Hannah Nyiɛtalaa
2
A Hannah na nyiɛtali mbo,“O Tafun Nyiɛkpɔɔ tia
ni yiɛ shɔ kpɔɔ.
Kee ŋga u pe mu ni ŋga,
tia ni yiɛshɔ mu tro,
u tia ni ni loŋgoolo ta na tɛɛ.
U ni shɔ mu wa,
ki tia ni yiɛ shɔ.
2 Ndro n wa mu pe cheche,
na o Tafun Nyiɛkpɔɔ wre wi,
a ndro n wa u yiɛ,
a kre Dnɛ kpɔɔ n wa,
mu pe na o Nyiɛkpɔɔ wre wi.
3 E nyukpɔɔmu kee yire yoo ti,
e kpoŋmbooro kee yire ti.
Ŋgi na hin?
O Tafun Nyiɛkpɔɔ wre,
u kee kro chin,
a wre u lewo kepele kro
kpra kuun.
4 U tia ŋunɔwifɛɛnlɛ faŋgafɛɛnlɛ
bɛnyi kuari,
a fɔɔnrɔfɛɛnlɛ faŋga ta.
5 Mblɛ na sro na bɔ kre,
klo pe kuu,
a mblɛ klo naa kuu pre,
sro bɔ pe na.
Chlɔ gbende wre,
u se biile kɔɔnashin,
a chlɔ ŋmba u se tataara wre
kna na fooro lii.
6 O Tafun Nyiɛkpɔɔ u paan kumu ni,
a wre u ŋmaa kaan,
a wre u shie leele ni kuulo,
na ndru na pe nyini.
7 O Tafun Nyiɛkpɔɔ,
wre u tia plɛ shian,
a plɛ swa ta.
Wre u ndro pini fiɛn,
mu na wa kaan kpɔɔmu.
8 Wre u foorofɛɛnlɛ yire bloŋgo nu,
na shianfun woni u tnimu nu,
mbe ti u sɛ tni ŋunu biile tnihaa,
mbe ti u kpɔɔmu lawee ta.
Yirɛ nyjɛ na tra ŋga yire kro,
o Tafun Nyiɛkpɔɔ wre wee yi,
a yire na u waŋgra ŋga sin mu taa.
9 Wre u kɛ toni
u leele mblɛ pe fraka na,
la, sisampefɛɛnlɛ pre,
nyu we ku wɔmu ndoo wa.
Lewo wa jaa tni,
na wre titi yɛ faŋga ni.
10 O Tafun Nyiɛkpɔɔ wre,
we u loŋgoolo kro kla,
we ti nyiɛ twanraa yiri nyjeeri,
mbe wo pe na.
We waŋgra ŋga kro kpra kun,
a we u ŋunu wre ŋga jaŋga,
ŋunu ŋmba u wɔ wre,
we ti pe u jaŋga kpɔɔ kre nya.”
11 A Elkanah na ndru mu sɛ katoo Ramah na, la, Samuel na tni Shilo na srawɔfun Eli pan, na yaa u na o Tafun Nyiɛkpɔɔ wre tnumu nu.
Eli Bibilɛ Pre Kee
12 Eli bibilɛ pre na pe sisaapefɛɛnlɛ, pe nsraa o Tafun Nyiɛkpɔɔ wre fiɛ. 13 Kee ŋga praa pini na yi na, na wa pan mu sra wɔ na u kaara soori kre, mbe pe ti mbe pɔ pan na damia nyu taarɛ ni, 14 mbe paan ki su chɔ, ndee sɔɔ yira kre nu. Kena kaara nyjɛ ni damia kre we yili fimi na kro srawɔfun wre wee yi. Pan praa Israel leele mblɛ praa paan na sra woni Shilo na pre kro pini. 15 Kee ŋga praa pini na kuraa yi na, nyjila ŋga ni pe n ta mu yurɔ wre nyina wɔ mbe yi sro kre, mbe pɔ pan mbe yo srawɔfun wre pan mbo, “Ni ŋga kaara kre ka mbe ni sɛ ki kla mbe srawɔfun ŋga, wa ŋga pe sɔɔ shɔ, fɔna bibre.” 16 Na srawɔfun wre waa yo na, “Ti mbe ni nyina kre wɔ mbe ki sro tun mbe mu chiin kaara kre ŋga mu chaa kro kun mbe sɛ kre,” we je mbo, “Ɔɔhɔn, ni ŋga ki yi fuŋgaami, na kre ma mbe ka kun jaŋga na.”
17 Kre sisam ŋga Eli bibilɛ pre naa pini kre na pe sisam kpɔɔ o Tafun Nyiɛkpɔɔ wre yiɛ na. Ŋgi na hin? Pe nsra sra nyjɛ praa woni na o Tafun Nyiɛkpɔɔ kaan yire le mu nya.
Samuel Naa Wa Shilo Na
18 Samuel naa wa na o Tafun Nyiɛkpɔɔ wre sumi, mnaa srawɔfɛɛnlɛ dodonyi finyi yire ka leni. 19 Yɛlɛ nyini, u lo naa dodoŋgi titnɔŋɔ kpro fra, na wre na u plɔ sɛ pe yɛlɛ nyu sra wɔ haa, mbe u sɛ u pɔ wre ŋga. 20 Na pe kɔ, Eli we Elkanah na u chɔ dwan mbe knaa yo Elkanah pan mbo, “O Tafun Nyiɛkpɔɔ u ŋu na chlɔ ŋmba ŋga biile mbe pe yirii tni pɔ ŋmba mna wru mu u ŋga wre titɛɛ.” Na pe kɔ wa mbe pe ndruu sɛ pe katoo.
21 O Tafun Nyiɛkpɔɔ na Hannah dwan, a wra bibilɛ taarɛ na chiɛlɛ shiin se mu ya Samuel na. A Samuel na lɛ o Tafun Nyiɛkpɔɔ wre sumiɛ nu.
Eli Na U Bibilɛ Pre
22 Eli na lɛ blɛlɔɔ na pee wa na paan na kee nyjɛ u bibilɛ pre pini Israel leele pre na kro boo u pan. Hali imi pra bichabɛɛlɛ, mblɛ praa paan na tnumu tuni o Tafun Nyiɛkpɔɔ wre yoŋgo nyuŋgo kre yiɛ wa pre yiri na chaa. 23 A Eli na u biile pre yeeri mna pe wie mbo, “Mni a e na yire kee nyjɛ pini ŋga na hin? Sisam kee nyjɛ e pini yire kro, leele paan na yi boo ni pan. 24 Ni biile, e yire kee yire ti. E kee nyjɛ ni ndru o Tafun Nyiɛkpɔɔ leele pre pan yire n pe mandiɛ chiriri. 25 Na ndro sisaa pe u ŋmbrɔ na, o Tafun Nyiɛkpɔɔ we jaa u fooro le, la, na ndro waa sisaa pe o Tafun Nyiɛkpɔɔ wre na, ndro ŋmbi we u fooro le hin?” Biile pre nsra kee nyjɛ pe lɛ yuu yire loo. Ŋgi na hin? Na o Tafun Nyiɛkpɔɔ wre chaa mbe pe gbo.
26 Samuel naa wa Eli yiɛ na lee, a u kee na Nyiɛkpɔɔ na leele yiɛ nyi.
Nyiɛkpɔɔ Na Paara Eli Biile Pan
27 Ki ble ka Nyiɛkpɔɔ na u kee nyanyofun wa tun na mandiɛ ka ni Eli pan mbo, “Nyjila ŋga ni mu lɛ katoo leele na pe tinlɛ Egypt ŋunu yiɛ kre, kre ndaa niyɛ wɔ mu Aaron nyina. 28 Na mu yiɛ wa mu le, Israel sele yire kro nu, Aaron sele kre ndaa wɔ na pe pe ni srawɔfɛɛnlɛ, mbra tnumu tuni sragbunu kre na, mbra tuwe ndiom tɛɛn sroi, mbe srawɔfun dodoŋgi kre le mbe yire ni yiɛ. A ndaa pe ŋga kolo mbe pe jaa yirɛ nyjɛ praa paan na sroi sragbunu kre na yire yɛ kaa. 29 A yira ŋgi ki tia mu jajaara ta yirɛ nyjɛ ni ni leele paan na sra woni na ni kaan yire na ma hin? Eli, mni a mu mu biile pre fiɛ mu wɛ mi na, mu tia pe sra yirɛ nyjɛ leele paan na ni kaan yire chichiele ka mu kpɔɔ kpɔɔ. 30 Mi, e Tafun Nyiɛkpɔɔ, ndaa nyu yo na, mu lɛ katoo leele, na mu sele leele ndaa wɔ mbe praa pini ni srawɔfɛɛnlɛ nyjila kro nu. Mi ndaa ni nyu yo. La, mba ki pe ma na. La, ŋmba we ni ŋga buuro, wre mbe ŋga buuro, a ŋmba we ni le fiɛn kre, mbe u le fiɛn. 31 Loo, ble kaa wa na paan, mbe yirifuŋu ŋmba uu wa mu sele leele nu kro gbo, ndro wa yiri pe nu mbe ndra fniŋge. 32 Na maa dwamu ŋga mbe Israel leele pre hamblɛ ŋga kre nya kre, kre mu yiɛ we nyina. Mu sele ndro wa lɛ, mbe ndra fniŋge fio. 33 Mbe ndro ti mu kɛ leele pre nu, mbe u yiri mbe pe ni srawɔfun, la, nyɛnɛɛ na wrekroo kie mu nyiɛlɛ kla. Mu kɛ leele hamblɛ we kanyana kumu ku, a fooro lie wa kɔ mu na. 34 Na mu bibilɛ shiin Hophni na Phinehas waa chaa mu ku ble nunu kre, mu chin na kee nyjɛ ni yo ŋga we pe yɛŋgɛ. 35 Mbe srawɔfun ŋmba we pe kprafun mbe ni ŋga wɔ, ŋmba we na ŋga ni chaa pini. Mbe ti leele yiri u kɛ haa, mbe yire ni ŋunu ŋmba ni wɔ wre yiɛ nyjila kro nu. 36 Mu kɛ leele mblɛ pie kro kre, pie sɛ srawɔfun wre pan mbe sɛ sro ndee swa tali. Pie u tali, mbe ya u na, mbe chiin yaka ta mbe ka.”