18
Ŋga David na Saul na paara mu kɔ kre, Saul pɔ Jonathan na David na nɔɔlɔ titi yii, a wra u kori, imi na wre titi uyɛ kori. 2 A Saul na tia David na tni u jaara. Mu yire ki ble kre, u nsra tia wra ndru mu sɛ u lɛ katoo na. 3 Ŋga Jonathan naa David kee chaa kre ndra na, wra u yeeri a pra nɔɔlɔ nyu nunu pe. 4 A Jonathan na u dodoŋgi titnɔŋɔ ŋga u le wɔ mna David ŋga, kre na u ŋunɔ wi dodoŋgi, na u brɔfiɛn ŋunu, na u bɛŋɛ, na u greree ni. 5 Kooloe nyjɛ na Saul na David tun yire kro na nyu mu u ŋga, a kra tia Saul na u pe ŋunɔwifɛɛnlɛ lopom, a Saul loplombo pre, na leele pre kro yiɛ na shɔ ki na.Saul Yiɛ Na Nyina David Na
6 Nyjila ŋga ni David na Goliath gbo mu kɔ, a ŋunɔwifɛɛnlɛ pre na ndru na paan katoo kre, chiɛlɛ mblɛ pra yiri Israel leele chiɛ yire na kro na pan ŋunu Saul fnihaa. Praa yɛshɔɔrɔ mɛɛ koni, na yoo, na yambrawa nyaara, na juru gbuun. 7 A chiɛlɛ pre naa mɛɛ yire koni na yuu mbo,
“Saul leele kagbeŋge gbo,
a David gbo leele kagbenyi kɛ.”
8 Kre kee ŋga nsra tna Saul pan, a kra tia u krɔ na kun kpɔɔ. A wra kna mbo, “Na pe yo na David gbo leele kagbenyi kɛ, a mi gbo kagbeŋge waa, kena ni chin na pe chaa mbe u pe pe ŋunu.” 9 Ki tia mu yire ki ble kre na shie, u yiɛ na nyina David na, a wraa u jawa sisaa ni.
10 Ŋga ki nyiŋge na se, a o Tafun Nyiɛkpɔɔ na tia ŋumu fɔɔn na pan mu le Saul nu faŋga ni, a wraa paara na tɔɔlɔ u tɔɔlɔ u katoo wa. A David na sɛ u juru wru mu pan na gbuun u pan imi na wraa pini kre. Kre nyjila kre, na Saul sɛ chombo wru mu yii kɛɛ. 11 A Saul na yo u ndra mbo, “Mbe u su na ki ni mbe mbra mboo na.” A wra chombo kre kna mu u wa na ki ni gbee shiin, a yi kro na David wa mu la.
12 Ŋga kra pan ma kre, Saul naa David fiɛ. Ŋgi na hin? Na o Tafun Nyiɛkpɔɔ wa David kro, mu Saul ti. 13 A Saul na tia David na yili u katoo wa. Mna tia wra sɛ yiɛklu na ŋunɔwifɛɛnlɛ kagbeŋge ni ŋunɔ. 14 A ŋunɔ ŋga nu David we sɛ kpan, we wi mbe yili. Ŋgi na hin? O Tafun Nyiɛkpɔɔ naa wa u kro.
15 Ŋga Saul na nya imi na David naa wii na yilii kre, kra tia wra u fiɛ kpɔɔ kuraa mu ya. 16 La, Israel leele, na Judah leele kro na David kori. Ŋgi na hin? Kee ŋga we pe kpan, kie nyu.
David Na Saul Pɔ Leŋge
17 A Saul na yo David pan mbo, “Ni bichlɔ lopom wi kre, u mɛɛ Merab. Na mu ni sumi na ŋunɔwifun gbunfun, na kprafun wi, a mu O Tafun Nyiɛkpɔɔ wre ŋunɛ nyjɛ oo wi yire wi mbe o ŋga kre, kena mbe u wru mbe mu ŋga mbe mu leŋge.” Na Saul jawa na, na ki pan ma, Philistine we u gbo ŋunɔ, mbe kia pe na wre titi u u gbo.
18 A David na kna mbo, “Ndro ŋmbi wi mi, ndee ni sele leele lɛ mblɛ, mbe ni paan pe ŋunu nafun hin?” 19 La, ŋga nyjila na da mbe pe Merab wru mbe David ŋga mbe u leŋge kre, Saul na u wru mu Adriel ŋmba u yiri Meholah na wre ŋga a wra leŋge.
20 Saul pɔ chlɔ wa naa wa praa u yeeri Michal, wraa David chaa. Ŋga Saul na ki loo kre, u yiɛ na shɔ ki na. 21 A Saul na ndru mu jawala ta na we Michal wru mbe David ŋga mbe u leŋge, mbe u tɛɛ mbe u pɛɛri pɛlɛ, mbe Philistine u taa gbo. Ki tia wra yo David pan mbo, “Mu ja mbe pe ni nafun blɔ tɛ.” 22 A Saul na u loplombo tun David pan na pe sɛ ju mbe paara na u ni mbe yo u pan na, “Ŋunu yiɛshɔ mu na, a u loplombo pre kro yiɛshɔ mu na, kena ki fna mu u bichlɔ leŋge.”
23 Ŋga pra kee kre yo David pan, a wra kna mu yo pe pan mbo, “E jawa na kee fiɛn yi na mu pe ŋunu nafun ra? Shianfun wi mi, a ni kro n sna.” 24 A Saul loplombo pre na sɛ kee nyjɛ David na yo yire bɔ u pan. 25 A Saul na yo pe pan mbo, pe sɛ yo David pan na, “Yira ŋga ŋunu chaa mu pan, mbe chiin u pɔ wre wru mbe mu ŋga kro yi na, mu sɛ Philistine bilɛ lafaa fɛnyi nyu knumu mbe pan mbe u ŋga. Kre kie pe kolo ŋga na we tro mbe u loŋgoolo pre fɔlɔ tɔ.” Kre kolo ŋga Saul na wru mbe ki ti Philistine leele pre David ta mbe gbo. 26 A Saul loplombo pre na ndru mu pan mu kee ŋga wra yo kre bɔ David pan, a David yiɛ na shɔ na we pe ŋunu nafun. Ŋga ble ŋga pra tɛɛ mbe bijam pe kre naa dani kre, 27 David na u leele pre na sɛ Philistine leele pre nu mna sɛ gbo leele lafɛɛ shiin, mna pan na pe fɛnyi nyu yire ni mna pan mu Saul ŋga, a pra yi tɔɔnri a yira da, a kra nyina na David we pe ŋunu nafun. Kena ki fna mbe ŋunu u bichlɔ Michal wru mbe David ŋga mbe u leŋge.
28 Saul na nya na yɛŋgɛ na, o Tafun Nyiɛkpɔɔ wree wa David kro, a u bichlɔ Michal na David kori. 29 Kra tia wra David fiɛ kuraa mu ya, a wra kaari u loŋgo, mna sɛ su u kumu nyjila.
30 Philistine leele pre naa paan na wii na pe ni nyjila nyjila, la, ŋunɔ ŋga David we wi kpan, we yili. Wraa wii mu wɛ Saul na u ŋunɔwifɛɛnlɛ loplombo pre kro na. A kra tia David na mɛɛ ta.