Saul Srawɔfɛɛnlɛ Pre Gbo Nob Na
22
David na yili nyaanyaa Gath na mna sɛ tni nyua wee ka nu, kra mbra Adullam na. U nyjɔɔlɔ, na u sele wolo na u kee loo na uu wa wa, a pra u kɔŋgɔ ni mna sɛ wa. 2 A leele mblɛ keshian yi wɛ pe na, na mblɛ pe fɔɔlɔɛ li, na yɛjeerefɛɛnlɛ na yili mna sɛ tni u pan wa, a pe kro na u pe pe lopom, leele pre naa lafɛɛ jijirɛ.3 David na yili wa mna sɛ Mizpah na, Moab tra nu, mna sɛ yo Moab ŋunu pan mbo, “Jande, ti mbe ni lɛ na ni lo pan mbe tni mu pan mna, mbe sɛ su na mbe, ŋga Nyiɛkpɔɔ chaa mbe pe mbe ni ŋga kre nya.” 4 Ŋga ŋunu wre na li ki na kre, David na u lɛ na u lo ti Moab ŋunu wre pan, mna ndru mu sɛ nyua wee kre nu, wra tni wa mu mu.
5 Ki ble ka, Nyiɛkpɔɔ keenyanyofun ŋmba praa yeeri Gad wre na pan mu yo David pan mbo, “Maa tni mna, yiri mu sɛ Judae tra nu.” A David na yiri wa mna sɛ Hereth klɔ nu.
6 Ki ble ka, Saul naa wa Gibeah na, tiŋge ŋga praa yeeri tamarisk ka jaara nyua na, na u chomboo wa u kɛɛ, a u loplombo pre u fɛ mu kun. A pra yo u pan na pe lawee ŋga nu David na u wolo pre nyi kre nya. 7 A Saul na yo pe pan mbo, “Yire Benjamin leele, e ti ni e wie. E jawa na David we e ŋga seele, na kagblɛ, mbe e pe u wifɛɛnlɛ loplombo ree? 8 Yira ŋgi ki tia e kro jawala fɔɔn wru ni na ŋga hin? A e wa n ja mu yo ni pan na ni pɔ Jonathan na David sɛ nyu nunu pe. Ni kee n e wa shian, a e wa n yo ni pan na mi titi pɔ ni sumifun David le gbeŋmbaa, a wra ni chaa mbe gbo.”
9 Kre nyjila kre na Doeg ŋmba u yiri Edom tra nu wree wa mu yire mu chaa loplombo pre nu. A wra yo ŋunu pan mbo, “Ni David nya na u sɛ Ahitub pɔ Ahimelech pan Nob na. 10 A Ahimelech na O Tafun Nyiɛkpɔɔ wie yira ŋga ki fna mbe David pe. Ŋga wra kɔ kre, a wra u ŋga nyjɛ we ka kolo, na Philistine ndro Goliath wre brɔfiɛn ŋunu kre.”
11 Kra tia Saul na leele tun srawɔfun Ahimelech na u sele leele mblɛ na lɛ srawɔfɛɛnlɛ Nob na pre pan, a pe kro na pan Saul pan. 12 A Saul na yo Ahimelech pan mbo, “Ahimelech loo.”
A wra kna mbo, “Ni ndru, ni tafun.”
13 A Saul na u wie mbo, “Yira ŋgi ki tia ŋu na David jawala fɔɔn wru na ni ni hin? A mni a mu u ŋga sro, na brɔfiɛn ŋunu hin, A mu ndru mu paara Nyiɛkpɔɔ ni u pan hin? Fuŋgaami u yiri mu ni taan na kolo chaa mbe ni gbo.”
14 A Ahimelech na kna mbo, “David u pe kprafun mu loplombo mblɛ kro nu. A mu nafun wi mu ya, a leele mblɛ pe mu sri pre lopom wi, a ndro kro u shɔnli mu katoo. 15 Yɛŋgɛ na, ndaa paara Nyiɛkpɔɔ ni u pan, a kre chiin ma jle. La, mbe mi na wre jina sisaa to mu na kre rɛ, ni tafun, maa shia kre jawa na ni ni, ndee mbe ki jawa na ni sele leele mblɛ wa ni. Ni n chin kre kee ŋga nu.”
16 A ŋunu na kna mu yo Ahimelech pan mbo, “Ki fna mbe ŋu na mu sele leele pre kro ku.” 17 A ŋunu na kna mna yo u shiefɛɛnlɛ mblɛ praa wa mu yire u jaara pre pan mbo, “E O Tafun Nyiɛkpɔɔ srawɔfɛɛnlɛ pre gbo. Pe kro na David nyu kraa nunu, a pe nsra yo ni pan na u feni, a pra ki chin na feni u feni chɔ.” La, ŋunu shiefɛɛnlɛ pre nsra sro mbe kɛ tini mbe Nyiɛkpɔɔ srawɔfɛɛnlɛ pre gbo. 18 A Saul na yo Edom ndro Doeg pan mbo, “Yiri mu srawɔfɛɛnlɛ pre kro gbo!” A Doeg na pe gbo peii. Ki ble kre, wra srawɔfɛɛnlɛ mblɛ pra srawɔɔ dodonyi le, leele fuloe jijirɛ na kunɔ gbo. 19 A Saul na tia pra srawɔfɛɛnlɛ chia Nob kre bilɛ, na chiɛlɛ, na biile, na bifimble, na pe nui, na pe bubunlɔ, na pe mbaala kro gbo chia kre na peii.
20 La, Abiata, Ahimelech biile pre wa, na fɛ mu shɔ, mna fɛ mu sɛ ya David na. 21 Wra sɛ imi na Saul na o Tafun Nyiɛkpɔɔ srawɔfɛɛnlɛ pre gbo kre yo David pan. 22 A David na yo u pan mbo, “Ŋga ndaa Doeg Edom ndro nya Nob na ki ble kre, ndaa chin na we sɛ ki yo Saul pan.” A David na kna mbo, “Na mi na pe yila mu mu sele leele kro gbo, 23 kena tni ni jaara, maa shia fiɛ. Saul mi na ŋu chaa mbe gbo, la, wa o wa ta.”