Leele Pre Naa Ŋunu Chaa
8
Ŋga Samuel na lɛ kre, wra u bibilɛ pre pe Israel leele pre kpra kunfɛɛnlɛ. 2 U pɔ lopom mɛɛ naa Joel, a ŋmba wra taa mɛɛ naa Abijah. Pre na lɛ kpra kunfɛɛnlɛ Beersheba na. 3 La, pe nsra ja mu taa pe lɛ tlo na, swa chaara chiin na pe yiɛ na nyina, a kra tia dɔlɔɔ yirɛ praa shio leele pre pan. Ki tia pe nsra ja na kpra kuun kee nyjɛ praa lii yire nu.4 Kra tia Israel leele pre loplombo pre kro na fni mna sɛ Samuel pan Ramah na, 5 mna sɛ yo u pan mbo, “Tolɛɛ, mu lɛ, a mu biile pre n na nyjɛ mna pini yire pini. Ki tia o chaa mbe mu o ŋga ŋunu mbe wra o le, mbe o ŋunu ta imi waŋgra nyjɛ yi fɛ mu o kun yire nyi kre.” 6 Samuel yiɛ nsra shɔ ŋga leele pre na yo na ŋunu pe chaa kre na, a wra o Tafun Nyiɛkpɔɔ wre wie, 7 a o Tafun Nyiɛkpɔɔ wre na yo u pan mbo, “Kee ŋga leele pre yuu mu pan kre loo, mu pe ŋga ŋga pe chaa. Ŋu ma leele pre je, Mi pe je. Pe n na chaa mbe ni pe pe ŋunu. 8 Mu yire ŋga ni yiri na pe ni Egypt na mu pan, pe laa ni kro mu sɛ sɛɛnlɛ sumi, kena kee nyjɛ pra pe ni na kre, yire chɔɔ pe pini mu na kre. 9 Kena kee nyjɛ pe yuu kre, ndie tɛɛ pe pan, la, pe jaari mu pe nyina kee nyjɛ nyini pe ŋulo pre we na taari pe na.”
10 Samuel na kee nyjɛ o Tafun Nyiɛkpɔɔ na yo, u yo leele pre pan, yire kro yo pe pan. 11 Mbo, “Kolo ŋga na e ŋunu wre we na tro na e ni yi kre. We e biile kaari ŋunɔwifɛɛnlɛ, mbe u pe plɛ wɔ mbe praa u ŋunɔ wi soolo ndru, mbe plɛ na u soo kɛɛ nyjɛ ni we sɛ ŋunɔ ŋmaai. 12 Mbe u pe plɛ wɔ loplombo, leele kagbeŋge nyu na, mbe plɛ pe loplombo, leele fuloe shiin na kɛ nyu na. A e biile pie na u seele fali, mbra u see yirɛ kuun, mbra u ŋunɔ wi yirɛ na u soo kɛɛ yire gbeele. 13 E bichiɛlɛ pie na tlade pini u pan, mbra u sro pini, mbra u paanu foo. 14 E seele, na e kagblɛ nyjɛ yi nyu, we yi shɔ mbe u loplombo mblɛ u wɔ pre ŋga. 15 A e see yirɛ nyjɛ ee ta, we yi yɔ kɛ, mbe nunu shɔ mbe u loplombo na u sumifɛɛnlɛ ŋga. 16 We e sumifɛɛnlɛ, na e nui, na e bubunlɔ mblɛ pe kpɔɔ kpɔɔ shɔ, mbe praa tnumu tuni u pan. 17 A we e mbaala yɔ kɛ mbe nunu wru, a yire titi we pe u tinlɛ. 18 Na kre nyjila kre waa e da, ee nyɛni kpɔɔ e ŋunu ŋmba yire titi yo e chaa wre kɛɛ, nyjɛ u e pini kre ndra na. La, na ki pan ma, o Tafun Nyiɛkpɔɔ wre wa ndie tɛɛ e pan.”
19 Leele pre na je, pe n nsra ndie tɛɛ kee nyjɛ Samuel yuu yire na, mnaa yuu mbo, “Ŋunu o chaa. 20 O chaa mbe pe na leele mblɛ pe fɛ mu o kun ŋga lɛ, mbe o ŋunu ta, mbe wra o le, mbe yiɛklu o pan ŋunɔ mbe o sɛ wi.” 21 Samuel na kee nyjɛ pra yo yire kro loo, mna yi yo o Tafun Nyiɛkpɔɔ wre pan. 22 A o Tafun Nyiɛkpɔɔ na yo mbo, “Ŋga pe chaa pe, mu pe ŋga pe ŋunu.” A Samuel na yo Israel leele pre pan, na pe ndru mbe sɛ katoo.