3 A David na kna mbo, “Mu lɛ chin imi na mu ni kori mu da, ki tia u u jawala pe na wa ti mu chin kee ŋga u chaa mbe pe. Ŋgi na hin? Na mu ŋga u chaa mbe pe chin kre, kia tna mu pan. Ni O Tafun Nyiɛkpɔɔ ŋmba u le wre da, na ki kro fiɛn titi mbe ndaa ku.”

4 A Jonathan na kna mbo, “Kee ŋga mu chaa kro, mbe ki pe mbe mu ŋga.”

5 A David na kna mbo, “Baŋga oo nyiɛpɔ fɔŋgɔ ble kpɔɔ li, a ki fna mbe mi na ŋunu chaa mbe kɛ le kotolo mbe li. Kena na ki tna mu pan, mbe sɛ ndra nyaa ble taarɛ wo kre na mbe yila sɛ kɔ. 6 Na mu lɛ waa ni cha mu la, maa ni wie, mu yo u pan na ni mu tali kolo mu ndru mu sɛ Bethlehem na nyaanyaa. Ŋgi na hin? Yɛlɛ nyu sra wɔ nyjila da mbe ni sɛ mi na ni sele wolo sra wɔ. 7 Na waa yo na ki nyu kre, kena mu chin na gbun nyiŋgee wa katoo. La, na u krɔ waa kun na ni ni kre, kena mu chin na na u ni ta wa ni ti. 8 Kena jande ya ni na, ŋgi na hin? Mi na ŋu da mu yire o Tafun Nyiɛkpɔɔ yiɛ mu nyu nunu pe. Kena na mbaa fɔɔn pe mu na, ŋu titi mu ni gbo. Maa shia sɛ na ni ni mu lɛ pan mbe u ni gbo.”

9 A Jonathan na kna mna yo mbo, “Nyiɛ we o kisi! Kena mu n shɔnli na, na ni nya na ndoo mu jawa kefɔɔn ka ni, na mba ki yo mu paan?”

10 A David na kna mbo, “Kena na maa kee kre yo a mu lɛ krɔ waa kun na ni ni, ŋmbi we paan ki yo ni pan hin?”

11 A Jonathan na kna mu yo u pan mbo, “O sɛ nyaa wa rɛ.” A pra sɛ. 12 A Jonathan na yo David pan mbo, “O Tafun Israel leele Nyiɛkpɔɔ wre u pe o kro dansiɛfun, na baŋga, ndee baŋga nyisee imi nyu, mi na ndoo we paara mbe ni u jawala le. Na mbaa nya na u n na mu jawa sisaa ni, mbe ndro tun mbe u paan ki yo mu pan. 13 A na mbaa u jawala nya, na na u mu ta wa mu ti kre, a ni shio ki yo mu pan, kena o Tafun Nyiɛkpɔɔ u ni gbo. O Tafun Nyiɛkpɔɔ wre u ya mu na, imi na wra ya ni lɛ wre na kre. 14 Jande, ŋga nii ŋmaa ni ŋga, maa shia kɔ mu nyu ŋga mu yo ni pan kre na, ta kpra lii na ni ni. A na ki waa pan na ni ku naa, 15 jande, kpra li na ni sele leele ni nyjila kro nu. A na o Tafun Nyiɛkpɔɔ waa mu loŋgoolo kro kla mu laa mu na kre, 16 Maa shia ti mbe o kɔ o nyu ŋga o yo oyɛ pan kre na. A na ki waa na o kɔ ki na naa, kena o Tafun Nyiɛkpɔɔ wre we ŋu David ndie tini.”

17 A Jonathan na tia David na da mu u ŋga na u u kori. Ŋgi na hin? Na Jonathan David kori imi na u uyɛ kro kre yi. 18 A Jonathan na yo David pan na, baŋga nyiɛpɔ we yili, mbe o ki ble kpɔɔ li ŋga, na mu n wa lihaa ni lɛ we ki chin. 19 A baŋga nyisee na yilakɔŋgɔ, kie kpali kpɔɔ na mu n wa, kena sɛ ndra lawee ŋga nu mna sɛ ndra ki ble kre, dnɛ ŋga pe yeeri Ezel kre krɔ. 20 Mbe snimi taarɛ waari mbe yi sɛ kan dnɛ kre mbɛɛ na, mbe ki pe na yaka ni nya wa. 21 Kena ni ni sumifun wre tun na u paan yi wru. Mbe yo u pan na le, “snimi yiree wa kɛ ŋga na.” Na maa loo ma to, mu yili mnaa paan, yaka wa mu ta, ŋga o Tafun Nyiɛkpɔɔ wa ŋga. 22 La, na mbaa yo bituŋu wre pan na snimi yiree wa mu kro mnaa wa, kena mu chin na ki n tna, ta shie yiɛ, mu chin na o Tafun Nyiɛkpɔɔ u shie na mu ni. 23 Nyu ŋga mi na ŋu yo oyɛ pan kre, o Tafun Nyiɛkpɔɔ we ti mbe o jaa li ki na nyjila kro nu.

24 A David na sɛ ndra nyaa. Ŋga nyiɛpɔ fɔŋgɔ ble kpɔɔ kre na da kre, ŋunu Saul na sɛ tni mbe li. 25 Wra tni mu mbra mboo mbɛɛ na, u tnihaa wa. A Abner na tni mu mbra u na, a Jonathan na tni mu yiɛ kan u na, a David tnihaa kre na sni waara.

26 Ki ble kre Saul nsra nyu kun. Ŋgi na hin? Wraa jawa na aada kala ka ki David ta, a ki tia ki ble kre u nsra pe cheche paala kolo na. A yɛŋgɛ na, na u n pe cheche. 27 Ŋga nyiŋge na se na kre, nyiɛpɔ fɔŋgɔ kre ble shiinwo na, na David tnihaa kree wa mu sni waara tɛ. A Saul na Jonathan wie mbo, “Yira ŋgi ki tia aŋge, na aŋga, David n pan lihaa hin?”

28 A Jonathan na kna mbo, “Wra ni tali kolo na u shie Bethlehem na mbe pan. 29 Kee ŋga wra yo ni pan yi kre mbo, ‘Jande ti mbe ni sɛ. Ŋgi na hin? Ni sele woloo wa na yɛlɛ nyu sra woni o chia, a ni nyjɔ yo na ki fna ni pe wa. Kena na mu chin na mu nunu wi mi yɛŋgɛ, ti mbe ni sɛ ni sele wolo nya mbe shaari.’ Kre ki tia u n wa o nu mna kre.”

30 A Saul krɔ na kun na Jonathan ni, a wra yo u pan mbo, “Chlɔ ŋmba u yiri na lewo taanla, na lewo fana pɔ wi ŋu, ni chin na tuwi mu tuwi mu David yii nunu, a kie pan nyifɛɛrɛ kee ni mbe ŋu na mu lo ŋga. 31 Mu n chin na na David ŋmaa li, ŋu Jonathan ma ja mbe pe ŋunu waŋgra ŋga nu ra? Kena sɛ u yii mu pan mbe ni u gbo.”

32 A Jonathan na kna mbo, Yira ŋgi u pe mbe mu u gbo hin?

33 A Saul na u pɔ Jonathan wa na u chombo ni mbe gbo. Bawa Jonathan na chin na jaa u lɛ yiɛ nyina wra David chaa mbe gbo. 34 A Jonathan na krɔ sisaa tɛɛ mu taan mu yiri mu yili lihaa wa. Ki ble kre u nsra li nyiɛpɔ fɔŋgɔ ble lie shiinwo kre nu, imi na David kee na pe u pan fooro ni, imi u lɛ na u pe kre ndra na. 35 Ŋga nyiŋge na se bnimi kre, Jonathan na David kɔŋgɔ ni nyaa wa, imi na pra paara mu fni kre. Ŋga wraa shie kre, wre na biblɔ fiɛn wa pra sɛ, a wra yo pɔ wre pan mbo, 36 “Fɛ mu sɛ snimi ŋga mbe wa ŋga wru mu pan.” Ŋga wraa feni na shie kre, a Jonathan na snimi kre wa a kra yiri u ndra na. 37 Ŋga pɔ wre na da mna snimi kre na to kre, a Jonathan na fuu mbo, “snimi kree wa yiɛ, 38 maa shia yire nyjɔ, fɛ mu sɛ yiɛ.” A pɔ wre na sɛ snimi kre wru mu pan mu u ŋga. 39 Pɔ wre nsra kee ŋga ki pini kre chin, fɔna Jonathan na David chiin bɔkɔ. 40 A Jonathan na u wiyirɛ yire wru mu pɔ wre ŋga, na wra yiɛklu na yi ni katoo.

41 Ŋga pɔ wre na sɛ katoo mu kɔ kre, a David na yili dnɛ ŋga kro wra sɛ ndra kre nu, mna kosie kan, mu yiɛ juule tra gbee taarɛ, a wre na Jonathan na peyɛ fa mu yii na nyɛni. David fooro na kpɔɔ, mu wɛ Jonathan na. 42 A Jonathan na yo David pan mbo, “O Tafun Nyiɛkpɔɔ we ya mu na, imi na mi na ŋu nɔɔlɔ nyu nunu pe O Tafun Nyiɛkpɔɔ mɛɛ ni kre ndra na. O Tafun Nyiɛkpɔɔ wre we ti mbe mi na ŋu, na mu nɔɔ leele, na mi nɔɔ leele kro ja mbe oyɛ yii nyjila kro nu.” A Jonathan na ndru mu sɛ katoo, a David na yili lawee kre nu.