7
A Kiriath-Jearim leele na tia pra sɛ o Tafun Nyu Nunu Daka kre wru mna pan mu ki tɛɛ blɔ ŋmba praa yeeri Abinadab katoo, nyua ka ndra na. A pra u pɔ Eleazar wɔ paala kolo na, mna Nyu Nunu Daka kre le u kɛɛ.Samuel Na Israel Leele
2 Nyiɛkpɔɔ Nyu-Nunu-Daka kre na kro Kiriath-Jearim na mna mu, kie pe yɛlɛ fulo. Kre nyjila ŋga krɛrɛ Israel leele pre na nyɛni mna o Tafun Nyiɛkpɔɔ wre haa cha.
3 A Samuel na yo Israel leele pre pan mbo, “Na e chaa mbe lɛɛ wɔ mbe ndru mbe pan o Tafun Nyiɛkpɔɔ wre pan kre, kena e laa waŋgra leele pre sɛɛnlɛ, na Ashtoreth sɛɛn yire kro, e eyɛ wru e le o Tafun Nyiɛkpɔɔ wre kɛɛ poŋgo, e na wre chiin sumi, kre we e shɔ mbe yili Philistine leele pre jaŋga kɛɛ.” 4 A Israel leele pre na Baal na Ashtoreth sɛɛnlɛ yire wɔ mu sɛ wa, mna yiɛ taa o Tafun Nyiɛkpɔɔ wre chiin na.
5 A Samuel na yo na pe Israel leele pre kro yeeri mbe pe paan fni Mizpah na, mbe u o Tafun Nyiɛkpɔɔ wre tali pe pan. 6 A leele pre kro na pan mu fni Mizpah na. Ŋga pra fni kre a pra nyumu ko mu wo mna ki tɛɛ mu sra wɔ mu o Tafun Nyiɛkpɔɔ wre ŋga, mna ble fun ki ble kre. A pra kna mbo, “O sisaa pe mu o Tafun Nyiɛkpɔɔ wre taan.” Mizpah na wa Samuel na leele pre lalaa kaalɛɛ li.
7 Ŋga Philistine leele pre na loo na Israel leele pre fni Mizpah na kre, Philistine ŋulo kunɔ pre na peyɛ kna mbe sɛ wi na pe ni. Israel leele pre na pe kee loo, a fiɛrɛ na pe yii. 8 A pra sɛ yo Samuel pan mbo, “Jande yiɛ nyina mu o Tafun Nyiɛkpɔɔ wre tali mbe u o shɔ Philistine leele pre kɛɛ.” 9 A Samuel na mbɔɔ cha mna u tɛɛ mu sra wɔ mna u sro poŋgo mu o Tafun Nyiɛkpɔɔ wre tali mbe u ya Israel leele pre na, a o Tafun Nyiɛkpɔɔ na u talaa kre loo. 10 Nyjila ŋga ni Samuel naa wa na sra kre woni kre, na Philistine leele pre kɔ na paan mbe Israel leele pre tɔ. A o Tafun Nyiɛkpɔɔ na tia nyiɛ na twanri, a fiɛrɛ na Philistine leele pre yii, a pe nsra chin mna pie yiɛ le, a pra fɛ mu nyina. 11 A Israel leele pre na yili Mizpah na mna pe kɔŋgɔ ni mna pe gbo chiin mna sɛ su Beth-Car na.
12 A Samuel na dnɛ ka wru mna ki yire Mizpah na Shen lalaa mna kna mbo, “O Tafun Nyiɛkpɔɔ wre ya o na kolo kro na.” A wra ki mɛɛ tɛɛ Ebenezer, ki nyina na mna o Tafun Nyiɛkpɔɔ ya o na mu da yi kre. 13 Ki ble kre pra Philistine leele pre ja, a pe nsra ja mu Israel leele pre sam tro na. O Tafun Nyiɛkpɔɔ wre na kɛ laa Philistine leele pre na, nyjila ŋga ni Samuel naa wa kre krɛrɛ nu. 14 Chiɛ nyjɛ Philistine leele pre na wi mu shɔ Israel leele pre pan, mu yire Ekron na mu sɛ su Gath na yire kro na ndru mu to pe kɛɛ. A kra tia Israel tra kre kro na to pe kɛɛ. Kra tia wejinyiŋge na pan tra kre nu, a sisaa ka nsraa wa Israel na Canaan leele lalaa na.