Pra David Tɛɛ Ŋunu
2
Kre kee ŋga kɔkro kre, David na o Tafun Nyiɛkpɔɔ wie mbo, “Ni sɛ Judah chiɛ yire ka wru mbe tni ree?” A o Tafun Nyiɛkpɔɔ na yo u pan mbo, “Sɛ ka wru mu tni.” A David na u wie mbo, “Ŋgi haa hin?” A o Tafun Nyiɛkpɔɔ na yo u pan mbo, “Sɛ Hebron na.” 2 A David na sɛ Hebron na. Ŋga wraa shie kre, wra sɛ na u chiɛlɛ shiin pre ni, pre na lɛ Ahinoam ŋmba wra yiri Jezreel na wre, na Abigail, Nabal lekuchɔ, ŋmba wra yiri Carmel na wre. 3 Ŋga wraa shie kre, wra u leele pre, na pe chiɛlɛ kro wru mu sɛ, a pre na sɛ tni chiɛ nyjɛ yira mbra Hebron na kre na. 4 A Judah leele pre na pan Hebron na wa mna pan mu David tɛɛ pe ŋunu. Ŋga David na loo na leele mblɛ pe yiri Jabesh, na Gilead tra nu pre sɛ Saul gboo wru mu sɛ le kre, 5 a wra leele wɔ mu tun na mandiɛ ni na, “O Tafun Nyiɛkpɔɔ wre we e dwan, na e e ŋunu Saul pe chichie mu u le. 6 O Tafun Nyiɛkpɔɔ wre u nyu e na na kpra ni. Mi titi na yire we tni chichie, kee ŋga e pe ŋga ndra na. 7 Kena e gbun ta, e faŋga ta. Ŋgi na hin? E ŋunu Saul wre ku, a Judah leele ni tɛɛ ŋunu.”Pe Ish-Bosheth Tɛɛ Israel Ŋunu
8 Saul ŋunɔwifɛɛnlɛ lopom ŋmba praa yeeri Abner, Ner pɔ wre, na Saul pɔ ŋmba praa yeeri Ish-Bosheth wre na fɛ mna Jordan lɔɔ kre kun, mna sɛ tni Mahanaim na. 9 Bawa Abner na Ish-Bosheth tɛɛ Gilead tra kre ŋunu. Chiɛ nyjɛ ŋunumu wra li na yi Ashuri, Jezreel, Ephraim, Benjamin, na Israel tra kre kro. 10 Wra li yɛlɛ fuloe shiin, a pra chin mu u pe Israel tra kre ŋunu. A wra jɔɔn kre li yɛlɛ shiin.
Israel Leele Na Judah Leele Na Ta
12 Abner na ŋunu Ish-Bosheth loplombo pre na yili Mahanaim na, mna sɛ chia ŋga praa yeeri Gibeon kre na. 13 Zeruiah pɔ ŋmba praa yeeri Joab pre, na David loplombo pre plɛ na fni tapla ka lawee. David leele pre naa wa tapla kre kokoo ŋga na, a Ish-Bosheth wolo pre naa wa kokoo ŋgaa na, a pra yiɛ kan peyɛ na. 14 Abner na yo Joab pan mbo, “Ti mbe o o yirifumblɔ pre plɛ wɔ, mbe pre na leele mblɛ wa ŋga plɛ sɛ fni mbe wi, mbe oyɛ tamna mbe le.” A Joab na kna mbo, “E ki pe mbe o le ɛ!”
15 Ŋga pra ki yo kre, leele kɛmbɔshiin na peyɛ wɔ mu yili Ish-Bosheth, na Benjamin leele nu, a kɛmbɔshiin na yili David leele pre nu. 16 A pra peyɛ yii shiin shiin, mna pe yɛ suulo na pe tokombee ni, mna peyɛ gbo gbo, pe kro leele fulo na jijirɛ pre kro na ku ku. Kra tia Gibeon lawee kre a pra ki ŋga mɛɛ “Brɔfiɛn Su Tra.”
17 A ŋunɔ badaaŋga ka na kun lawee kre nu, a David leele pre na Abner na Israel leele pre ja. 18 Zeruiah biile taarɛ naa wa wa, pre na lɛ, Joab, Abishai, na Asahel. Asahel rɛ, wre naa feni na sajeŋu wi. 19 A wra yiri mu fɛ mu taa Abner kro. 20 Abner na kna mu le kro na Asahel paan u pan, a wra kna mbo, “Asahel wi woo?” A wra yo “Mi wi.” 21 A Abner na yo u pan mbo, “Laa ni kro, mu sɛ taa ŋunɔwifɛɛnlɛ pre wa kro mu u yirɛ shɔ u pan.” A Asahel na je mu taa u kro na u nini. 22 A Abner na kna mbo, “Ni yo mu laa ni kro, mu n loo mbe? Maa shia ti mbe ni mu gbo, na maa tia ni mu gbo mni mbe pe mbe mu nyjɔ Joab fni hin?” 23 Asahel nsra kee ŋga u yo kre loo, a wra je na u nini. A Abner na u su na chombo kre ni kro, lɛɛ nu, a kra kna mu yili u kukrɔ na, a wra to mu ku. A leele mblɛ praa paan na u dani wa pre na yire na u le.
24 Joab na Abishai na Abner ni chiin a yila na pan mu to, kre nyjila kre na pe da Ammah nyua kre na. Nyua kree wa na shie Giah yila finhaa, Gibeon fimi lawee kre kolo.
25 Benjamin leele pre na sɛ fɛ mu Abner wa lalaa na, mna sɛ yire nyua ka na mbe wi na u ni. 26 A Abner na Joab yeeri mna yo u pan mbo, “Joab, wii ki fna o kro mbra wii chiin ree? Mu n chin na na ki pan ma, ki mbakɔ kee, fooro bribri yi ndee? Mu sele leele lɛ wre, nyjila ŋgi nu mu yo mu leele pre pan mbe pe o ni ti hin?”
27 A Joab na kna mbo, “Ni da o Tafun Nyiɛkpɔɔ wre mɛɛ ni na, na mu nsra paara, mbe na ti ni leele pre na e ni mbra hɛ su baŋga bnimi.” 28 A Joab na u bnɔ fɔ, a kra nyina na u yo na pe laa Israel leele pre kro, a pra ŋunɔ kre ti. 29 Abner na u leele pre na tii mu tro Jordan lafolo ka nu. Pra nyaari chiin blee kre, mna sɛ Jordan lɔɔ kre kun, mna nyaari chiin mna hɛ le Mahanaim na.
30 Ŋga Joab na laa Abner kro kre, wra u leele pre fni titɛɛ, bawa wra nya na u leele pre kɛmbɔkɔɔnanyjirɛ n wa, mu wru mu ya Asahel na. 31 Na David leele pre Abner leele mblɛ pe pe Benjamin leele pre lafɛɛ taarɛ na fuloe taarɛ gbo. 32 Joab leele pre na Asahel gboo wre wru mna sɛ le pe sele leele lehaa dnɛ wee ka nu Bethlehem na. A pra ndru mu nyaari blee kre mna sɛ le Hebron na nyisee nyu na.