10 A wra pe wie mbo, “A sena e sɛ yirɛ koli aŋga hin?”
A David na kna mbo, “Judae chiɛ nyjɛ yii wa na shie tapan haa kre, na Jerahmeel jlom leele, na Canaan leele pre tra nu o sɛ.” 11 David nsra ndro nunu chom ti, wra pe gbo peii, imi kie pe mbe ndro wa kro mbe paan mandiɛ bɔ Gath na. Nyjila ŋga David na li Philistine tra nu krɛrɛ kre, tnumu ŋga wraa tuni na yi. 12 La, ŋunu Achish na David shɔnli, mnaa jawa na u leele Israel leele pre ni u shie na wii, a wra chin na kie ti mbe pe u pra, mbe ki ti u kro mbe pe u sumifun nyjila kro nu.