David Na Saul Pe Chichie
24
Ŋga Saul na sɛ wi na Philistine leele pre ni mu kɔ kre, pra yo u pan na David wa En-Gedi fimi lawee yire nu. 2 A Saul na Israel ŋunɔwifɛɛnlɛ mblɛ pe wi mu chin kama kagbenyi taarɛ wɔ, a pra sɛ na David na u wolo pre chaa na tro dnɛ nyjɛ praa yeeri “nyaalam sikaala” yire mbɛɛlɛ na. 3 Saul na sɛ da mbaala nagbɛɛ yɛ lawee, na dnɛ wee kaa wa kolo mbɛɛ na. Na kaan sɛ la u ta, a wra sɛ le ki nu. A na kre nu David na u wolo pre sɛ ndra, na pee wa ki nɔɔ na kpɔklɔ. 4 Bawa David wolo pre na sɛ u da mna ju mu yo u pan mbo, “Le, O Tafun Nyiɛkpɔɔ na yo mu pan na, we mu loŋgo wɔ mbe le mu kɛɛ mbe mu u pe imi na mu chaa, ki ble kre yi aŋga, kena yiri.” A David na ju fɛɛ mna sɛ Saul dodoŋgi titnɔŋɔ nyu yii mu ki kun. 5 Ŋga wra ki kun mu kɔ kre, gbun na yɔ u na, na u Saul dodoŋgi nyu ju mu kun. 6 A wra kna mu yo u wolo pre pan mbo, “Nyiɛkpɔɔ we ni kisi na mbe ni tafun ŋmba o Tafun Nyiɛkpɔɔ wre wɔ na u pe ŋunu wre pe sisaa.” 7 A David na u wolo pre jaari na pia shia Saul pe sisaa ka. A Saul na yiri mna yili dnɛ wee kre nu na shie. 8 A David na yili wee kre nu mu taa Saul na, mna u yeeri mbo, “Ni tafun, Saul.” A Saul na viŋge mu kna, a David na kosie kan mna yiɛ juule tra, 9 mna yo u pan mbo, “Mni a mna leele nyu kee nyjɛ pe yuu ndru na, mi David mu chaa mbe mu pe sisaa hin? 10 Ŋu titi nya fuŋgaami imi na o Tafun Nyiɛkpɔɔ wre mu le ni kɛɛ dnɛ wee kre nu. Hali ni leele pre plɛ yo na ni mu gbo, a ni je na mba jaa mu pe sisaa. Ŋgi na hin? O Tafun Nyiɛkpɔɔ u mu wɔ ŋunu. 11 Ndoo, le, mu dodoŋgi ŋga mu le kɔɔn yi ni kɛɛ kre, mbe na jaa mu gbo, a ni mu ti mu sɛ mu dodoŋgi kokoo kun. Ŋga kie ti mbe mu chin na, ni n ni jawala pe na mbe yiri mbe mu taan, ndee mbe mu pe sisaa ka. Ŋu mu kila na ni chaa mbe gbo, nde ni n mu pe fɔɔn ka. 12 Mi na ŋu, ŋmba u u ŋmbrɔ jawa sisaa ni kro, o Tafun Nyiɛkpɔɔ wre we u fɔlɔ tɔ. We mu ndie tini kee nyjɛ mu ni pini ŋga na, la, mi n jawa na mbe mu pe sisaa fio. 13 Loplombo kee ka yuu mbo, ‘Sisaapefɛɛnlɛ, pre pe sisaa pini nyjila kro nu.’ Ki tia mi rɛ, mba mu pe sisaa fio. 14 Ndro ŋmbi kɔŋgɔ Israel ŋunu nini na u chaa mbe gbo ŋga hin? E ndro ŋmba u nini le rɛ, yaka ndro ma mi, pan ni nyi na, nyukuan gboo, ndee pujiɛn wi. 15 O Tafun Nyiɛkpɔɔ we mi na ŋu lalaa kpra kun, mbe chin ŋmba u sisaa pe. Wre we kee kre li mbe ni ŋga tam, mbe ni shɔ mu kɛɛ.”16 Ŋga David na paara a u nyu na to kre, a Saul na kna mbo, “Ni pɔ David, ŋu titi wi oo!” To, a yotunyi naa woni Saul pan. 17 A wra kna mu yo David pan mbo, “Mu fraka mu wɛ ni na. Mu ka pe mu ni ŋga, a ni je na kee ŋga ki n fna pini mu na. 18 Aŋga mu ni nyina na mu nyu ni na. Ŋgi na hin? O Tafun Nyiɛkpɔɔ ni le mu kɛɛ, la, mu n ni gbo. 19 Na ndro loŋgo to u kɛɛ, we u wa mbe u sɛ mbe wa u pe yaka ra? O Tafun Nyiɛkpɔɔ wre u mu dwan kee ŋga mu pe mu ni ŋga aŋga ŋga na. 20 Fuŋga ni chin na mu pe ŋunu Israel leele nu yɛŋgɛ, a mu ŋunumu kre we sɛ yiɛ. 21 La, o Tafun Nyiɛkpɔɔ wre mɛɛ tɛɛ mu da mu ni ŋga, na ma mi na ni nɔɔ leele gbo, imi kie pe mbe ni nɔɔ leele wa fun.” 22 A David na da, na wa pe pe yaka. A Saul na ndru mu sɛ katoo, a David na u wolo pre na ndru mu sɛ lawee ŋga nu pra sɛ ndra kre nu.