A o Tafun Nyiɛkpɔɔ wre na yo u pan mbo, “Sɛ wi na pe ni, mu Keilah leele pre shɔ pe kɛɛ.”

3 A David wolo pre na yo u pan mbo, “Ŋga oo wa mu tni Judah na mna ŋga fiɛrɛ ki o yii, a o tni na le kre, a mu ndru na yuu na o sɛ Keilah na mbe sɛ wi Philistine ni.” 4 A David na ndru mu o Tafun Nyiɛkpɔɔ wre wie na. A wra yo u pan mbo, “Sɛ Keilah na mu sɛ wi na Philistine leele pre ni, mbe pe le mu kɛɛ.” 5 A David na u wolo pre na sɛ Keilah na, mna sɛ wi mu Philistine leele pre tataara gbo, mna pe yurɛ shɔ pe pan. Ki tia wra Keilah leele pre ndra lɔ.

6 Ŋga Abiata naa feni mbe sɛ David pan Keilah na kre, wra sɛ na u srawɔɔ dodoŋgi kre ni wa.

7 Pra sɛ mandiɛ bɔ Saul pan na David wa Keilah na, a wra yo mbo, “Nyiɛkpɔɔ u le ni kɛɛ mu kɔ. David uyɛ pɛɛri pɛlɛ mu sɛ tni chia ŋga pe buŋgo sin mu fɛ mu kun, mu krɔ ŋga kii faŋga ni mu ja na kani le ki jlonwee na.” 8 A Saul na u ŋunɔwifɛɛnlɛ pre kro yeeri mu fni, mna yo pe pan na u chaa mbe pe sɛ Keilah na, mbe sɛ chia kre fɛ mbe kun mbe David na u wolo pre yii.

9 Ŋga David na loo na Saul jawala sisaa le na u ni kre, a David na yo srawɔfun Abiata pan mbo, “Sɛ srawɔɔ dodoŋgi kpro kre wru mu pan, mbe o ki tɛɛ mbe o Tafun Nyiɛkpɔɔ wie.” 10 A David na kna mbo, “O Tafun Nyiɛkpɔɔ, Israel leele Nyiɛkpɔɔ, ni loo na Saul pan mbe paan Keilah tɔ, mbe ki kla, mi mu sumifun ndra na. 11 Kena Keilah leele we ni wɔ, mbe le Saul kɛɛ ra? A yɛŋgɛ Saul chaa mbe pan imi na ni ki loo ŋgaa? O Tafun Israel leele Nyiɛkpɔɔ jande nyu kun na ni ni.” A o Tafun Nyiɛkpɔɔ na yo u pan mbo, “Saul we pan yɛŋgɛ.” 12 A wra ndru mu wie mbo, “A Keilah leele we mi na ni wolo pre wɔ mbe le Saul kɛɛ ra?”

A o Tafun Nyiɛkpɔɔ na yo, “Ɛnhɛɛn, pie e wɔ mbe Saul ŋga.” 13 Ŋga David na loo ma kre, a wre na u wolo pre, na pee leele lafɛɛ, kɔɔnanu a pra fɛ mu yili Keilah na, pe nsra titɛɛ ta mu tni. Ŋga Saul na loo na pe fɛ mu yili Keilah na kre, u nsra sɛ wa na.

14 David na fɛ mna sɛ ndra nyambie lawee ka nu, kra mbra fimi lawee chia ŋga praa yeeri Ziph kre na. A Saul na u haa cha chiin, la, Nyiɛkpɔɔ nsra u le u kɛɛ. 15 David na nya na Saul kila na u chaa mbe gbo. Ki tia David na sɛ tni chia ŋga praa yeeri Horesh kre na, kraa wa mu mbra fimi lawee chia ŋga praa yeeri Ziph na. 16 A Jonathan na David kɔŋgɔ ni wa, mna sɛ u le gbeŋmbaa na Nyiɛkpɔɔ we kɛ tɔ u na. 17 Wra yo u pan mbo, “Maa shia fiɛ! Ni lɛ Saul wa jaa mu pe yaka. U chin u ndra na ŋu mu pe Israel leele kro ŋunu, a mi mbe kpɔɔmu lawee ta mbe taa mu na.” 18 A pe kro shiin pre na ndru mna pe nɔɔlɔ nyu nunu kre pe shiin wo na, o Tafun Nyiɛkpɔɔ yiɛ na. A Jonathan na ndru mu sɛ katoo, a David wre na kro Horesh na wa.

19 A Ziph leele plɛ na sɛ yo Saul pan Gibeah na wa na David wa mu ndra pe tra nu Horesh na, nyua ŋga praa yeeri Hachila kre na, na shie Judea fimi lawee kre tapan haa. 20 A pra ndru mu yo mbo, “O tafun, o chin na mu yiɛ nyina mna u chaa mbe yii. Pan o tra kre nu nyjila ŋga ni mu na chaa kpan, oo ya mu na mbe mu u ta mbe yii.”

21 A Saul na kna mbo, “O Tafun Nyiɛkpɔɔ wre we e dwan na e kre kee ŋga yo ni pan. 22 Kena e sɛ u haa cha chiriri, e chin na uu wa wa yɛŋgɛ. Ni loo na u yiɛ kun titi. 23 E sɛ lawee nyjɛ nu u ndrai yire haa cha e pan e yo ni pan. Mbe mi na yire ndru mbe sɛ. Na yɛŋgɛ yi na uu wa tra kre nu, mbe kila mbe u haa cha. Hali na ki pan na Judah tra kre nu mbe u cha mbe tro kro, mbe u cha.”

24 A leele na yiri mna yiɛklu Saul na, mna sɛ Ziph na. Ŋga pra sɛ le kre, na David na u wolo pre sɛ fimi lawee ŋga praa yeeri Maon, ŋga kraa wa na shie Judea fimi lawee kre tapan haa. 25 A Saul na u leele pre na pan na David chaa. David na ki loo, mna sɛ tni nyua ŋga na dnɛ badɛnyi nyi kre na Maon fimi lawee kre nu. Ŋga Saul na loo na uu wa wa kre, a wra u kɔŋgɔ ni wa. 26 Saul na u leele pre na sɛ da nyambie kre kokoo nunu na. A David na u wolo pre naa wa ki kokoo nunu na, na fiɛlɛ mbe fɛɛ shɔ Saul na u leele pre kɛɛ. Kre nyjila kre, na pe chaa mbe pe da. 27 Titɛɛ kre nu wa to, a bituŋu na Saul da mbo, “Philistine pan mu mu tra kre tɔ, kena ndru mu pan katoo nyaanyaa.” 28 A kra tia Saul na laa David kro, mna sɛ wi na Philistine leele pre ni. Kre ki tia pra kre lawee kre yeeri “Lalaa Knumu Nyambie.”

29 A David na fɛ mna sɛ En-Gedi nyumu lawee kre nu, mna sɛ ndra wa.