O Tafun Nyiɛkpɔɔ Na Uyɛ Wɔ//Mu Samuel Nyina
3
Yire ble yire nu, na Samuel wa Eli yiɛ na o Tafun Nyiɛkpɔɔ wre sumi. Kre nyjila kre na o Tafun Nyiɛkpɔɔ n na paara leele ni nyaanyaa, a pe nsraa u kee nyaa kpɔɔ na. 2 Eli na kɔ mu da wa u nsraa nyaa chiriri. Ki ble ka blee, na uu wa mu sni u nyuŋgo, 3 a Samuel naa wa mu sni Suminyuŋgo mna Nyiɛkpɔɔ Nyu Nunu Daka kre na nyi kre. Kre nyjila kre, na Nyiɛkpɔɔ kania kre n ta mu fii Suminyuŋgo wa tun. 4 A Nyiɛkpɔɔ na Samuel yeeri, a wra shɔ mbo, “Yoo, ni tafun,” 5 A wra taan mu yiri mu sɛ Eli da mbo, “Mu ni yeeri, ni we.”A Eli na kna mbo, “Ni n mu yeeri, ndru mu sɛ sni.” A Samuel na ndru mu sɛ sni. 6 O Tafun Nyiɛkpɔɔ na ndru mu Samuel yeeri na, a Samuel na ndru mu yiri mu sɛ Eli da mbo, “Mu ni yeeri, ni we.”
A Eli na kna mbo, “Ni pɔ, ni n mu yeeri, ndru mu sɛ sni.” 7 Kre nyjila kre, na Samuel n o Tafun Nyiɛkpɔɔ mana chin. Ŋgi na hin? Na u n da mu paara na u ni tun.
8 O Tafun Nyiɛkpɔɔ na Samuel yeeri taarɛ wo na, a wra taan mu yiri mu sɛ Eli pan na, mbo, “Ŋu mu ni yeeri, ni we.” Bawa Eli na chin na o Tafun Nyiɛkpɔɔ u pɔ wre yeeri. 9 A wra yo u pan mbo, “Ndru mu sɛ sni, na pe waa mu yeeri na, yo na, ‘Ni Tafun Nyiɛkpɔɔ paara, mu sumifun ndru.’” A Samuel na ndru mu sɛ sni.
10 O Tafun Nyiɛkpɔɔ na ndru mu pan mu yire, mna ndru mu Samuel yeeri imi na wra klu mu u yeeri kre chɔɔ, mbo, “Samuel! Samuel!”
A Samuel na kna mbo, “Paara, mu sumifun ndru.”
11 A o Tafun Nyiɛkpɔɔ na yo u pan mbo, “Brikana mbe kee ka pe Israel leele nu, kie pe kawako kee, a ndro ŋmba we ki loo kpan, kie u yaa, a wa ki nɔɔloo. 12 Kre ble kre, kee nyjɛ ni yo mbe pe Eli sele leele na yire we pe, mbe yire yi nɔɔ na mbe sɛ su yi nyu na. 13 Ni klu mu ki yo u pan na mbe u sele wolo pre ndie tini nyjila kro nu. Ŋgi na hin? U bibilɛ pre sisaa pe mu ni taan. Eli na kee yire praa pini yire chin, la, u nsra pe jaari a pra yi pee ti. 14 Ki tia ndaa nyu nyaa mna yo u sele wolo pre pan, na kre sra n wa mbe jaa ti, mbe kee nyjɛ yie pe da yire laa pe na.”
15 Samuel na kro dɛŋglɛ na a ndram na saan, a wra yiri mna o Tafun katoo kre krɔɛ yire nyaala. Fiɛrɛ na u yii na we kee nyjɛ u nya yire bɔ Eli pan. 16 A Eli na u yeeri mbo, “Ni pɔ Samuel.” A wra kna mbo, “Yoo, ni tafun.” 17 “Yira ŋgi kee o Tafun Nyiɛkpɔɔ yo mu pan kre hin? Maa shia kee ka ndra ni na, na mu n shia kee nyjɛ u yo mu pan yire yo ni pan kro, u mu ndie tini kpɔɔ.” 18 A Samuel na kee yire kro yo u pan, u nsra nunu chom kuraa ti. A Eli na kna mbo, “O Tafun Nyiɛkpɔɔ wi, ki tia kee ŋga ki tna u pan u pini.”
19 Samuel naa lee kama, a o Tafun Nyiɛkpɔɔ naa wa u kro, a kee nyjɛ Samuel naa yuu yire krɛrɛ naa pini ma. 20 Kra tia tra kre leele kro, mu yire Dan tra nu, mu sɛ su Beersheba tra nu, pe kro na chin na Samuel pe o Tafun Nyiɛkpɔɔ wre kee nyanyofun. 21 O Tafun Nyiɛkpɔɔ wre naa uyɛ woni na Samuel nyina Shilo na wa, mnaa paara u pan, a kra tia na Samuel paara, leele pre naa ndie teeri u pan.