19
A Saul na u pɔ Jonathan, na u loplombo pre kro yeeri mna yo pe pan na pe kolo ka cha mbe David gbo. A na Jonathan David kee chaa. 2 Kra tia wra ki bɔ David pan mbo, “Ni lɛ mu chaa mbe gbo. Kena jande, muyɛ dɔɔ ta. Baŋga bnimi sɛ lawee ka cha mu ndra. 3 Mi na ni lɛ we yili mbe sɛ yire lawee ŋga nu mu sɛ ndra kre, mbe mi na wre na mu kee yuu, na u waa kee ka yo mbe ki yo mu pan.”4 A Jonathan na sɛ David kee yo u lɛ pan mbo, “Ndoo, maa shia mu sumifun David wre pe sisaa. Ŋgi na hin? U n da mu mu pe sisaa tun, a na mu le kuraa, kee nyjɛ u pe mu mu ŋga yire nɛɛ. 5 Wra u ŋmaa wa jenyje mna sɛ wi mu Goliath gbo, a o Tafun Nyiɛkpɔɔ wre na wi mu Israel leele shɔ. Ŋga mna ki nya kre, mu yiɛ na shɔ. Kena yira ŋgi tia mna wre blɔ ŋmba u n sisaa ka pe ŋga chaa mbe gbo finfin ŋga hin?”
6 Jonathan kee nyjɛ wra yo u lɛ pan kre na u jawala chinɛ, a wra o Tafun Nyiɛkpɔɔ wre mɛɛ tɛɛ mu da na wa David gbo na. 7 A Jonathan na David yeeri mna wre na u lɛ mandiɛ yire bɔ u pan, a wra u wru mu sɛ u lɛ Saul pan, a David na sɛ na ŋunu sumi imi wraa pini kre.
8 Ki ble ka ŋunɔ na ndru mu kun Philistine, na Israel leele pre lalaa. A David na sɛ wi na pe ni mna pe ja, a pra fɛ.
9 Praa wa wa ki ble ka, a o Tafun Nyiɛkpɔɔ na tia ŋumu fɔɔn ka na pan mu le Saul nu. Na uu wa mu tni u jɔɔn na, mu u chombo yii kɛɛ, a na David wa u jaara na juru gbuun. 10 Saul naa chaa mbe David su na chombo kre ni mbe mbra mboo na, a kra David wa mu la, mna sɛ mboo kre su, a David na fɛ mu shɔ.
11 Ki ble kre blee, Saul na leele tun na pe sɛ David shie u katoo mbe u gbo bnimi. La, David chɔ Michal na u jaari mbo, “Na mu n fɛ mu muyɛ ndra cha blee ŋga, baŋga bnimi pie mu gbo.” 12 A u chɔ wre na David wɔ tokro nu mu wa, a wra fɛ mu shɔ. 13 A chlɔ wre na pe katoo sɛɛn ka wru, mna ki taa pe dɛŋglɛ na, mna yoŋgo tɛɛ mu ki tɔ, mna sugbɔ yooro le ki ndra nyjeeri haa.
14 Ŋga Saul leele pre na pan mbe David yii kre, a u chɔ Michal na yo pe pan na David yaa.
15 Ŋga pra ndru mu sɛ mandiɛ bɔ Saul pan kre, a wra tia bitumblɔ pre na ndru mu sɛ, mbe pre titi nyibie sɛ David nya. Wra yo mbo, “E sɛ u wru na u dɛŋglɛ ni e pan mbe ni u gbo!” 16 Ŋga pra sɛ le David nyuŋgo wa kre, pra sɛ sɛɛn kre da dɛŋglɛ kre na, kre na sugbɔ yooro yire ni. 17 A Saul na Michal yeeri mna u wie mbo, “Mni a mu ni fana imi, mu tia ni loŋgo shɔ ni pan hin?”
A chlɔ wre na kna mna u lɛ nyu wɔ mbo, “Wra yo ni pan na, na ni n ya u na a u fɛ, we ni gbo.”
18 David na fɛ mna shɔ, mna sɛ Samuel pan Ramah na, mna sɛ kee nyjɛ Saul na u pe yire kro bɔ Samuel pan. A wre na Samuel na sɛ tni Naioth na. 19 A pra sɛ yo Saul pan na David wa Naioth ŋga kii wa Ramah na kre. 20 A Saul na leele tun wa na pe sɛ David yii mbe pan. Ŋga pra sɛ kre, pra sɛ Samuel na Nyiɛkpɔɔ kee nyanyofɛɛnlɛ plɛ da, na pee wa na kee nyaa na yuu, a na Samuel u pe yiɛklu. Titɛɛ kre nu, a Nyiɛkpɔɔ Ŋumu na pan mu le Saul bitumblɔ pre nu, a pe kro naa Nyiɛkpɔɔ kee nyaa na yuu. 21 Ŋga Saul na kre kee ŋga loo kre, a wra leele fumblɔ wɔ mu tun na, a pre na sɛ chaa pe nu na chɔɔ, a wra ndru mna taarɛ wolo tun na, a pre chɔɔ na sɛ pe ma na. 22 A Saul titi na yiri mu to Ramah kolo, ŋga wra sɛ da Secu kɔlɔ kre jaara kre, a wra wie na sena Samuel na David nyi kre hin? A pra yo u pan na pee wa Naioth ŋga kii wa Ramah na kre na. 23 Ŋga wra tro na shie wa kre, Nyiɛkpɔɔ ŋumu na pan mu le u nu na, a wraa kee nyaa na yuu hali mna sɛ le Naioth na wa. 24 A wra u dodonyi kro wɔ mu wa, mna sɛ yire Samuel yiɛ na, na Nyiɛkpɔɔ kee nyaa na yuu. Wra yire ma wejiwaara, a nyiŋge na pan mu se. Bawa leele pre naa yuu mbo, “A Saul kaari Nyiɛkpɔɔ kee nyanyofun na ra?”