Pe Ndru Mu Sɛ Nyu Nunu Daka Kre Ni
6
O Tafun Nyiɛkpɔɔ Nyu Nunu Daka kre na li Philistine na nyiɛpɔ kɔɔnashin. 2 A pra fni mna pe kɔmfoɔe na pe dobodobo wɔfɛɛnlɛ yeeri mu pe wie mbo, “Yira ŋgi oo pe na Nyiɛkpɔɔ Nyu Nunu Daka kre ni hin? Na o chaa mbe ndru mbe sɛ na ki ni ki lawee, yira ŋgi ki fna o ya ki na hin?”3 A pra kna mbo, “Na e chaa mbe ndru mbe sɛ na Israel Nyiɛkpɔɔ Nyu Nunu Daka kre ni ki lawee kre, ki fna e sɛ na yaka ni mbe pe ki tɛɛ mbe e sisam tali. Ki n fna mbe e sɛ na ki ni kɛwaara. Kre kie ti mbe e saanla, mbe e chin ŋga ki tia wra e ndie tinii.” 4 A leele pre na kna mbo, “Yira ŋgi ni ki fna mbe o sɛ hin?”
A pra kna mbo, “Fɔŋga o swanyiɛ tɛɛ mu yirɛ pe mbe pe na laŋmbɛɛ yi yiɛ kunɔ, mbe yɛ pe na sumblɔ yi kunɔ, mbe pe yire Philistine ŋulo kunɔ pre titɛɛ. Ŋgi na hin? Kanyana nunu ki yire na e ŋulo kunɔ pre kro nyaa. 5 Kena e yi pe mbe yi laŋmbɛɛ yire na sumblɔ mblɛ e pe swanyiɛ ni kre wru, mbe e Israel Nyiɛkpɔɔ wre ŋga buuro, aada kie ti mbe u e fooro le, mbe wa yire na e sɛɛnlɛ yire, na e tra kre ndie tini na. 6 Yira ŋgi ki tia e na ndikana pini imi na Egypt leele, na pe Ŋunu Pharaoh na pe kre hin? Pra tia Nyiɛkpɔɔ na pe fiŋge, a pra chin mu Israel leele pre ŋga kolo a pra yili Egypt na. 7 Kena e soo kaa fɔŋgɔ pe, e naloolo shiin mblɛ pe n da mu tɛɛ mu tnumu tun tun cha, e pe pɔ soo kaa kre na, e nui pre biile yii e sɛ le nagbɛɛ. 8 E o Tafun Nyiɛkpɔɔ wre Nyu Nunu Daka kre wru e taa soo kaa kre na, e swanyiɛ yirɛ nyjɛ e pe na shie na yi ni yire le Daka kre jaara, mbe pe yi tɛɛ mbe e sisam sra wɔ. E soo kaa kre ŋunɔ e ki wa mbe ki sɛ ki yɛ. 9 Na ki shie e na ki le, na ki waa yiɛ tɛɛ Beth-Shemesh na, kena e chin na Israel leele Nyiɛkpɔɔ wre u tia yire kanyana nyjɛ pan o na. La, na ki n shia yiɛ tɛɛ wa, kena oo chin na wre Nyiɛkpɔɔ wre ma u tia, aada jini kee ka ki o da.”
10 Pra kee nyjɛ pra yo pe pe yire kro pe. Pra nui shiin wru mna soo kaa kre pɔ pe na, mna nui pre biile laa pe na, mna sɛ pe le nagbɛɛ. 11 A pra Nyu Nunu Daka kre taa soo kaa kre na, mna swanyiɛ yirɛ yire le yira kre tɛɛ ki mbɛɛ na. 12 A nui pre na yiɛ tɛɛ Beth-Shemesh na na shie, hali pe nsra yiɛ tɛɛ haka, a praa nyɛni na shie. A Philistine ŋulo kunɔ pre na taa pe kro mna da Beth-Shemesh sam na.
13 Na Beth-Shemesh leele wa lafolo ka nu na yua kuun, a pra yiɛ yire mna nya na Nyu Nunu Daka kre paan. A pe yiɛ na shɔ mu tro. 14 Soo kaa kre na pan mna yire blɔ ŋmba praa yeeri Joshua wre see. Wra yiri Beth-Shemesh na, a Nyu Nunu Daka kre na sɛ yire dnɛ kpɔɔ ka mbɛɛ na. A leele pre na soo kaa kre chile, mu nui pre gbo mna pe tɛɛ mu sra wɔ, mna pe sro mu o Tafun Nyiɛkpɔɔ ŋga. 15 A Levi leele na pan mu Nyu Nunu Daka kre, na daka ŋga nu pra swanyiɛ yirɛ yire le kre, taa dnɛ kpɔɔ kre na. A Beth-Shemesh leele pre na yirɛ sro mna sra wɔ mu o Tafun Nyiɛkpɔɔ wre ŋga. 16 Kre nyjila kre krɛrɛ na Philistine ŋulo kunɔ pree wa mu yire na pe le. Ŋga pra kɔ kre a pra chin mna ndru mu sɛ Ekron na ki ble kre lam. 17 Philistine leele pre na sɛ na swanyiɛ yirɛ nyjɛ pra pe na laŋmbɛɛ yi yire kunɔ ni, mna o Tafun Nyiɛkpɔɔ ŋga, mbe pe yi tɛɛ mbe sisam sra wɔ. Yi kunɔ yire naa wa mu yire mu chiɛ kunɔ yire ŋga. Chiɛ yire na yi Ashdod, Gaza, Ashkelon, Gath, na Ekron. 18 Pra sɛ na sumblɔ mblɛ pra pe na swanyiɛ ni kunɔ, a yira yire mu Philistine ŋulo chiɛ nyjɛ praa le yire ŋga. Pe chiɛ nyjɛ pra bunyi sin mu fɛ mu kun, na nyjɛ pe nsra bunyi sin mu fɛ mu kun kre kro na chaa. Dnɛ kpɔɔ ŋga na pra Nyu Nunu Daka kre taa, Joshua see lam Beth-Shemesh na kree wa mu pe dansiɛrɛ yira mu pan mu su aŋga na.
19 O Tafun Nyiɛkpɔɔ wre na Beth-Shemesh leele fuloe taarɛ na kɛ gbo, ŋga pra sɛ Nyu Nunu Daka kre lam le kre na. Kre kee ŋga na pe nyɛnɛɛ badaaŋga mu leele pre ŋga.
Nyu Nunu Daka Kre Pan//Kiriath-Jearim Na