Philistine leele Na//Nyu Nunu Daka Kre
5
Ŋga Philistine leele na Nyu Nunu Daka kre shɔ kre, pra ki tio mna yili na ki ni Ebenezer na, mna sɛ na ki ni Ashdod na, 2 mna sɛ ki tɛɛ pe sɛɛn kpɔɔ Dagon kre nyuŋgo, mna sɛ ki yire Dagon kre jaara. 3 Ŋga nyiŋge na se bnimi a Ashdod leele na yiri kre, na Dagon ŋga pe faanri mu yire kre, na ki gbila mu to, mu yiɛ juule tra Nyiɛkpɔɔ Nyu Nunu Daka kre yiɛ. A pra ki yire mu yire ki yirehaa. 4 Ŋga nyiŋge na ndru mu se bnimi kre, na sɛɛn kre gbila mu to mu yiɛ juule tra Nyiɛkpɔɔ Nyu Nunu Daka kre yiɛ na. A ki kɛnyi shiin na kuari, a ki ndra na kɔ mu to, mna gbila mu pan mu sni jlonwee nyu na, a ki haŋa kre naa wa mu sni wa. 5 Kre kee ŋga tia hali mu pan mu su aŋga, Dagon kɔmfoɔe, na ki sumifɛɛnlɛ kro, pra taan jlonwee nyu taanhaa kre na, mbe le nyuŋgo wa, fɔna pie kɔ ki na. 6 O Tafun Nyiɛkpɔɔ na Ashdod leele, na leele mblɛ pra fɛ mu pe kun pre kro ndie tini, mna tia laŋmbɛɛ na pe tintin. 7 Ŋga Ashdod leele na yire kee nyjɛ nya ma kre, a pra kna mbo, “Israel leele Nyiɛkpɔɔ wre u wre na o sɛɛn Dagon ndie tiniɛ ma kre. Waa jaa ti mbe Nyu Nunu Daka kre kro mbe tni mna.” 8 A kra tia pra leele tun, a pra Philistine ŋulo kunɔ pre yeeri a pra pan mu fni mna pe wie mbo, “Israel leele pre Nyiɛkpɔɔ wre Nyu Nunu Daka kre, mni oo ki pe hin?”
A pra kna mbo, “E sɛ na ki ni Gath na,” Philistine leele pre chiɛ yire ka yi. 9 Ŋga pra sɛ na ki ni Gath na kre, o Tafun Nyiɛkpɔɔ na Gath leele pre ndie tini, mna fiɛrɛ wo pe na, mna tia laŋmbɛɛ na pe loplombo na pe biile kro tin. 10 A pra yili na ki ni wa, mna sɛ na ki ni pe chiɛ yire ka na, ki mɛɛ naa Ekron. Ŋga pra le na ki ni wa to, a chia kre leele na gble fɔɔri mu le mbo, “Pe pan na Israel leele Nyiɛkpɔɔ wre Nyu Nunu Daka kre ni mbe ki paan o gbo peii.” 11 Ŋga kra pan ma, a Philistine ŋulo pre na ndru mu fni mna yo na, “E ti mbe pe ndru mbe sɛ na Israel leele pre Nyu Nunu Daka kre ni pe tra nu, mbe kia wre na o biile gbo.” Fiɛrɛ na chia kre leele kro yii imi na Nyiɛkpɔɔ naa pe ndie tinii kre ndra na. 12 Pe leele mblɛ pe nsra ku kre, laŋmbɛɛ na pe tin tin kro, a praa nyɛni kpɔɔ na pe sɛɛnlɛ yeeri, na yi paan pe shɔ.