3 Ki ble ka Kish bubunlɔ plɛ na fun, a wra yo Saul pan na wre na u sumifɛɛnlɛ pre wa pe sɛ bubunlɔ pre cha. 4 Pra sɛ kila nyua chia ŋga praa yeeri Ephraim, na chia ŋga praa yeeri Shalisha yire na mna tro, pe nsra yurɛ pre nya. Ki tia pra kila mna sɛ yili chia ŋga praa yeeri Shaalim kre na, a pe nsra pe nya. A pra yire wa mna tro Benjamin tra nu, hali pe nsra pe nya. 5 Ŋga pra yire wa mna kna mu to Zuph tra nu kre, a Saul na yo u tnu wre pan mbo, “Ti o sɛ katoo, aada ndoo kuraa yurɛ pre kee fɛɛ, mu na o kee jawa.”

6 A tnu wre na kna mbo, “Le, Nyiɛkpɔɔ ndro waa wa chia ŋga na, a ndro kro u shɔ mu li. Ŋgi na hin? Kee nyjɛ u yuu kro pini, kena ti mbe o sɛ u pan, aada we jaa o nyina mna oo bubunlɔ pre nya.” 7 A Saul na kna mbo, “Na o sɛ u pan, yira ŋgi ki fna o u ŋga hin? Wree mblɛ sro n wa o pan, a yaka n wa mbe o ta mbe u ŋga, ndee mni oo ki pe hin?” 8 A tnu wre na kna mbo, “Nii wa na swa bie ka ni ni bɔtɔ mna, mbe jaa Nyiɛkpɔɔ ndro wre ŋga ki yi mbe u o nyina yurɛ pre lawee.”

9 Fa kre, na Israel ndro chaa mbe Nyiɛkpɔɔ kala yo u pan mbo, “Ni shie ŋmba u yo nyafun pan.” Leele mblɛ pe yeeri Nyiɛkpɔɔ kee nyanyofɛɛnlɛ aŋga ŋga, pre praa yeeri “nyafun.”

10 A Saul na kna mbo, “Ŋga mu yo kre nyu, ti mbe o sɛ.” A pra sɛ chia ŋga na Nyiɛkpɔɔ ndro wre na nyi kre na. 11 Ŋga praa nyua ka ndru mbe le chia kre na to mna bichabɛɛlɛ plɛ fni na pe shie lɔɔ. A pra pe wie mbo, “Blɔ nyafun wree wa katoo?”

12 A pra kna mbo, “Uu wa. Wre wi e yiɛ wa, kre. E sɛ nyaanyaa ee u da. Aŋga leele plɛ pan mu sra wɔ sra gbunu ŋga kii wa nyua na kre na, ki tia u pan chia lam. 13 Na e le to, ee u da wa, mbe u chiin nduu nyua kre na mbe sɛ li. Na u n nduu mu sɛ sra kre dwan, leele mblɛ u yeeri pre wa li. Kena e nyaari, ee u da imi nyu ŋga.”

14 A pra nyaari mu le chia kre na. Ŋga Saul na u tnu wre naa lee to, mna Samuel fni na u shie mbe sɛ nduu nyua kre na.

15 Na o Tafun Nyiɛkpɔɔ wre klu mu ki wɔ mu Samuel nyina mbo, 16 “Baŋga imi nyu, mbe ti blɔ wa yiri Benjamin sele nu mbe pan mu pan mbe mu u fa na simi ni, mbe u tɛɛ ŋunu ni leele Israel wolo pre pan, mbe u pe shɔ mbe yili Philistine leele pre kɛɛ. Ni ni leele pre kanyana nyjɛ pe nyaa yire nya, mu pe nyɛni loo.” 17 Ŋga Samuel nyini na to Saul na to, a o Tafun Nyiɛkpɔɔ na yo u pan mbo, “Blɔ ŋmba kee ndaa yo mu pan wre wi kre. Wre we ni leele pre ŋunumu li.” 18 A Saul na nyaari mu Samuel da, na u chaa mbe yili chia kre jlonwee nyu na, a wra kna mbo, “Ndoo, jande, ni nyina blɔ nyafun wre katoo.” 19 A Samuel na kna mbo, “Mi wi, nyafun wre. E tro e yiɛ klu mbe o sɛ nyjeeri wa. Aŋga mi na e kro shiin we chaa mbe li. Baŋga bnimi mbe nyjɛ pan e pan yire kro pe mbe e ŋga, mbe chiin e wa kolo mbe e sɛ. 20 Bubunlɔ mblɛ pe fun kie pe ble taarɛ yi aŋga kre, yaa kawa na pre kee ni, pe pe nya katoo. La, Israel leele kro jawalaa wa mu na, ŋu na mu lɛ biile kro.” 21 A Saul na kna mbo, “Ei! Yira ŋgi kala mu yuu ni pan ŋga hin? Benjamin sele nu ni yiri, a kre yi sele fiɛn kuraa Israel tra nu, a mi kɛ leele pe n le mu nya.”

22 Bawa Samuel na le Saul na u tnu wre ni u kagbala kpɔɔ ŋga nu leele we pe fulo na kɛ na nyi mu tni, a wra pe ŋga loplombo tni haa, a pra tni mbe li. 23 A Samuel na yo u sro pefun wre pan mbo, “Kaara ŋga ni mu ŋga na mu tɛɛ kre wru mu pan.”

24 A sro pefun wre na pan na yurɔ jele kre ni mu tɛɛ u yiɛ. A Samuel na kna mbo, “Mu kaara ŋga ni tɛɛ na mu sri yi kre, ki ka. Ŋu pan ni ki tɛɛ, mbe mu paan ki ka leele mblɛ ni yeeri lihaa ŋga kro yiɛ na.” A Saul na Samuel na chaa mu li ki ble kre.

25 Ŋga pra yiri sumindoo wa mu pan chia lam kre, a pra sni haa gbeele Saul pan zio ndra na, a wra sni wa.

26 Ŋga ndram naa, saanri kre, Samuel na nduu Saul pan nyjeeri wa mna u nyi mbo, “Yiri, mbe e wa kolo aŋga.” A Saul na yiri, a wre na Samuel na chaa mu yili lete na. 27 Ŋga pra da chia kre jenu na kre, a Samuel na kna mu yo Saul pan, mbo, “Yo mu tnu wre pan mbe u yiɛ klu mbra shie.” A tnu wre na yiɛklu pe pan.

A Samuel na kna mbo, “Yire mna chiɛri mbe ni kee ŋga Nyiɛkpɔɔ yo ni yo mu pan bɔ.”