David Na Fɛ Mu Shɔ Saul Kɛɛ
21
David na sɛ srawɔfun Ahimelech pan, chia ŋga pe yeeri Nob kre na. Ŋga Ahimelech na u nya to, fiɛrɛ na u yii, a wra u fni mna u wie mbo, “Mu mandiɛ a ŋu nunu pan mna hin?”2 A David na kna mbo, “Ŋunu u ni tun na mandiɛ ka ni mbo, mbaa ti ndro ki loo. A ni yo ni wolo pre pan, na mbe pe fni lawee ka nu.
3 Kena sro ŋgi kii wa mu pan mna hin? Ni ŋga paanu kunɔ, ndee sro ŋga mu ta kpan.”
4 A srawɔfun wre na kna mbo, “Paanu waara n wa mna, fɔna paanu cheche yire chiin bɔkɔ. Mbe jaa mu ŋga yi yi na mu wolo pre n sni na pe chiɛlɛ ni bleshiin ŋga nu.”
5 A David na kna mbo, “Ni wolo pre wa n da chlɔ na bleshiin ŋga nu.” Ni wolo mblɛ rɛ, hali na tnumu waara ka tun haa o shie kuraa kre, pe peyɛ pini cheche, kena pe n yo aŋga kolo ŋga o paan ŋga.
6 A srawɔfun wre na David ŋga paanu cheche yire. Paanu nyjɛ pra pan mu Nyiɛkpɔɔ ŋga yire chiin yiraa wa. A wra sɛ yi laa tebru cheche kre na, mna sɛ paanu fɔnyi tɛɛ wa.
7 Ki ble kre, na Saul yurɛ lefɛɛnlɛ lopom ŋmba praa yeeri Doeg, a wra yiri Edom tra nu wre na pan o Tafun Nyiɛkpɔɔ sumi haa.
8 A David na a Ahimelech wie mbo, “Chombo ndee brɔfiɛn ŋunu n wa mu pan mbe mu ni ŋgaa? Ŋunu tuŋɔ kre tia ni fiɛlɛ mu ni wee ti katoo.”
9 A Ahimelech na yo u pan mbo, “Goliath Philistine ndro wre mna gbo Elah tra ŋga kraa wa nyuɛ lalaa nu wre brɔfiɛn ŋunu kii wa ni pan. Kii wa sɔfum dodoŋgi kpro kre kro, a ni ki pɔ na yoŋgo ka ni. Na mu ki chaa, mbe mu sɛ ki wru. Kre chiin yi ŋunɔwiyira mna.” A David na kna mbo, “Ni ŋga ki yi, ŋunɔwiyira chichie ka n wa mu da na ki ni.”
10 David na yili wa mna sɛ Gath ŋunu Achish pan Philistine tra nu. 11 A ŋunu wre loplombo na fni mu u wie mbo, “David Israel ŋunu wre ma ŋmbaa?” A ŋunu wre na kna mbo, “Ɛnhɛɛn, wre blɔ ŋmba chiɛlɛ na le mɛɛ nu kre mbo,
‘Saul na gbo kagbeŋge,
a David gbo kagbenyi kɛ kre.’”
12 David na kee nyjɛ ŋunu loplombo pre yuu yire loo, a kra tia wraa ŋunu Achish fiɛ kpɔɔ. 13 Kena na wre na pree wa mu tini kre, mbe u tuwi mbe uyɛ pe na tɔɔlɔ u tɔɔlɔ, mbra pe krɔɛ kaanri na kajinyi ni, mna tuwi na tɛɛnrɛ woni yira fuu na lee u nyutan yooro nu. 14 A ŋunu Achish na u nya ma, mna yo u loplombo pre pan mbo, “E le, blɔ wre tɔɔlɔ. Mni a e pan na u ni ni pan hin? 15 Tɔɔlɔfɛɛnlɛ nɛɛ ni na, a e ndru na paan na wa ni, mbe u paan ni tɔɔra na u tɔɔlɔ kee ni ni katoo hin?”