David na ndru mu sɛ fimi lawee ŋga praa yeeri Paran kre nu. 2 Blɔ wa na yiri Caleb sele nu, u mɛɛ naa Nabal, a wra yiri Maon na. Wraa wa na tra ni chia ŋga pe yeeri Carmel kre na. 3 Blɔ wre, swafun titi na wi. Wraa mbaala kagbenyi taarɛ, ni a u sikaala naa kagbeŋge nunu. U chɔ mɛɛ na yi Abigail, wra nyu mna kala chin. La, u plɔ wre kepele nsra nyu, a u krɔ nsra mɔɔ na kuun. Nabal wre naa wa Carmel na wa na u mbaala yooro knumu.

4 David naa wa fimi lawee kre nu mna Nabal kee loo. 5 A David na yirifumblɔ kɛ wɔ mu tun Nabal pan Carmel na, na pe sɛ u shaari u pan. 6 Wra yo bitumblɔ pre pan na pe sɛ yo Nabal pan na, “David yo na u mu shaari, mbo ‘Nyiɛkpɔɔ we mu ndra tun tɔɔnrɔ, mbe ŋu na mu sele leele kro pe gbaŋmba.’ 7 U loo na muu wa na mu mbaala yooro knumu. U chaa mbe mu chin na wre na mu mbaala lefɛɛnlɛ pre na tni titɛɛ, a o nsra pe pe yaka, a pe yaka nsra fun, nyjila ŋga nu pra tni Carmel na kre. 8 Hali na mu pe wie, pie ki yo mu pan. O pan ble kpɔɔ na, a David yo na mu o le chiriri. Kena o ŋga yira ŋga mu ja, mbe o sɛ ka ni mbe sɛ mu nunu David ŋga.”

9 David bitumblɔ pre na sɛ mandiɛ kre bɔ Nabal pan, mna tni wa chiɛri.

10 A Nabal na yo pe pan mbo, “Ŋmbi pe yeeri David hin? Ni n da mu u kee loo tun. Ble shiin ŋga nu, tinlɛ mblɛ pe fɛ pe tafɛɛnlɛ pan, nɛɛ chia ŋga na. 11 Mba jaa ni sro, na ni nyumu, na ni kaara nyjɛ ni tɛɛ ni mbaala yooro knumufɛɛnlɛ pan wru mbe leele mblɛ yiri haa ni n chin ŋga.”

12 David bitumblɔ pre na ndru mu sɛ Nabal mandiɛ kre bɔ u pan. 13 A David na kna mbo, “E eyɛ kna, e e brɔfiɛnlɛ ŋunu wru e pɔ pɔ sɛlɛ.” A pe kro na yiri mna peyɛ kna, a David na u wo wru a pra sɛ. Wre na bilɛ lafɛɛ jijirɛ pra sɛ, a pra lafɛɛ shiin ti pe tuuro jaara.

14 Nabal sumifɛɛnlɛ pre nunu na sɛ yo Abigail pan mbo, “Mu kee ŋga ki pan loo ŋgaa? David yire fimi lawee yire nu, mu leele tun o tafun pan na u u shaari, a u pe tɛɛlɛ. 15 Nde, pre leele pre na nyu o na, pe n sra o pe sisaa ka, nyjila ŋga ni wre na pre naa wa nyaa kre, hali, o yaka nsra da mu fun o pan. 16 Pra kɛ tɔ o na lafo na blee, nyjila tataara ŋga wre na pre naa wa nyaa wa, a o naa mbaala le kre. 17 Kena kre kee ŋga jawa mu le ŋga ki fna mu pe. Kre kee ŋga we jaa pan na kala ni o tafun na u sele leele kro na. A u pe ndro ŋmba u ndra sheli, wra ndro kala shɔ mbe ya u wo na.”

18 A Abigail na pe nyaanyaa mna sɛ paanu lafɛɛ shiin wru, mna simi gbɔwo wru yurɔ hlɛ gboelee nyini shiin, mna tia pra mbaala kunɔ gbo mu pe ŋɔni. Mna tia pra bleju kra kilo kɛmbɔkɔɔnashin, na tre sɛnyi nyjɛ ni pe simi pini yire pɔmu lafaa, na fig tiŋge sɛnyi yua wee nyjɛ pra klo klo lafɛɛ shiin pɔ mna taa bubunlɔ na. 19 A wra yo u sumifɛɛnlɛ pre pan mbo, “E yiɛklu e na shie mbe ni taa e kro.” La, u nsra kee ka yo u plɔ Nabal pan.

20 Chlɔ wre na u bubnɔ nduu mna tro nyuɛ ndoo foo ka nu, a David na u wolo pre naa nyua kre tri mna da wa. 21 David naa kee ka jawa na, “Yira ŋgi kuraa ki tia ndaa sɛ blɔ ŋmba yirɛ shie fimi lawee kre nu finfin ŋga hin? Hali a u yaka n na fun. A yaa ŋga ndaa ya u na kre kɔkro ni, fɔtɔɔrɔ ŋga ni ta yi tɛɛlɛɛ. 22 Na nyiŋge waa se bnimi na ni n u leele pre bilɛ pre gbo peii, kena Nyiɛkpɔɔ u ni gbo.”

23 Ŋga Abigail na David nya kre, a wra pe nyaanyaa mna tii u bubnɔ wre na mna sɛ kosie kan David yiɛ, mna yiɛ juule tra. 24 Mna kna mu yo David pan mbo, “Ni tafun, jande ndie tɛɛ ni pan, kala ŋga yi kpan, ni tio ki yi. 25 Jande maa ndie tɛɛ kee ŋga Nabal yo mu na kre na, ndro bie ma. U mɛɛ ŋga u li kre kuraa nyina na daŋgo wi. Nyjila ŋga ni mu bitumblɔ pre pan kre, na ni n wa katoo.

26 O Tafun Nyiɛkpɔɔ wre u n tia mu mu loŋgoolo gbo mu fɔlɔ tɔ. Ni o Tafun Nyiɛkpɔɔ ŋmba u le wre da, na mu loŋgoolo, na mblɛ pe mu chaa sisaa ni kpan, Nyiɛkpɔɔ u pe ndie tini, imi na mu chaa mbe Nabal ndie tini kre. 27 Jande, ni tafun, yirɛ nyjɛ ni ni pan mu pan ŋga shɔ mu mu leele pre ŋga. 28 Jande, sisaa ŋga ni mu pe kro ti mu ni kɛ. O Tafun Nyiɛkpɔɔ we mu pe ŋunu, ŋu na mu nɔɔ leele ni kro. Ŋgi na hin? U ŋunɔ mu wii kre, a ma sisaa ka pe ble nyjɛ mu li tra ŋga na. 29 Na ndro chaa mbe wi na mu ni mbe mu gbo, o Tafun Nyiɛkpɔɔ wre we kɛ tɔ mu na, imi na lewo kɛ toni u yirɛ chichiele na kre. A mu loŋgoolo pre, Nyiɛkpɔɔ we pe viŋge mbe wa, imi lewo dnɛ leni vuŋmbɔ nu mbe ki viŋge mbe wa kre. 30 A na o Tafun Nyiɛkpɔɔ wre waa yirɛ chichiele nyjɛ nyu u yo yire pe mu mu ŋga mu kɔ, maa mu pe Israel leele ŋunu kre, 31 ma ndachiɛn yo na mu linku finfin, ndee ŋu titi mu lewo sisam fɔlɔ tɔ u na. A na o Tafun Nyiɛkpɔɔ waa tia u nyu yoo kre pe ma, jande maa shia ni fɛɛ.”

32 A David na yo Abigail pan mbo, “O Tafun Israel leele Nyiɛkpɔɔ wre ŋga mɛɛ, na u tia mu pan mu ni fni aŋga. 33 Ni Nyiɛkpɔɔ kaan mboo kachindɛ ŋga u mu ŋga kre na, na jawala ŋga mu ni ŋga aŋga, mu ni wɔ linkuuro kee nu, a ni n kɛ tini mu lewo sisam fɔlɔ tɔ u na. 34 O Tafun Nyiɛkpɔɔ u yo na mbaa mu pe sisaa. La, ni da Israel Nyiɛkpɔɔ ŋmba uu wa wre na, na yili ma mu yili nyaanyaa, mu pan mu ni fni, kaa nyiŋge naa yo kie se bnimi, na ni Nabal na u leele pre kro gbo peii.” 35 A David na yirɛ nyjɛ ni wra pan u pan yire shɔ, mna yo u pan mbo, “Ndru mu sɛ katoo, maa shia ti kee kre mu jawala tɔɔra na. Ŋga mu chaa kre mbe ki pe.”

36 A Abigail na ndru mu sɛ Nabal pan. Ŋga wra sɛ le kre, na pe sukpɔɔ pe wra lii na ŋunu wi, mna gbɔ mu to, na yɛshɔɔrɔ kee pini. Ki tia Abigail nsra kee ka yo u pan, wra tia nyiŋge na se bnimi. 37 Ŋga nyiŋge na se, a u yiɛ na to kre, u chɔ wre na u bɔ mandiɛ kre. Ŋga wra kee kre loo kre, a gbun na yɔ u na, a wra foli mu to tra, a u wejiŋge na ku u na titrii, wa jaa yaka pe. 38 Kie pe ble kɛ kɔkro kre, a Nyiɛkpɔɔ na tia wra ku.

39 Ŋga David na loo na Nabal ku kre, a wra yo mbo, “O Tafun Nyiɛkpɔɔ wre wo yi mɛɛ na u Nabal fɔlɔ tɔ tɛɛlɛɛ ŋga wra ni tɛɛlɛ kre na, a u n tia mi u sumifun a ni sisaa pe. A Nyiɛkpɔɔ Nabal ndie tini u sisam ŋga u pe na.”

A David na leele tun Abigail pan na u u chaa mbe leŋge. 40 A bitumblɔ pre na sɛ u pan Carmel na mna sɛ yo u pan mbo, “David yo o paan mu wru mbe sɛ mbe u mu leŋge.” 41 A Abigail na kosie kan mu yiɛ juule tra mna yo mbo, “U sumifun wi mi, a mbe jaa u sumifɛɛnlɛ jeelee je.” 42 A wra yiri nyaanyaa mna nuu u bubnɔ na, mna u tnichiɛlɛ kunɔ wɔ na, a pre na David sumifɛɛnlɛ pre na sɛ, a wra sɛ pe u chɔ.

43 Kre nyjila kre, na David chɔ wi Ahinoam ŋmba wra yiri Jezreel na kre, a Abigail na pan mu ya. 44 Kre nyjila kre, Saul na David chɔ Michal wru mu Paltiel ŋga a u leŋge, Palti lɛ mɛɛ na yi Laish, a wra yiri Gallim na.