Philistine Nyu Nunu Daka Kre Shɔ
4
Kre nyjila kre nu Philistine leele pre na peyɛ nya, mbe sɛ wi na Israel leele ni, a kra tia Israel leele na peyɛ kna mbe sɛ wi na pe ni. Israel leele pre na sɛ fni Ebenezer na, a Philistine leele pre na sɛ fni Aphek na. 2 Philistine leele pre na sɛ Israel leele pre tɔ, a pra wi mu mu, a Philistine leele pre na Israel leele pre tataara gbo. Pra gbo leele kagbenyi jijirɛ. 3 Ŋga mblɛ pra kro pre na yiri ŋunɔ kre nu mna pan pe tnihaa wa kre, Israel leele pre loplombo na yo mbo, “Kee ŋgi ki pan a o Tafun Nyiɛkpɔɔ tia Philistine o ja aŋga ŋga hin? E ti mbe o sɛ o Tafun Nyu Nunu Daka kre wru Shilo na mbe pan mbe ki yiɛklu o pan, mbe sɛ o shɔ o loŋgoolo kɛɛ.” 4 A pra leele tun a pra sɛ Shilo na mna sɛ o Tafun Jaŋgafun, ŋmba yɛnyiŋge kraa wa mu tni Cherubim pre lalaa kre Nyu Nunu Daka kre, wru mbe pan. A Eli bibilɛ shiin pre, Hophni na Phinehas na taa Daka kre na mu pan.5 Ŋga pra le na Nyu Nunu Daka kre ni pe nu kre, Israel leele pre na yɛshɔɔrɔ tɛɛ mna gblee badaaŋga, hali a tra na seeri. 6 Philistine leele pre na gble kre loo mna na yuu mbo, “E Hebrew pre gblee loo. Yira ŋgi pe ta na gble wa ŋga hin?”
Ŋga pra loo na Hebrew pre na sɛ pan na o Tafun Nyiɛkpɔɔ wre Nyu Nunu Daka kre ni kre, 7 fiɛrɛ na pe yii a pra kna na yuu mbo, “Leele pre sɛɛn ka ta, fuŋga o fun. O n da mu kre kee ŋga ka nya tun. 8 Ndro ŋmbi we o shɔ yire sɛɛnlɛ nyjɛ nyini kɛɛ hin? Yire sɛɛnlɛ nyjɛ yire yira Egypt leele pre gbo fimi lawee yire nu kre.” 9 A pra kna mna peyɛ le gbeŋmbaa mbo, “Philistine leele, e gbun ta, e wi na bilɛ lɛ, na kre ma, oo pe Hebrew leele tinlɛ imi pe pe o tinlɛ ŋga. Kena e gbun ta e wi na bilɛ lɛ yire.”
10 A Philistine leele pre na wi na pe ni, mna pe ja, a Israel leele pre na fɛ mna sɛ le pe yonyi nyinyi yire nu. Pra pe gbo tataara, leele kagbenyi fulo na kɛ pra gbo ki ble kre. 11 A Philistine leele pre na Nyiɛkpɔɔ Nyu Nunu Daka kre shɔ, mna Eli bibilɛ shiin Hophni na Phinehas pre kro shiin gbo.
Eli Kumu
12 A Benjamin sele ndro wa na yiri ŋunɔ kre nu, mna fɛ mu pan Shilo na ki ble kre lam. Ŋga wra le kre na u dodonyi wla u na kro, a wra tra ko mu le ndra, na wrekroo lii. 13 Eli na sɛ tni kolo mbɛɛ na, na kolo jle, na Nyiɛkpɔɔ Nyu Nunu Daka kre kee jawa, to, a blɔ wre na le chia lam mna kee kre bɔ a pra gble fɔɔri mu le. 14 Gble kre na to Eli ndie a wra kna na wie mbo, “Yira ŋgi gblee pe leni imi ŋga hin?” Na blɔ wre n ta mu da Eli na mu u bɔ mandiɛ tun. 15 Na Eli li yɛlɛ fuloe jijirɛ na kɛ, a u nsraa nyaa chichie. 16 A blɔ wre na pan mbo, “Ŋunɔ kre nu ni yili mu fɛ na paan aŋga kre.” A Eli na u wie mbo, “A bawa mandiɛ hin, ni pɔ?” 17 A bituŋu wre na kna mbo, “Israel leele pre fɛ Philistine leele pre yiɛ, a pe o leele pre gbo tataara, mu mu bibilɛ shiin pre, Hophni na Phinehas gbo, mu Nyiɛkpɔɔ Nyu Nunu Daka kre shɔ.”
18 Ŋga bituŋu wre na Nyiɛkpɔɔ Nyu Nunu Daka kre kee yo to, a wra gbila u jɔɔn kre na mu to kro, u jlonwee nyu na. Kre nyjila kre na u lɛ blɛlɔɔ kama, a na u kpɔɔ ki tia wra to mu u yulɔ ka, mna ku. Wra yiɛklu na Israel leele pre ni yɛlɛ fuloe shiin.
Phinehas Lekuchɔ Wre Kum
19 Eli pɔ Phinehas chɔ naa siire ni, a na u se nyjila kro chiɛri mbe da. Ŋga chlɔ wre na loo na pe Nyiɛkpɔɔ Nyu Nunu Daka kre shɔ, mu u plɔ gbo, a u plɔ lɛ to mu ku na kre, lɛɛ na u yaa jaŋga na a wra se bibre. 20 Ŋga wra se mnaa wii na kumu ni kre, a chlɔ ŋmba wra u yii wre na yo u pan mbo, “Mu yɛ yii. Pɔ wre blɔ wi.” 21 A wra kna mbo, “Pɔ wre mɛɛ Ichabod.” To u nsra ja mu paara na mna fii. Mɛɛ kre nyina na Nyiɛkpɔɔ yɛnyiŋge yili Israel leele nu. Ŋgi na hin? Pe Nyiɛkpɔɔ Nyu-Nunu-Daka kre shɔ pe kɛɛ, mu u plɔ gbo, a u plɔ lɛ to mu ku. 22 Kena u kee ŋga u yuu yi na, “Nyiɛkpɔɔ yɛnyiŋge yili Israel leele nu.” Ŋgi na hin? Loŋgoolo Nyiɛkpɔɔ Nyu Nunu Daka kre shɔ.