David Saul Ta Mu U Ti Na
26
Bilɛ plɛ na yiri Ziph na, mna pan Gibeah na mu pan mu yo Saul pan na David wa mu ndra nyua Hachila na, na mbra Judea fimi lawee kre nu. 2 A Saul na Israel ŋunɔwifɛɛnlɛ kagbenyi taarɛ mblɛ pe wi mu chin titi wɔ, mbe pe sɛ Ziph fimi lawee kre nu mbe sɛ David cha. 3 Pra sɛ pe tni haa pɔ nyua Hachila kolo mbɛɛ na. Na David wa fimi lawee kre nu tɛ. A ŋga wra loo na Saul pan na u haa chaa kre, 4 a wra leele tun a pra sɛ ju mu Saul le na uu wa wa yɛŋgɛ. 5 A David na yiri mna sɛ Saul nya pe tnihaa wa yɛŋgɛ, mna u lawee nya, na wre na Ner pɔ Abner wre, Saul ŋunɔwifɛɛnlɛ lopom wre pee wa mu sni na ŋnu pe tnihaa wa, a ŋunɔwifɛɛnlɛ pre na pe fɛ mu kun.6 A David na Hittite ndro Ahimelech, na Zeruiah pɔ Abishai wie mbo, “E kro shiin ŋmbi we taa ni kro mbe sɛ Saul tni haa wa hin?” A Abishai na yo mi na ŋu we sɛ. Abishai lo pɔ na wi Joab.
7 Ki ble kre blee David na Abishai na sɛ Saul tni haa wa. Ŋga pra da wa kre, pra nya na Saul wa mu sni na ŋunu u ŋunɔwifɛɛnlɛ pre lalaa, a u chomboo wa mu kan u ndra nyjeeri haa. Na Abner na wifɛɛnlɛ hamblɛ pree wa mu sni u jaara.
8 A Abishai na yo David pan mbo, “Nyiɛkpɔɔ mu loŋgo le mu kɛɛ blee ŋga. Ti mbe ni wre titi chombo kɔ mbe u su na ki ni gbee nunu chom mbe mbra tra. Mba u su na ki ni gbee shiin kple.”
9 La, David na yo u pan mbo, “Maa shia u pe yaka. O Tafun Nyiɛkpɔɔ wre we ŋmba we u ŋunu ŋmba u wɔ wre pe yaka wre ndie tini.” 10 A David na yo mbo, “O Tafun Nyiɛkpɔɔ ŋmba u le wre saara na, ni chin na wre titi we Saul gbo. Na u n u gbo ŋunɔ kuraa, na u nyjila waa da, we ku. 11 Nyiɛkpɔɔ we ni kisi, mba ŋunu ŋmba wre titi wɔ wre pe yaka. Ti mbe o u chombo, na u nyumu le yira ŋga u tɛɛ u ndra nyjeeri yire wru mbe sɛ.” 12 A David na Saul chombo kre wru, mna u nyumu le yira kre wru mu ya. A wre na Abishai na krɔ kna mna sɛ. Ndro wa nsra chin kee ŋga ki pe wa, a pe wa nsra nyi. Pe kro na sni gblulu. Ŋgi na hin? O Tafun Nyiɛkpɔɔ wra tia ŋunumu kre na pe wru ma.
13 A David na sɛ kna nyua kre kokoo ka na, mna nduu ki ndra na. Ŋga pra lalaa wa pre na Saul pan kre, 14 a wra yire wa mna gble le mu Saul ŋunɔwifɛɛnlɛ pre na Abner yeeri mbo, “Abner, mu ni mana ndru ŋgaa?”
A Abner na kna mbo, “A ndro ŋmbi nunu u gble mbe ŋunu nyi o pan ŋga hin?”
15 A David na kna mbo, “Abner, ŋu ma leele yuu na blɔ wi ŋu Israel tra nu kree? A ŋgi ki tia mu n ja mu mu tafun ŋunu shie ŋga na hin? Ndro pan e tnihaa wa mbra u gbo. 16 Abner, mu n ja mu mu tnumu tun, ni o Tafun Nyiɛkpɔɔ ŋmba u le wre da na ki fna mbe e kro na ku. Ŋgi na hin? E n ja mu e lopom ŋmba o Tafun Nyiɛkpɔɔ wre wɔ ŋunu wre shie. E le, sena e tafun wre chombo kre nyi hin? A sena u nyumu gbolo ŋga kraa wa mu tni u ndra nyjeeri kre nyi hin?”
17 Saul na David mana chin mna yire wa mna u wie mbo, “Ni pɔ, David, ŋu wi woo?”
A David na kna mbo, “Ɛnhɛɛn, ni tafun, mi wi.” 18 A David na yo mbo, “Mni a mu je na mu sumifun kɔŋgɔ ni ni tɛ hin? Yira ŋgi ni pe hin? Ndee kefɔɔn ŋgi ni pe hin? 19 Ni tafun, ni kee ŋga mbe yo ŋga loo. Na o Tafun Nyiɛkpɔɔ wre u tia mu yiri mu ni taan waa, kena mbe sra wɔ mbe u ŋga, mbe u ti mu mu jawala chinɛ. La, na leele pe tia kre, kena o Tafun Nyiɛkpɔɔ wre suŋgɔ we pe yii. Ŋgi na hin? Pe ni ni mu yili o Tafun Nyiɛkpɔɔ wre tra nu, mbe ki ti ni sɛ kafinɛ nyiɛkpɔɛ sumi. 20 Yaa ti mbe ni ku mbe fun plɛ tra nu finfin. Yira ŋgi ki tia ŋu Israel ŋunu wre na ni chaa mbe gbo ŋga hin? Mi wi ŋmba na pujiɛn wi. Mu ni chaa na tro na bɔfɔ numblɔ chaa nyuɛ lawee.”
21 A Saul na kna mbo, “Ni pɔ, ni sisaa pe, ndru mu pan katoo, mba mu pe sisaa na. Ŋgi na hin? Mu tia ni ŋmaa li blee ŋga. Ni jijiere kee pe, mu punu mu na tataara.”
22 A David na kna mbo, “Mu chombo kre yi kre ni tafun. Ti mbe mu yirifumblɔ pre nunu pan mbe ki shɔ mbe sɛ mu ŋga. 23 O Tafun Nyiɛkpɔɔ wre leele mblɛ pe kpra lii, mu fraka pre kaan fɔtɔɔrɔ chichie. Aŋga o Tafun Nyiɛkpɔɔ wre mu le ni kɛɛ, la, ni n kɛ taa ŋu ŋmba u wɔ ŋunu wre na. 24 Imi na ni mu ti a mu ŋmaa li aŋga ŋga, o Tafun Nyiɛkpɔɔ wre u ti mbe ni ŋmaa li ma, mbe ni shɔ mbe yili kanyana kro nu.”
25 A Saul na yo David pan mbo, “Ni pɔ, Nyiɛkpɔɔ we mu dwan. Kee ŋga mu pini kro we nyu mbe mu ŋga.”
A David na sɛ u lawee, a Saul na ndru mu sɛ u katoo.